Bìoball air-loidhne

馬太福音 10 - 現代台語譯本羅馬字版

Iâ-so͘ Siat-li̍p Cha̍p-jī Sù-tô͘
( Khó 3.13-19 ; Lō͘ 6.12-16 )

¹ Iâ-so͘ tiàu-chi̍p I cha̍p-jī ê bûn-tô͘ lâi, hō͘ in ū koân-pèng thang kóaⁿ siâ-sîn, i-tī ta̍k-khoán ê chèng-thâu kap pīⁿ-thiàⁿ.

² Chit cha̍p-jī sù-tô͘ ê miâ chiū-sī chiah-ê: Tē-it sī Se-bûn, mā kiò-chòe Pí-tek, kap i ê sió-tī An-tek-lia̍t; Se-pì-thài ê kiáⁿ Ngá-kok kap i ê sió-tī Iok-hān;

³ Hui-le̍k kap Pa-to-lô-mái; To-má kap ba̍uh-sè ê Má-thài; Ta̍t-thài kap A-le̍k-hui ê kiáⁿ Ngá-kok;

⁴ Kek-chìn-tóng ê Se-bûn kap chhut-bōe Iâ-so͘ hit-ê Í-su-ka-lio̍k ê Iû-tāi.

Cha̍p-jī Sù-tô͘ ê Sú-bēng
( Khó 6.7-13 ; Lō͘ 9.1-6 )

⁵ Iâ-so͘ chhe chit cha̍p-jī sù-tô͘ chhut--khì, hoan-hù in kóng, “Lín m̄-thang khì Gōa-pang-lâng ê tōe-khu; m̄-thang chìn-ji̍p Sat-má-lī-a-lâng ê siâⁿ,

⁶ chí-ū tio̍h khì chhē Í-sek-lia̍t-ke sit-bê ê iûⁿ.

⁷ Lín khì ê sî tio̍h soan-iông kóng, ‘Thian-kok teh-beh si̍t-hiān lah!’

⁸ Lín tio̍h i-hó phòa-pīⁿ ê lâng, hō͘ sí-lâng koh-oa̍h, hō͘ bâ-hong pīⁿ-lâng chheng-khì, koh kóaⁿ-chhut siâ-sîn. Lín pe̍h-pe̍h tit--tio̍h, mā tio̍h pe̍h-pe̍h hō͘ lâng.

⁹ Io-tòa lāi-bīn m̄-bián tòa kim-pè, gûn-pè, á-sī tâng-pè;

¹⁰ chhut-mn̂g m̄-bián tòa lú-hêng-tē á-sī nn̄g niá lāi-saⁿ, mā m̄-bián tòa liâng-ôe á-sī gia̍h koáiⁿ-á; in-ūi kang-lâng tit-tio̍h chia̍h-mi̍h sī eng-kai.

¹¹ “Lín bô-lūn ji̍p-khì tó chi̍t ê siâⁿ tó chi̍t ê chng-siā, tio̍h thàm-thiaⁿ khòaⁿ sím-mi̍h-lâng goān-ì chiap-thāi lín, chiah khì tòa hia, tòa kàu lī-khui.

¹² Lín ji̍p-khì chhù-lāi ê sî, tio̍h kā in chhéng-an.

¹³ Chit-ke ê lâng nā goān-ì chiap-thāi lín, tio̍h chiong lín ê pêng-an hō͘ in; nā bô goān-ì chiap-thāi lín, tio̍h chiong pêng-an siu-hôe.

¹⁴ M̄ chiap-thāi lín, m̄ thiaⁿ lín ê ōe ê lâng, lín lī-khui hit-keng chhù á-sī hit-ê siâⁿ ê sî, tio̍h chiong lín kha--ni̍h ê thô͘-hún pōaⁿ hō͘ i chheng-khì.

¹⁵ Góa si̍t-chāi kā lín kóng, tī Sím-phòaⁿ ê Ji̍t, Só͘-to-má kap Gô-mô͘-la tōe-khu só͘ siū ê hêng-hoa̍t ōe pí hit-ê siâⁿ só͘ siū--ê koh-khah hó jím-siū.”

Teh-beh Lâi ê Pek-hāi
( Khó 13.9-13 ; Lō͘ 21.12-19 )

¹⁶ “Tio̍h chai, góa chhe lín chhut--khì, chhin-chhiūⁿ sàng iûⁿ ji̍p-khì chhâi-lông ê tiong-kan. Só͘-í, tio̍h chhin-chhiūⁿ chôa hiah-ni̍h lêng-khiáu, chhin-chhiūⁿ hún-chiáu hiah-ni̍h sûn-liông.

¹⁷ Lín tio̍h tî-hông, in-ūi ū lâng ōe kā lín lia̍h-khì kau hō͘ gī-hōe, tī in ê hōe-tn̂g ēng piⁿ kā lín phah.

¹⁸ Koh ūi-tio̍h góa ê iân-kò͘, lín ōe hō͘ lâng thoa kàu chóng-tok kap kun-ông ê bīn-chêng, lâi tùi in kap Gōa-pang-lâng chòe kiàn-chèng.

¹⁹ M̄-kú, lín hō͘ lâng lia̍h-khì sím-mn̄g ê sî, m̄-bián hoân-ló beh án-chóaⁿ kóng, á-sī beh kóng sím-mi̍h; hit-sî lín só͘ tio̍h kóng--ê, ōe kā lín chí-sī,

²⁰ in-ūi teh kóng--ê m̄-sī lín ka-kī, sī lín Thiⁿ-pē ê Sîn thong-kè lín teh kóng.

²¹ “Hiaⁿ-tī ōe chhut-bōe hiaⁿ-tī, hō͘ i sí; lāu-pē mā ōe án-ni tùi-thāi kiáⁿ-jî. Kiáⁿ-jî ōe khí-lâi kong-kek pē-bú, kā in hāi-sí.

²² Lín ōe in-ūi góa ê miâ hō͘ chèng-lâng oàn-hūn, m̄-kú jím-nāi kàu chòe-āu--ê ōe tit-tio̍h kiù.

²³ In tī chit-ê siâⁿ pek-hāi lín, tio̍h tô-cháu khì pa̍t-ê siâⁿ. Góa si̍t-chāi kā lín kóng, Í-sek-lia̍t ê siâⁿ-chhī lín kiâⁿ iáu-bē thàu, Jîn-chú chiū lâi!

²⁴ “Ha̍k-seng bōe chhiau-kè lāu-su; po̍k-jîn mā bōe chhiau-kè chú-lâng.

²⁵ Ha̍k-seng tú--tio̍h ê pek-hāi kap lāu-su kâng-khoán, po̍k-jîn tú--tio̍h-ê kap chú-lâng kâng-khoán, án-ni chiū ū-kàu. Lâng to kā chit-ke ê chú-lâng kiò-chòe Pia̍t-se-pok, hô-hòng i ke-lāi ê lâng.”

Lâng Eng-kai Kiaⁿ--ê Sī Siōng-tè
( Lō͘ 12.2-7 )

²⁶ “Só͘-í, m̄-bián kiaⁿ in; in-ūi bô chi̍t hāng am-khàm--ê bōe lō͘-hiān; mā bô chi̍t hāng pì-bi̍t--ê bōe hō͘ lâng chai.

²⁷ Góa tī àm-tiong kā lín kóng--ê, lín tio̍h tī kng-bêng tiong kóng--chhut-lâi; lín tī hī-khang piⁿ thiaⁿ--tio̍h-ê, tio̍h tī chhù-bé-téng soan-pò͘.

²⁸ Ōe hāi-sí seng-khu khiok bōe hāi-sí lêng-hûn--ê, lín m̄-bián kiaⁿ; tian-tò tio̍h kiaⁿ ōe chiong lêng-hûn kap seng-khu hiat-lo̍h tōe-ge̍k húi-bia̍t ê Siōng-tè.

²⁹ Nn̄g chiah chhek-chiáu-á kiám m̄-sī bōe chi̍t kak gûn nā-tiāⁿ? Lín ê Thiⁿ-pē nā bô ún-chún, liân chi̍t chiah to bōe poa̍h-lo̍h tōe.

³⁰ Lín leh, liân lín ê thâu-mn̂g to lóng ū sǹg--kè.

³¹ Só͘-í, m̄-bián kiaⁿ, lín pí kui-kûn chhek-chiáu-á koh-khah kùi-tiōng!”

Kong-khai Soan-jīn Ki-tok
( Lō͘ 12.8-9 )

³² “Só͘-í, tī lâng ê bīn-chêng soan-jīn góa--ê, góa tī góa Thiⁿ-pē ê bīn-chêng mā ōe jīn i.

³³ Tī lâng ê bīn-chêng m̄ jīn góa--ê, góa tī góa Thiⁿ-pē ê bīn-chêng mā m̄ jīn i.”

M̄-sī Hô-pêng, Sī To-kiàm
( Lō͘ 12.51-53 ; 14.26-27 )

³⁴ “M̄-thang siūⁿ-kóng góa lâi sī beh tòa hô-pêng hō͘ tōe-chiūⁿ; góa tòa--lâi-ê m̄-sī hô-pêng, sī to-kiàm.

³⁵ In-ūi góa lâi sī beh hō͘ lâng hun-lia̍t: Lâng tùi-khòng lāu-pē, cha-bó͘-kiáⁿ tùi-khòng lāu-bú, sin-pū tùi-khòng ta-ke.

³⁶ Lâng ê tùi-te̍k sī ka-kī ke-lāi ê lâng.

³⁷ “Thiàⁿ pē-bú iâⁿ-kè thiàⁿ góa--ê, bô chu-keh tè góa; thiàⁿ kiáⁿ á-sī cha-bó͘-kiáⁿ iâⁿ-kè thiàⁿ góa--ê, bô chu-keh tè góa.

³⁸ M̄ giâ ka-kī ê si̍p-jī-kè lâi tè góa--ê, mā bô chu-keh tè góa.

³⁹ Beh tit-tio̍h ka-kī ê sìⁿ-miā--ê, ōe sòng-sit sìⁿ-miā; ūi-tio̍h góa sòng-sit ka-kī ê sìⁿ-miā--ê, ōe tit-tio̍h sìⁿ-miā.”

Pò-siúⁿ
( Khó 9.41 )

⁴⁰ “Chiap-la̍p lín--ê chiū-sī chiap-la̍p góa; chiap-la̍p góa--ê chiū-sī chiap-la̍p chhe góa lâi Hit-ūi.

⁴¹ Chiap-la̍p sian-ti chòe sian-ti--ê, ōe tit-tio̍h sian-ti èng-tit ê pò-siúⁿ; chiap-la̍p gī-lâng chòe gī-lâng--ê, ōe tit-tio̍h gī-lâng èng-tit ê pò-siúⁿ.

⁴² Góa si̍t-chāi kā lín kóng, bô-lūn sím-mi̍h-lâng, kan-ta the̍h chi̍t poe léng-chúi hō͘ chiah-ê siōng bî-sòe ê chi̍t ê lim, in-ūi siōng bî-sòe--ê sī góa ê bûn-tô͘, chit-ê lâng it-tēng ōe tit-tio̍h pò-siúⁿ.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan