Bìoball air-loidhne

馬太福音 16 - 現代台語譯本羅馬字版

Hoat-lī-sài-phài ê Lâng Iau-kiû Sîn-jiah
( Khó 8.11-13 ; Lō͘ 12.54-56 )

¹ Ū Hoat-lī-sài-phài kap Sat-to͘-kai-phài ê lâng lâi chhì-thàm Iâ-so͘, iau-kiû I hō͘ in khòaⁿ tùi thiⁿ lâi ê sîn-jiah.

² Iâ-so͘ ìn kóng, “Hông-hun ê sî, lín kóng ‘Bîn-á-chài ōe hó-thiⁿ, in-ūi thiⁿ-sek âng’.

³ Chá-khí-sî lín kóng ‘Kin-á-ji̍t ū hong-hō͘, in-ūi thiⁿ-sek àm koh âng’. Lín to khòaⁿ ōe chhut thiⁿ ê kéng-siōng, ná khòaⁿ bōe chhut chit-ê sî-tāi ê tiāu-thâu.

⁴ Siâ-ok kan-îm ê sè-tāi iau-kiû sîn-jiah; Iok-ná ê sîn-jiah í-gōa, bōe koh ū sîn-jiah hō͘ chit sè-tāi ê lâng.” Kóng-liáu, Iâ-so͘ chiū lī-khui in khì pa̍t-ūi.

Hoat-lī-sài-phài kap Sat-to͘-kai-phài ê Kàⁿ
( Khó 8.14-21 )

⁵ Bûn-tô͘ kàu ô͘ ê hit-pêng hōaⁿ chiah chai in bōe-kì-tit tòa piáⁿ.

⁶ Iâ-so͘ kā in kóng, “Tio̍h chù-ì, tio̍h tî-hông Hoat-lī-sài-phài kap Sat-to͘-kai-phài ê kàⁿ.”

⁷ In hō͘-siōng gī-lūn kóng, “Sī in-ūi lán bô tòa piáⁿ sī--bô?”

⁸ Iâ-so͘ chai-iáⁿ chiū kóng, “Sió-sìn ê lâng, lín sī-án-chóaⁿ teh gī-lūn bô tòa piáⁿ ê tāi-chì?

⁹ Lín kiám iáu-bē bêng-pe̍k, kiám bōe-kì-tit góa ēng gō͘ ê piáⁿ hō͘ gō͘-chheng lâng chia̍h, chia̍h chhun--ê lín ū khioh kúi nâ?

¹⁰ Lín kiám bōe-kì-tit góa ēng chhit ê piáⁿ hō͘ sì-chheng lâng chia̍h, chia̍h chhun--ê lín ū khioh kúi láng?

¹¹ Sī-án-chóaⁿ lín bô bêng-pe̍k góa kā lín kóng--ê m̄-sī koan-hē piáⁿ ê tāi-chì? Tio̍h tî-hông Hoat-lī-sài-phài kap Sat-to͘-kai-phài ê kàⁿ!”

¹² Chit-sî bûn-tô͘ chiah bêng-pe̍k Iâ-so͘ m̄-sī kóng tio̍h tî-hông piáⁿ ê kàⁿ, sī tio̍h tî-hông Hoat-lī-sài-phài kap Sat-to͘-kai-phài ê kà-sī.

Pí-tek Soan-jīn Iâ-so͘ Sī Ki-tok
( Khó 8.27-30 ; Lō͘ 9.18-21 )

¹³ Iâ-so͘ lâi kàu Khái-sat-lī-a Hui-li̍p-pí kéng-lāi ê sî, mn̄g I ê bûn-tô͘ kóng, “Lâng kóng Jîn-chú sī sím-mi̍h-lâng?”

¹⁴ In ìn kóng, “Ū lâng kóng sī Si-sóe-chiá Iok-hān; ū lâng kóng sī Í-lī-a; mā ū lâng kóng sī Iâ-lī-bí á-sī sian-ti tiong ê chi̍t ūi.”

¹⁵ Iâ-so͘ mn̄g in kóng, “Lín leh, lín kóng góa sī sím-mi̍h-lâng?”

¹⁶ Se-bûn Pí-tek ìn kóng, “Lí sī Ki-tok, éng-oa̍h Siōng-tè ê Kiáⁿ.”

¹⁷ Iâ-so͘ ìn i kóng, “Se-bûn Pa-iok-ná, lí chin ū hok-khì, in-ūi kā lí khé-sī--ê m̄-sī lâng, sī góa ê Thiⁿ-pē.

¹⁸ Góa koh kā lí kóng, lí sī Pí-tek, sī chio̍h-pôaⁿ, góa beh tī chit-ê chio̍h-pôaⁿ téng khí-chō góa ê kàu-hōe, Im-hú sí-bông ê koân-sè to bōe iâⁿ-kè i.

¹⁹ Góa beh chiong Thian-kok ê só-sî hō͘ lí; lí tī tōe-chiūⁿ kìm-chí--ê, tī thiⁿ-téng mā ōe kìm-chí; lí tī tōe-chiūⁿ ún-chún--ê, tī thiⁿ-téng mā ōe ún-chún.”

²⁰ Āu-lâi, I bēng-lēng bûn-tô͘ m̄-thang kā lâng kóng I chiū-sī Ki-tok.

Iâ-so͘ Ū-kò Siū-lān kap Koh-oa̍h
( Khó 8.31-9.1 ; Lō͘ 9.22-27 )

²¹ Hit-sî, Iâ-so͘ khai-sí tùi I ê bûn-tô͘ piáu-sī I it-tēng tio̍h khì Iâ-lō͘-sat-léng, tùi tiúⁿ-ló, chè-si-tiúⁿ, kap keng-ha̍k-kàu-su siū chin chōe khó͘-lān, koh hō͘ lâng hāi-sí, tē-saⁿ ji̍t Siōng-tè ōe hō͘ I koh-oa̍h.

²² Pí-tek chiū khiú Iâ-so͘ khì piⁿ--á, kā I chek-pī kóng, “Chú ah, choa̍t-tùi m̄-thang! Lí bōe-ēng-tit ū chit-khoán tāi-chì!”

²³ Iâ-so͘ oa̍t-tńg-sin tùi Pí-tek kóng, “Sat-tàn, siám-khui! Lí teh kā góa tîⁿ-kha-pòaⁿ-chhiú; lí siūⁿ--ê m̄-sī Siōng-tè ê sū, sī lâng ê sū.”

²⁴ Āu-lâi, Iâ-so͘ tùi I ê bûn-tô͘ kóng, “Beh tè góa ê lâng, tio̍h oân-choân hó͘-tēng ka-kī, giâ ka-kī ê si̍p-jī-kè lâi tè góa.

²⁵ In-ūi beh kiù ka-kī ê sìⁿ-miā--ê, ōe sòng-sit sìⁿ-miā; ūi-tio̍h góa ê iân-kò͘ sòng-sit ka-kī ê sìⁿ-miā--ê, ōe tit-tio̍h sìⁿ-miā.

²⁶ Lâng nā tit-tio̍h choân sè-kài soah sòng-sit ka-kī ê sìⁿ-miā ū sím-mi̍h lī-ek? Lâng ōe-tàng ēng sím-mi̍h tāi-kè lâi kau-ōaⁿ ka-kī ê sìⁿ-miā?

²⁷ Jîn-chú teh-beh tī I ê Pē ê êng-iāu tiong kap I ê thiⁿ-sài lâi-lîm, hit-sî I ōe chiàu ta̍k-ê lâng ê hêng-ûi kā in pò-siúⁿ á-sī hêng-hoa̍t.

²⁸ Góa si̍t-chāi kā lín kóng, khiā tī chia ê lâng, ū-ê iáu-bē sí í-chêng ōe khòaⁿ-kìⁿ Jîn-chú choh-ông lâi-lîm.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan