Bìoball air-loidhne

馬太福音 13 - 現代台語譯本羅馬字版

Iā Chéng-chí ê Phì-jū
( Khó 4.1-9 ; Lō͘ 8.4-8 )

¹ Siâng hit-ji̍t, Iâ-so͘ tùi chhù--ni̍h chhut--khì, tī ô͘-piⁿ chē.

² Ū chi̍t tōa-tīn lâng chū-chi̍p óa-lâi I hia, I soah tio̍h khì chē tī chûn-téng, kui tōa-tīn lâng lóng khiā tī hōaⁿ-téng.

³ I chiū ēng phì-jū tùi in kóng chin chōe hāng sū. I kóng: “Ū chi̍t ê iā chéng-chí ê lâng chhut-khì iā chéng-chí.

⁴ I iā ê sî, ū-ê chéng-chí lak tī lō͘-piⁿ, chiáu-á pe--lâi, kā in chia̍h-liáu-liáu.

⁵ Ū-ê lak tī chio̍h-thâu tōe, thô͘ chió ê só͘-chāi, in-ūi thô͘ bô chhim, chin kín chiū puh-gê;

⁶ put-kò ji̍t-thâu chi̍t-ē chhut, kā in pha̍k--tio̍h, in-ūi bô kun chiū ta--khì.

⁷ Ū-ê lak tī chhì-phè lāi, chhì-á tōa-châng--khí-lâi chiū kā in hip--sí.

⁸ Put-kò ū-ê lak tī hó thó͘-tōe, chiū kiat-si̍t; ū-ê chi̍t-pah pē, ū-ê la̍k-cha̍p pē, ū-ê saⁿ-cha̍p pē.

⁹ Ū hī-khang--ê, tio̍h thiaⁿ!”

Phì-jū ê Bo̍k-te̍k
( Khó 4.10-12 ; Lō͘ 8.9-10 )

¹⁰ Bûn-tô͘ lâi mn̄g Iâ-so͘, “Sī-án-chóaⁿ lí tùi kûn-chiòng lóng ēng phì-jū kā in kóng?”

¹¹ Iâ-so͘ ìn kóng, “Thian-kok ê ò-pì í-keng ū hō͘ lín chai, m̄-kú bô hō͘ in chai.

¹² In-ūi ū--ê, beh hō͘ i koh-khah chōe, chōe kàu ū-chhun; bô--ê, liân i só͘-ū--ê mā beh kā i chhiúⁿ--khí-lâi.

¹³ Ūi-tio̍h chit-ê iân-kò͘, góa ēng phì-jū tùi in kóng, in-ūi: In khòaⁿ mā khòaⁿ bô, thiaⁿ mā thiaⁿ bô, koh bōe liáu-kái.

¹⁴ Í-sài-a ê ū-giân tú tī in sin-chiūⁿ èng-giām: Lín thiaⁿ koh thiaⁿ mā bōe liáu-kái; lín khòaⁿ koh khòaⁿ mā bōe khòaⁿ--kìⁿ.

¹⁵ In-ūi chit-ê chú-bîn ê sim í-keng tūn, hī-khang tāng, ba̍k-chiu khoeh. Nā m̄-sī án-ni, in ê ba̍k-chiu ōe khòaⁿ--kìⁿ, hī-khang ōe thiaⁿ--kìⁿ, sim ōe bêng-pe̍k, ōe hôe-sim-tńg-ì, góa chiū kā in i-hó.

¹⁶ “M̄-kú lín chin ū hok-khì, in-ūi lín ba̍k-chiu ū khòaⁿ--kìⁿ, hī-khang ū thiaⁿ--kìⁿ.

¹⁷ Góa si̍t-chāi kā lín kóng, í-chêng ū chin chōe sian-ti kap gī-lâng ài-beh khòaⁿ lín só͘ khòaⁿ--kìⁿ-ê ia̍h bô khòaⁿ--tio̍h, beh thiaⁿ lín só͘ thiaⁿ--kìⁿ-ê ia̍h bô thiaⁿ--tio̍h.”

Iâ-so͘ Kóe-seh Iā Chéng-chí ê Phì-jū
( Khó 4.13-20 ; Lō͘ 8.11-15 )

¹⁸ “Só͘-í, lín tio̍h chù-ì thiaⁿ chit-ê iā chéng-chí ê phì-jū.

¹⁹ Só͘-ū thiaⁿ-tio̍h Thian-kok ê sìn-sit bô bêng-pe̍k--ê, sī chhin-chhiūⁿ iā tī lō͘-piⁿ ê chéng-chí, hit-ê Siâ-ok-chiá lâi, kā iā tī i sim-lāi ê chéng-chí chhiúⁿ--khì.

²⁰ Iā tī chio̍h-thâu tōe--ê, sī chí lâng thiaⁿ-tio̍h sìn-sit, sûi-sî hoaⁿ-hí chiap-siū,

²¹ m̄-kú tī i ê sim-lāi tèng-kun bô chhim, tòng bōe kú, chi̍t-ē ūi-tio̍h sìn-sit tú-tio̍h hoān-lān á-sī pek-hāi, sûi-sî chiū pàng-sak.

²² Iā tī chhì-phè lāi--ê, sī chí lâng thiaⁿ-tio̍h sìn-sit liáu-āu, seng-oa̍h ê khòa-lū kap chîⁿ-châi ê bê-he̍k kā só͘ thiaⁿ--tio̍h ê sìn-sit hip--sí, soah bōe kiat-si̍t.

²³ Iā tī hó thó͘-tōe--ê, sī chí lâng thiaⁿ-tio̍h sìn-sit, ū liáu-kái, chin-chiàⁿ ū kiat-si̍t; ū-ê chi̍t-pah pē, ū-ê la̍k-cha̍p pē, ū-ê saⁿ-cha̍p pē.”

Phōe-á ê Phì-jū

²⁴ Iâ-so͘ koh tùi in kóng chi̍t ê phì-jū: “Thian-kok thang phì-jū chòe ū chi̍t ê lâng iā hó chéng-chí tī ka-kī ê hn̂g--ni̍h.

²⁵ Lâng teh khùn ê sî, tùi-te̍k lâi, chiong phōe-á iā tī be̍h-á ê tiong-kan, chiū lī-khui.

²⁶ Be̍h-á hoat--khí-lâi, chhut-sūi ê sî, phōe-á mā hoat--chhut-lâi.

²⁷ Po̍k-jîn lâi kìⁿ chú-lâng kóng, ‘Thâu-ke, lí kiám m̄-sī iā hó ê chéng-chí tī hn̂g--ni̍h? Ná ōe ū chiah-ê phōe-á?’

²⁸ Chú-lâng ìn kóng, ‘Che sī tùi-te̍k chòe--ê.’ Po̍k-jîn kóng, ‘Án-ni, goán lâi-khì kā hiah-ê phōe-á khau--khí-lâi hó--bô?’

²⁹ Chú-lâng ìn kóng, ‘M̄ thang, lín khau phōe-á ê sî, m̄-tú-hó liân be̍h-á soah khau-khau--khí-lâi.

³⁰ Hō͘ phōe-á kap be̍h-á tâng-chôe tōa-châng, siu-sêng ê sî góa chiah hoan-hù siu-koah ê lâng seng kā phōe-á khau--khí-lâi, khún kui-pé khì sio, jiân-āu kā be̍h-á siu ji̍p-khì góa ê chhng-khò͘.’”

Kòa-chhài-chí ê Phì-jū
( Khó 4.30-32 ; Lō͘ 13.18-19 )

³¹ Iâ-so͘ koh kā in kóng chi̍t ê phì-jū: “Thian-kok chhin-chhiūⁿ chi̍t lia̍p kòa-chhài-chí, lâng kā i the̍h-khì iā tī ka-kī ê hn̂g--ni̍h.

³² Kòa-chhài-chí sī só͘-ū chéng-chí tiong siōng sòe-lia̍p--ê, tōa-châng--khí-lâi, pí só͘-ū ê chhài-soe koh-khah tōa-châng, chiâⁿ-chòe chi̍t châng chhiū, liân khong-tiong ê chiáu-á to lâi tī chhiū-ki chòe siū.”

Kàⁿ-bú ê Phì-jū
( Lō͘ 13.20-21 )

³³ Iâ-so͘ koh kā in kóng chi̍t ê phì-jū: “Thian-kok chhin-chhiūⁿ kàⁿ-bú, ū chi̍t ê hū-jîn-lâng the̍h-khì lām tī saⁿ táu mī-hún chòe-hé chhiau, chòe-āu kui-ê lóng hoat--khí-lâi.”

Iâ-so͘ Ēng Phì-jū Kà-sī
( Khó 4.33-34 )

³⁴ Chiah-ê it-chhè ê kà-sī Iâ-so͘ lóng ēng phì-jū tùi chèng-lâng kóng; I bô ēng pa̍t-khoán ê hong-sek, chí-ū ēng phì-jū tùi in kóng.

³⁵ I án-ni chòe sī beh èng-giām Chú thong-kè sian-ti só͘ kóng ê ōe: Góa beh khui-chhùi kóng phì-jū, kóng chhòng-sè í-lâi ún-ba̍t ê sū.

Kóe-seh Phōe-á ê Phì-jū

³⁶ Iâ-so͘ lī-khui chèng-lâng, ji̍p-khì chhù-lāi. I ê bûn-tô͘ lâi kā I kóng, “Chhiáⁿ kā goán kóe-seh hn̂g--ni̍h ê phōe-á ê phì-jū.”

³⁷ Iâ-so͘ ìn kóng, “Hit-ê iā hó chéng-chí--ê sī Jîn-chú;

³⁸ hn̂g sī sè-kài; hó chéng-chí sī Thian-kok ê kiáⁿ-jî; phōe-á sī hit-ê Siâ-ok-chiá ê kiáⁿ-jî;

³⁹ iā phōe-á hit-ê te̍k-jîn sī Mô͘-kúi; siu-koah sī chí kim-sè ê chiong-kio̍k; siu-koah--ê sī thiⁿ-sài.

⁴⁰ Tī kim-sè ê chiong-kio̍k, pháiⁿ-lâng ōe chhin-chhiūⁿ phōe-á hō͘ lâng khioh kui-pé ēng hé kā in sio.

⁴¹ Jîn-chú ōe chhe I ê thiⁿ-sài lâi, tùi I ê kok-lāi chiong it-chhè hō͘ lâng poa̍h-tó hoān-chōe kap put-hoat ê lâng lóng lia̍h--lâi,

⁴² kā in hiat-lo̍h hé-lô͘, tī hia in ōe thî-khàu, kā-gê-chhiat-chhí.

⁴³ Hit-sî, gī-lâng tī in ê Pē ê Kok-tō͘ ōe chhin-chhiūⁿ ji̍t-thâu hoat-kng. Ū hī-khang--ê, tio̍h thiaⁿ!”

Pó-pòe kap Chin-chu ê Phì-jū

⁴⁴ “Thian-kok chhin-chhiūⁿ pó-pòe chhàng tī hn̂g--ni̍h, ū lâng chhē--tio̍h, kā i khàm--khí-lâi, chin hoaⁿ-hí khì bōe it-chhè só͘ ū--ê lâi bóe hit-khu hn̂g.

⁴⁵ “Thian-kok mā chhin-chhiūⁿ chi̍t ê seng-lí-lâng teh chhē súi ê chin-chu.

⁴⁶ I chi̍t-ē chhē-tio̍h chi̍t lia̍p chin ta̍t-chîⁿ ê chin-chu, chiū khì bōe it-chhè só͘ ū--ê lâi bóe hit-lia̍p chin-chu.”

Pha-bāng ê Phì-jū

⁴⁷ “Thian-kok mā chhin-chhiūⁿ lâng tī ô͘--ni̍h pha-bāng, lia̍h ta̍k-khoán hî;

⁴⁸ bāng móa chiū thoa-chiūⁿ hōaⁿ, chē--lo̍h-lâi, kéng hó--ê khǹg lo̍h-khì tháng-á lāi, bái--ê hiat-ka̍k.

⁴⁹ Kim-sè ê chiong-kio̍k mā chhin-chhiūⁿ án-ni; thiⁿ-sài beh chhut--khì, tùi gī-lâng ê tiong-kan kā pháiⁿ-lâng hun-pia̍t--chhut-lâi,

⁵⁰ hiat-lo̍h hé-lô͘; tī hia in ōe thî-khàu, kā-gê-chhiat-chhí.”

Sin kap Kū ê Kà-sī

⁵¹ Iâ-so͘ mn̄g I ê bûn-tô͘ kóng, “Chiah-ê lín lóng ū bêng-pe̍k bô?” In ìn kóng, “Ū.”

⁵² I chiū kā in kóng, “Só͘-í, ta̍k-ê ha̍k-si̍p Thian-kok tō-lí ê keng-ha̍k-kàu-su, chhin-chhiūⁿ chi̍t ke ê chú-lâng tùi chhng-khò͘ kā sin kap kū ê mi̍h-kiāⁿ lóng poaⁿ--chhut-lâi.”

Iâ-so͘ tī Ná-sat-le̍k Siū Kū-choa̍t
( Khó 6.1-6 ; Lō͘ 4.16-30 )

⁵³ Iâ-so͘ kóng chiah-ê phì-jū liáu-āu lī-khui hia,

⁵⁴ tò-khì ka-kī ê kò͘-hiong. I tī in ê hōe-tn̂g kà-sī lâng, in lóng chin tio̍h-kiaⁿ, kóng, “Chit-ê lâng tùi tó-ūi tit-tio̍h chit-khoán ê tì-hūi kap kiâⁿ sîn-jiah ê khùi-la̍t?

⁵⁵ I kiám m̄-sī hit-ê ba̍k-chhiūⁿ ê kiáⁿ? I ê lāu-bú kiám m̄-sī kiò-chòe Má-lī-a? I ê hiaⁿ-tī kiám m̄-sī Ngá-kok, Iok-sek, Se-bûn, kap Iû-tāi?

⁵⁶ I ê sió-bē kiám m̄-sī lóng kap lán tī chia? Án-ni, chit-ê lâng tùi tó-ūi tit-tio̍h chit-khoán ê tì-hūi kap khùi-la̍t?”

⁵⁷ In soah tùi Iâ-so͘ khí hoán-kám. Iâ-so͘ kā in kóng, “Sian-ti tī ka-kī ê kò͘-hiong ka-kī ê ka-cho̍k í-gōa, it-tēng ōe siū chun-tiōng.”

⁵⁸ In-ūi in m̄ sìn, Iâ-so͘ tī hia bô kiâⁿ chin chōe sîn-jiah.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan