Bìoball air-loidhne

馬太福音 17 - 現代台語譯本羅馬字版

Iâ-so͘ Kái-piàn Hêng-siōng
( Khó 9.2-13 ; Lō͘ 9.28-36 )

¹ La̍k ji̍t āu, Iâ-so͘ chhōa Pí-tek, Ngá-kok, kap Ngá-kok ê sió-tī Iok-hān, kan-ta in ka-kī peh-chiūⁿ chi̍t chō koân soaⁿ.

² Tī in bīn-chêng, Iâ-so͘ ê hêng-siōng kái-piàn: I ê bīn chhin-chhiūⁿ ji̍t-thâu hoat-kng; I ê saⁿ piàn kah chhin-chhiūⁿ kng hiah-ni̍h pe̍h.

³ Hut-jiân-kan, Mô͘-se kap Í-lī-a tùi in hián-hiān, kap Iâ-so͘ kóng-ōe.

⁴ Pí-tek tùi Iâ-so͘ kóng, “Chú ah, lán tī chia chin hó! Lí nā beh, góa tī chia tah saⁿ keng liâu-á, chi̍t keng hō͘ lí, chi̍t keng hō͘ Mô͘-se, chi̍t keng hō͘ Í-lī-a.”

⁵ I iáu-teh kóng ê sî, hut-jiân ū chi̍t phìⁿ chhàn-lān ê hûn kā in tà--leh, ū siaⁿ tùi hûn chhut--lâi, kóng, “Chit-ê sī góa só͘ thiàⁿ ê Kiáⁿ, I, góa chin ì-ài, lín tio̍h thiaⁿ-thàn I.”

⁶ Bûn-tô͘ chi̍t-ē thiaⁿ--tio̍h chiū phak--lo̍h-khì, hui-siông kiaⁿ-hiâⁿ.

⁷ Iâ-so͘ kiâⁿ óa--khì, kā in bong, kóng, “Khí--lâi, m̄-bián kiaⁿ!”

⁸ In chi̍t-ē gia̍h-ba̍k khòaⁿ, chí-ū khòaⁿ-tio̍h Iâ-so͘, í-gōa bô pa̍t-lâng.

⁹ In lo̍h-soaⁿ ê sî, Iâ-so͘ bēng-lēng in, kóng, “Jîn-chú tùi sí-lâng tiong koh-oa̍h í-chêng, lín m̄-thang kā lâng kóng-khí só͘ khòaⁿ--kìⁿ ê īⁿ-siōng.”

¹⁰ Bûn-tô͘ mn̄g I, kóng, “Nā án-ni, sī-án-chóaⁿ keng-ha̍k-kàu-su kóng Í-lī-a it-tēng tio̍h seng lâi?”

¹¹ Iâ-so͘ ìn kóng, “Í-lī-a it-tēng tio̍h lâi têng-sin chéng-lí it-chhè.

¹² Góa kā lín kóng, Í-lī-a í-keng lâi lah, m̄-kú lâng m̄ bat i, hoán-tńg chiàu in ê ì-sù tùi-thāi i. Chhin-chhiūⁿ án-ni, Jîn-chú mā teh-beh tī in ê chhiú-ē siū-khó͘.”

¹³ Hit-sî bûn-tô͘ chiah bêng-pe̍k I tùi in kóng--ê sī chí Si-sóe-chiá Iok-hān.

Iâ-so͘ I-hó Siâ-sîn Hū-sin ê Gín-á
( Khó 9.14-29 ; Lō͘ 9.37-43 )

¹⁴ In lâi kàu kûn-chiòng hia, ū chi̍t ê lâng lâi, kūi tī Iâ-so͘ ê kha-chêng,

¹⁵ tùi I kóng, “Chú ah, lîn-bín góa ê kiáⁿ! In-ūi i tì-tio̍h iûⁿ-hîn, hui-siông kan-khó͘, put-sî poa̍h-lo̍h hé, mā put-sî poa̍h-lo̍h chúi.

¹⁶ Góa chhōa i khì lí ê bûn-tô͘ hia, in bô hoat-tō͘ kā i i-hó.”

¹⁷ Iâ-so͘ ìn kóng, “Ài ah, m̄-sìn koh hú-pāi ê sè-tāi, góa tio̍h kap lín tòa jōa kú? Góa tio̍h koh jím-nāi lín jōa kú? Kā i chhōa-lâi góa chia.”

¹⁸ Iâ-so͘ chek-pī kúi, kúi chiū tùi gín-á chhut--khì; i ê pīⁿ sûi-sî hó--khì.

¹⁹ Āu-lâi, bûn-tô͘ su-hā lâi mn̄g Iâ-so͘, “Sī-án-chóaⁿ goán bô hoat-tō͘ kā kúi kóaⁿ--chhut-khì?”

²⁰ Iâ-so͘ kā in kóng, “Sī in-ūi lín sió-sìn. Góa si̍t-chāi kā lín kóng, lín ê sìn-sim nā ū kòa-chhài-chí hiah tōa, lín tùi chit-chō soaⁿ kóng ‘Tùi chia sóa-khì hia’, soaⁿ mā ōe sóa--khì; bô chi̍t hāng sū lín chòe bōe kàu.”

Iâ-so͘ koh Ū-kò Ka-kī ê Sí kap Koh-oa̍h
( Khó 9.30-32 ; Lō͘ 9.43-45 )

²² Bûn-tô͘ chū-chi̍p tī Ka-lī-lī ê sî, Iâ-so͘ kā in kóng, “Jîn-chú teh-beh hō͘ lâng chhut-bōe.

²³ In ōe kā I hāi-sí, tē-saⁿ ji̍t Siōng-tè ōe hō͘ I koh-oa̍h.” Bûn-tô͘ chiū hui-siông siong-sim.

La̍p Sèng-tiān-sè

²⁴ Iâ-so͘ kap bûn-tô͘ lâi kàu Ka-pek-lông ê sî, ū chi̍t-kóa siu sèng-tiān-sè ê lâng khì mn̄g Pí-tek, “Lín lāu-su ū la̍p sèng-tiān-sè bô?”

²⁵ I kóng, “Ū.” Pí-tek ji̍p-khì chhù-lāi ê sî, Iâ-so͘ seng mn̄g i kóng, “Tōe-chiūⁿ ê kun-ông sī tùi sím-mi̍h-lâng siu koan-sè á-sī lâng-thâu-sè? Sī tùi pún-kok-lâng á-sī gōa-kok-lâng? Se-bûn, lí siūⁿ án-chóaⁿ?”

²⁶ Pí-tek ìn kóng, “Tùi gōa-kok-lâng.” Iâ-so͘ kā i kóng, “Án-ni, pún-kok-lâng chiū m̄-bián la̍p-sè lo͘h.

²⁷ Put-kò, lán ūi-tio̍h bô ài tek-chōe chiah-ê lâng, lí khì ô͘--ni̍h tiò hî, tiò--khí-lâi ê thâu chi̍t bé, kā hî ê chhùi peh-khui chiū ōe khòaⁿ-tio̍h chi̍t ê gûn-á, the̍h-khì hō͘ in, thòe góa kap lí la̍p sèng-tiān-sè.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan