Bìoball air-loidhne

馬太福音 12 - 現代台語譯本羅馬字版

An-hioh-ji̍t ê Būn-tôe
( Khó 2.23-28 ; Lō͘ 6.1-5 )

¹ Kè bô jōa kú, tī An-hioh-ji̍t Iâ-so͘ tùi be̍h-hn̂g keng-kè. I ê bûn-tô͘ pak-tó͘ iau, chiū tiah be̍h-sūi lâi chia̍h.

² Hoat-lī-sài-phài ê lâng khòaⁿ--tio̍h, tùi Iâ-so͘ kóng, “Lí khòaⁿ, lí ê bûn-tô͘ tī An-hioh-ji̍t chòe bōe-ēng-tit chòe ê tāi-chì.”

³ Iâ-so͘ kā in kóng, “Lín kiám m̄-bat tha̍k-tio̍h Tāi-pi̍t kap tè i ê lâng pak-tó͘ iau ê sî só͘ chòe ê tāi-chì?

⁴ I ji̍p-khì Siōng-tè ê tiān chia̍h hiàn-chè ê piáⁿ, chit-khoán piáⁿ chí-ū chè-si chiah thang chia̍h, i kap tè i ê lâng lóng bōe-ēng-tit chia̍h.

⁵ Lēng-gōa, lín kiám bô tha̍k-tio̍h Lu̍t-hoat ê kì-chài, chiū-sī An-hioh-ji̍t chè-si tī Sèng-tiān hoān-tio̍h An-hioh-ji̍t ê kui-kú mā sǹg bô chōe.

⁶ Góa kā lín kóng, tī chia ū chi̍t ê pí Sèng-tiān khah tiōng-iàu--ê.

⁷ Sèng-keng ū kóng, ‘Góa ài lîn-bín, bô ài chè-mi̍h.’ Lín nā liáu-kái chit-kù ōe ê ì-sù, chiū bōe kā bô chōe ê lâng tēng-chōe.

⁸ In-ūi Jîn-chú sī An-hioh-ji̍t ê Chú.”

Iâ-so͘ I-hó Chhiú Khê--khì ê Lâng
( Khó 3.1-6 ; Lō͘ 6.6-11 )

⁹ Iâ-so͘ lī-khui hit só͘-chāi, ji̍p-khì in ê hōe-tn̂g.

¹⁰ Tú-hó ū chi̍t ê chi̍t ki chhiú khê--khì ê lâng tī hia. Ū chi̍t-kóa lâng siūⁿ-beh khòng-kò Iâ-so͘, chiū mn̄g I kóng, “Tī An-hioh-ji̍t i-pīⁿ ū ha̍h Lu̍t-hoat bô?”

¹¹ Iâ-so͘ ìn kóng, “Lín tiong-kan ū lâng ū chi̍t chiah iûⁿ, tú-hó tī An-hioh-ji̍t poa̍h-lo̍h khut-á, i kiám bōe kā i khiú--khí-lâi?

¹² Lâng pí iûⁿ ke jōa-á-ni̍h kùi-tiōng! Só͘-í, tī An-hioh-ji̍t chòe hó-sū ū ha̍h Lu̍t-hoat.”

¹³ Iâ-so͘ chiū kā hit-ê lâng kóng, “Chhiú chhun--chhut-lâi!” Chit-ê lâng chhiú chhun--chhut-lâi, chiū ho̍k-goân, oân-choân hó--khì, kap lēng-gōa hit-ki chhiú kâng-khoán.

¹⁴ Hoat-lī-sài-phài ê lâng chhut--khì, chiū kè-bô͘ beh tùi-hù Iâ-so͘, khòaⁿ beh án-chóaⁿ kā I hāi-sí.

Siōng-tè Kéng-soán ê Po̍k-jîn

¹⁵ Iâ-so͘ chai-iáⁿ in ê kè-bô͘ chiū lī-khui hia; ū chin chōe lâng tè I khì, I chiū i-hó in tiong-kan só͘-ū ê pīⁿ-lâng.

¹⁶ I bēng-lēng in m̄-thang tùi lâng thoân-iông I ê tāi-chì.

¹⁷ Che sī beh èng-giām thong-kè sian-ti Í-sài-a só͘ kóng ê ōe:

¹⁸ Lín khòaⁿ, góa só͘ kéng-soán ê po̍k-jîn, góa só͘ thiàⁿ, só͘ ì-ài--ê. Góa beh sù góa ê Sîn hō͘ I; I beh tùi bān-bîn soan-kò góa ê kong-gī.

¹⁹ I bōe cheng-piān, bōe soan-jióng; tī koe-lō͘ bô lâng ōe thiaⁿ-tio̍h I ê siaⁿ.

²⁰ Siū-siong ê lô͘-úi, I bōe at-tn̄g; beh hoa ê teng-hé, I bōe pûn-sit, ti̍t-kàu I hō͘ kong-gī tek-sèng.

²¹ Bān-bîn lóng ōe chiong ǹg-bāng kau-thok I.

Iâ-so͘ kap Pia̍t-se-pok
( Khó 3.20-30 ; Lō͘ 11.14-23 ; 12.10 )

²² Hit-sî, ū lâng chhōa chi̍t ê hō͘ kúi hū-sin, sit-bêng koh bōe kóng-ōe ê lâng lâi Iâ-so͘ hia; Iâ-so͘ kā i i-hó, hit-ê bōe kóng-ōe ê lâng chiū ōe kóng-ōe, koh ōe khòaⁿ--kìⁿ.

²³ Kûn-chiòng lóng chin tio̍h-kiaⁿ, kóng, “Chit-ê lâng káⁿ sī Tāi-pi̍t ê Kiáⁿ ho͘hⁿ?”

²⁴ Hoat-lī-sài-phài ê lâng thiaⁿ--tio̍h chiū kóng, “Chit-ê lâng sī khò kúi-ông Pia̍t-se-pok teh kóaⁿ-kúi.”

²⁵ Iâ-so͘ chai-iáⁿ in ê sim-su chiū kā in kóng, “Kok-ka ka-kī hun-cheng, ōe hong-hòe; siâⁿ-chhī á-sī ka-têng ka-kī hun-cheng, khiā bōe tiâu.

²⁶ Sat-tàn nā kóaⁿ Sat-tàn, sī ka-kī hun-cheng, i ê kok beh ná khiā ōe tiâu?

²⁷ Góa nā khò Pia̍t-se-pok kóaⁿ-kúi, lín ê chú-tē sī khò sím-mi̍h-lâng kóaⁿ-kúi? Án-ni, lín ka-kī ê chú-tē ōe kā lín phòaⁿ-chōe.

²⁸ Put-kò góa nā-sī khò Siōng-tè ê Sîn kóaⁿ-kúi, Siōng-tè ê chú-koân chiū í-keng tī lín tiong-kan si̍t-hiān lah.

²⁹ “Lâng án-chóaⁿ chiah ōe-tàng ji̍p-khì ióng-sū ê chhù chhiúⁿ i ê châi-bu̍t, kiám m̄-sī tio̍h seng kā i pa̍k--khí-lâi?

³⁰ “Bô ūi góa--ê chiū-sī hoán-tùi góa; bô kap góa chòe-hé siu-chi̍p--ê chiū-sī teh phah-sòaⁿ.

³¹ Só͘-í, góa kā lín kóng, lâng it-chhè ê chōe kap húi-pòng lóng ōe tit-tio̍h sià-bián, m̄-kú siat-to̍k Sèng Sîn bōe tit-tio̍h sià-bián.

³² Bô-lūn sím-mi̍h-lâng kóng-ōe kong-kek Jîn-chú, ōe tit-tio̍h sià-bián, m̄-kú bô-lūn sím-mi̍h-lâng kóng-ōe kong-kek Sèng Sîn, tī hiān-chāi kap chiong-lâi lóng bōe tit-tio̍h sià-bián.”

Chhiū kap Ké-chí
( Lō͘ 6.43-45 )

³³ “Hó-chhiū kiat hó ké-chí; pháiⁿ-chhiū kiat pháiⁿ ké-chí; tùi só͘ kiat ê ké-chí thang chai chhiū ê hó-pháiⁿ.

³⁴ Lín chiah-ê to̍k-chôa, lín pún-lâi sī pháiⁿ--ê, beh ná ōe kóng hó-ōe? In-ūi lâng sim-lāi chhiong-móa sím-mi̍h, chhùi chiū kóng sím-mi̍h.

³⁵ Hó-lâng tùi só͘ chek-chū ê hó hoat-chhut hó; pháiⁿ-lâng tùi só͘ chek-chū ê pháiⁿ hoat-chhut pháiⁿ.

³⁶ “Góa kā lín kóng, lâng só͘ kóng it-chhè ê êng-á-ōe, tī Sím-phòaⁿ ê Ji̍t ta̍k-kù lóng tio̍h hū-chek.

³⁷ In-ūi Siōng-tè beh ēng lí ê ōe lâi phòaⁿ lí bô-chōe, mā beh ēng lí ê ōe lâi tēng lí ū-chōe.”

Iau-kiû Sîn-jiah
( Khó 8.11-12 ; Lō͘ 11.29-32 )

³⁸ Hit-sî, ū kúi-nā ê keng-ha̍k-kàu-su kap Hoat-lī-sài-phài ê lâng tùi Iâ-so͘ kóng, “Lāu-su, goán ài lí kiâⁿ chi̍t ê sîn-jiah hō͘ goán khòaⁿ.”

³⁹ Iâ-so͘ ìn kóng, “Siâ-ok kan-îm ê sè-tāi iau-kiû sîn-jiah, m̄-kú sian-ti Iok-ná ê sîn-jiah í-gōa, bōe koh ū sîn-jiah hō͘ in.

⁴⁰ Chhin-chhiūⁿ Iok-ná saⁿ mî saⁿ ji̍t tī tōa-hî ê pak-tó͘ lāi, Jîn-chú mā ōe saⁿ mî saⁿ ji̍t tī tōe chhim ê só͘-chāi.

⁴¹ Tī Sím-phòaⁿ ê sî, Nî-nî-bî-lâng ōe kap chit sè-tāi ê lâng chòe-hé khí--lâi, kā chit sè-tāi ê lâng tēng-chōe, in-ūi Nî-nî-bî-lâng thiaⁿ-tio̍h Iok-ná ê thoân-tō liáu-āu lóng ū hóe-kái. Lín khòaⁿ, ū pí Iok-ná koh-khah úi-tāi--ê tī chia!

⁴² Tī Sím-phòaⁿ ê sî, Lâm-hng ê lú-ông ōe kap chit sè-tāi ê lâng chòe-hé khí--lâi, kā chit sè-tāi ê lâng tēng-chōe, in-ūi i ū tùi tōe ê ke̍k-thâu lâi thiaⁿ Só͘-lô-bûn tì-hūi ê ōe. Lín khòaⁿ, ū pí Só͘-lô-bûn koh-khah úi-tāi--ê tī chia!”

Siâ-sîn Tò-tńg--khì
( Lō͘ 11.24-26 )

⁴³ “Siâ-sîn lī-khui só͘ hū-sin ê lâng liáu-āu, tī bô-chúi ê tōe-khu kiâⁿ-thàu-thàu, beh chhē chi̍t ê hioh-khùn ê só͘-chāi, chhē lóng bô,

⁴⁴ chiū kóng, ‘Góa beh tńg-lâi-khì góa chhut--lâi hit-keng chhù.’ I tńg--khì, khòaⁿ-tio̍h chhù khang-khang, sàu kah chin chheng-khì, koh chéng-lí hó-sè.

⁴⁵ Āu-lâi, i khì chhōa chhit ê pí i khah pháiⁿ ê siâ-sîn kap i chòe-hé lâi, ji̍p-khì hia tòa. Án-ni, hit-ê lâng ê kiat-kio̍k pí khí-thâu koh-khah chhám. Chit-ê siâ-ok ê sè-tāi mā ōe chhin-chhiūⁿ án-ni.”

Iâ-so͘ ê Lāu-bú kap Hiaⁿ-tī
( Khó 3.31-35 ; Lō͘ 8.19-21 )

⁴⁶ Iâ-so͘ iáu-teh tùi chèng-lâng kóng-ōe ê sî, I ê lāu-bú kap hiaⁿ-tī lâi khiā tī gōa-bīn, ài-beh kap I kóng-ōe.

⁴⁷ Ū lâng kā Iâ-so͘ kóng, “Lí khòaⁿ, lí ê lāu-bú kap hiaⁿ-tī khiā tī gōa-bīn, ài-beh kap lí kóng-ōe.”

⁴⁸ Iâ-so͘ kā hit-ê lâng kóng, “Sím-mi̍h-lâng sī góa ê lāu-bú? Sím-mi̍h-lâng sī góa ê hiaⁿ-tī?”

⁴⁹ Jiân-āu I chhun-chhiú kí I ê bûn-tô͘ kóng, “Lín khòaⁿ, góa ê lāu-bú, góa ê hiaⁿ-tī!

⁵⁰ Si̍t-hêng góa Thiⁿ-pē chí-ì ê lâng chiū-sī góa ê hiaⁿ-tī, chí-bē, kap lāu-bú.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan