馬太福音 15 - 現代台語譯本羅馬字版

Chó͘-sian ê Thoân-thóng
( Khó 7.1-13 )

¹ Ū Hoat-lī-sài-phài ê lâng kap keng-ha̍k-kàu-su tùi Iâ-lō͘-sat-léng lâi kìⁿ Iâ-so͘, mn̄g I kóng,

² “Sī-án-chóaⁿ lí ê bûn-tô͘ bô seng sóe-chhiú chiū chia̍h-pn̄g, ûi-hoān kó͘-chá-lâng ê thoân-thóng?”

³ I ìn kóng, “Lín sī-án-chóaⁿ in-ūi lín ê thoân-thóng lâi ûi-hoān Siōng-tè ê kài-bēng?

⁴ Siōng-tè kóng ‘Tio̍h hàu-kèng pē-bú’; koh kóng ‘Mē lāu-pē á-sī mē lāu-bú ê lâng eng-kai chhú-sí’.

⁵ M̄-kú lín kóng, ‘Lâng nā tùi ka-kī ê lāu-pē á-sī lāu-bú kóng: Góa eng-kai hō͘ lí--ê í-keng hiàn hō͘ Siōng-tè,

⁶ i chiū bô su-iàu hàu-kèng lāu-pē.’ Án-ni, lín in-ūi ka-kī ê thoân-thóng hòe-tû Siōng-tè ê ōe.

⁷ Lín ké-hó ê lâng, Í-sài-a só͘ kóng koan-hē lín ê ū-giân chin tio̍h; i kóng:

⁸ Chit-ê chú-bîn ēng chhùi-tûn chun-kèng góa, in ê sim khiok lī-khui góa hn̄g-hn̄g.

⁹ In ēng lâng ê kui-lē chòe góa ê kà-sī kà-sī lâng; in kèng-pài góa lóng bô-chhái-kang.”

Sím-mi̍h Chiah Ōe Hō͘ Lâng Bô Chheng-khì
( Khó 7.14-23 )

¹⁰ Iâ-so͘ kiò chèng-lâng lâi, kā in kóng, “Tio̍h thiaⁿ, tio̍h liáu-kái:

¹¹ M̄-sī tùi chhùi ji̍p--khì-ê hō͘ lâng bô chheng-khì, sī tùi chhùi chhut--lâi-ê chiah hō͘ lâng bô chheng-khì.”

¹² Bûn-tô͘ lâi tùi I kóng, “Hoat-lī-sài-phài ê lâng thiaⁿ-tio̍h lí chit-ê ōe chin hoán-kám, lí chai--bô?”

¹³ I ìn kóng, “M̄-sī góa ê Thiⁿ-pē chai-chèng--ê, lóng beh kā i khau--khí-lâi.

¹⁴ Chhut-chāi in kóng. In sī chhiⁿ-mî teh khan chhiⁿ-mî; nā chhiⁿ-mî khan chhiⁿ-mî, nn̄g ê lóng ōe poa̍h-lo̍h khut-á.”

¹⁵ Pí-tek ìn I kóng, “Chhiáⁿ lí kā goán kóe-seh chit-ê phì-jū.”

¹⁶ I chiū kóng, “Liân lín to iáu bô bêng-pe̍k o͘h?

¹⁷ Lín kiám bô liáu-kái, só͘-ū tùi chhùi ji̍p--ê lóng ji̍p-khì pak-tó͘ lāi, āu-lâi pàng lo̍h-khì piān-só͘?

¹⁸ Tùi chhùi chhut--lâi-ê sī tùi sim chhut, che chiah ōe hō͘ lâng bô chheng-khì.

¹⁹ In-ūi tùi sim chhut--lâi-ê ū pháiⁿ liām-thâu, hiong-sat, su-thong, kan-îm, thau-the̍h, gūi-chèng, kap húi-pòng.

²⁰ Chiah-ê chiah ōe hō͘ lâng bô chheng-khì; bô sóe-chhiú chiū chia̍h-pn̄g, bōe hō͘ lâng bô chheng-khì.”

Ka-lâm Hū-jîn-lâng ê Sìn-sim
( Khó 7.24-30 )

²¹ Iâ-so͘ lī-khui hit só͘-chāi, thè-khì Thài-ní kap Se-tùn ê kéng-lāi.

²² Tú-hó ū chi̍t ê Ka-lâm ê hū-jîn-lâng tùi hit tōe-khu lâi, tōa-siaⁿ hoah, “Chú ah, Tāi-pi̍t ê Kiáⁿ, lîn-bín góa! Góa ê cha-bó͘-kiáⁿ hō͘ kúi hū-sin, chin kan-khó͘.”

²³ Iâ-so͘ bô kā i ìn pòaⁿ-kù. I ê bûn-tô͘ lâi kiû I kóng, “Kā i kóaⁿ-cháu, i tè tī lán āu-bīn ti̍t-ti̍t teh hoah.”

²⁴ Iâ-so͘ ìn kóng, “Góa siū chhe-phài chí-ū sī beh chhē Í-sek-lia̍t-ke sit-lo̍h ê iûⁿ.”

²⁵ M̄-kú hū-jîn-lâng lâi kūi tī I ê bīn-chêng, kóng, “Chú ah, chhiáⁿ pang-chān góa!”

²⁶ Iâ-so͘ kóng, “The̍h gín-á ê chia̍h-mi̍h hiat hō͘ káu-á chia̍h, m̄ hó.”

²⁷ Hū-jîn-lâng kóng, “Chú, sī lah, káu-á mā ū chia̍h chú-lâng toh-téng lak--lo̍h-lâi ê piáⁿ-iù-á.”

²⁸ Āu-lâi, Iâ-so͘ ìn kóng, “Hū-jîn-lâng, lí ê sìn-sim chin tōa. Hō͘ lí ê sim-goān si̍t-hiān!” I ê cha-bó͘-kiáⁿ tī hit-chūn chiū tit-tio̍h i-hó.

I-hó Ta̍k-khoán Pīⁿ-lâng

²⁹ Iâ-so͘ lī-khui hit só͘-chāi, iân Ka-lī-lī ô͘-piⁿ kiâⁿ, āu-lâi chiūⁿ-soaⁿ, tī hia chē.

³⁰ Ū chin tōa-tīn ê lâng chhōa kha-chhiú khê--khì, kha-pái, ba̍k-chiu bô khòaⁿ--kìⁿ, chhùi bōe kóng-ōe, kap chin chōe ū pa̍t-khoán pīⁿ ê lâng lâi Iâ-so͘ hia, hē tī I ê kha-chêng, I chiū kā in i-hó.

³¹ Chèng-lâng khòaⁿ-tio̍h bōe kóng-ōe ê lâng ōe kóng-ōe, chhiú khê--khì ê lâng ho̍k-goân, kha-pái ê lâng ōe kiâⁿ, bōe khòaⁿ--kìⁿ ê lâng ōe khòaⁿ--kìⁿ, chin tio̍h-kiaⁿ, chiū kui êng-kng hō͘ Í-sek-lia̍t ê Siōng-tè.

Hō͘ Sì-chheng Lâng Chia̍h Pá
( Khó 8.1-10 )

³² Iâ-so͘ kiò I ê bûn-tô͘ lâi, kā in kóng, “Góa chin khó-lîn chit-tīn lâng, in-ūi in í-keng kap góa chòe-hé saⁿ ji̍t kú, hiān-chāi bô mi̍h thang chia̍h lah. Góa m̄-kam hō͘ in sì-sòaⁿ iau-iau tńg--khì, kiaⁿ-liáu in tī lō͘-tiong hūn-tó.”

³³ Bûn-tô͘ kā I kóng, “Tī chit-ê phian-phiah bô lâng tòa ê só͘-chāi, goán beh khì tó-ūi the̍h hiah chōe piáⁿ lâi hō͘ chiah chōe lâng chia̍h?”

³⁴ Iâ-so͘ mn̄g in kóng, “Lín ū jōa-chōe piáⁿ?” In kóng, “Chhit ê; mā ū kúi-bé-á sòe bé hî.”

³⁵ I bēng-lēng kûn-chiòng chē lo̍h-khì thô͘-kha,

³⁶ jiân-āu the̍h hit chhit ê piáⁿ kap hiah-ê hî, kám-siā, peh-khui, the̍h hō͘ bûn-tô͘, bûn-tô͘ chiū the̍h hō͘ kûn-chiòng.

³⁷ Chèng-lâng lóng chia̍h, chia̍h kàu pá; in khioh chia̍h chhun ê chhùi-sut-á, tóe-móa chhit láng.

³⁸ Chia̍h ê lâng, hū-jîn-lâng kap gín-á bô sǹg, kan-ta ta-po͘-lâng chiū ū sì-chheng.

³⁹ Iâ-so͘ kái-sàn kûn-chiòng liáu-āu, chiūⁿ-chûn khì Má-ka-tan tōe-khu.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan