馬太福音 1 - 現代台語譯本羅馬字版

Iâ-so͘ Ki-tok ê Ka-phó͘
( Lō͘ 3.23-38 )

¹ Che sī Iâ-so͘ Ki-tok ê ka-phó͘: Iâ-so͘ sī Tāi-pi̍t ê hō͘-tāi, Tāi-pi̍t sī A-pek-la-hán ê hō͘-tāi.

² A-pek-la-hán siⁿ Í-sat, Í-sat siⁿ Ngá-kok, Ngá-kok siⁿ Iû-tāi kap i ê hiaⁿ-tī.

³ Iû-tāi tùi Tha-má siⁿ Hoat-le̍k-su kap Siā-la, Hoat-le̍k-su siⁿ Hi-su-lûn, Hi-su-lûn siⁿ A-lân,

⁴ A-lân siⁿ A-bí-ná-ta̍t, A-bí-ná-ta̍t siⁿ Ná-sūn, Ná-sūn siⁿ Sat-bûn,

⁵ Sat-bûn tùi Lat-ha̍p siⁿ Pho-a-su, Pho-a-su tùi Lō͘-tek siⁿ Gô-pī-tek, Gô-pī-tek siⁿ Iâ-se,

⁶ Iâ-se siⁿ Tāi-pi̍t-ông. Tāi-pi̍t tùi O͘-lī-a ê bó͘ siⁿ Só͘-lô-bûn,

⁷ Só͘-lô-bûn siⁿ Lô-pho-an, Lô-pho-an siⁿ A-pí-ngá, A-pí-ngá siⁿ A-sat,

⁸ A-sat siⁿ Iok-sa-hoat, Iok-sa-hoat siⁿ Iok-lân, Iok-lân siⁿ O͘-se-a,

⁹ O͘-se-a siⁿ Iok-thán, Iok-thán siⁿ A-hap-su, A-hap-su siⁿ Hi-se-ka,

¹⁰ Hi-se-ka siⁿ Má-ná-se, Má-ná-se siⁿ A-mô͘-sū, A-mô͘-sū siⁿ Iok-se-a.

¹¹ Í-sek-lia̍t-lâng siū chhian-sóa khì Pa-pí-lûn ê sî, Iok-se-a siⁿ Iok-ngá-kun kap i ê hiaⁿ-tī.

¹² Siū chhian-sóa khì Pa-pí-lûn í-āu, Iok-ngá-kun siⁿ Sat-lia̍p-thiat, Sat-lia̍p-thiat siⁿ Só͘-lô-pa-pek,

¹³ Só͘-lô-pa-pek siⁿ A-pí-gio̍k, A-pí-gio̍k siⁿ Í-lī-a-kèng, Í-lī-a-kèng siⁿ A-só͘,

¹⁴ A-só͘ siⁿ Sat-tok, Sat-tok siⁿ A-kim, A-kim siⁿ Í-lu̍t,

¹⁵ Í-lu̍t siⁿ Í-lī-a-sat, Í-lī-a-sat siⁿ Má-tān, Má-tān siⁿ Ngá-kok,

¹⁶ Ngá-kok siⁿ Iok-sek, Iok-sek sī Má-lī-a ê tiōng-hu; hit-ê chheng-chòe Ki-tok ê Iâ-so͘ sī tùi chit-ê Má-lī-a siⁿ--ê.

¹⁷ Án-ni, tùi A-pek-la-hán kàu Tāi-pi̍t lóng-chóng ū cha̍p-sì tāi, tùi Tāi-pi̍t kàu siū chhian-sóa khì Pa-pí-lûn ū cha̍p-sì tāi, tùi siū chhian-sóa khì Pa-pí-lûn kàu Ki-tok mā ū cha̍p-sì tāi.

Iâ-so͘ Ki-tok ê Chhut-sì
( Lō͘ 2.1-7 )

¹⁸ Iâ-so͘ Ki-tok chhut-sì ê keng-kè sī án-ni: I ê lāu-bú Má-lī-a í-keng kap Iok-sek tēng-hun, iáu-bē kiat-hun chiū tùi Sèng Sîn hoâi-īn.

¹⁹ I ê bī-hun-hu Iok-sek sī chèng-ti̍t ê lâng, bô ài hō͘ i tī lâng ê bīn-chêng kiàn-siàu, siūⁿ-beh àm-tiong kái-tû hun-iok.

²⁰ I teh siūⁿ chit-ê tāi-chì ê sî, tī bîn-bāng tiong, Chú ê thiⁿ-sài tùi i chhut-hiān, kóng, “Tāi-pi̍t ê hō͘-tāi Iok-sek, m̄-bián kiaⁿ, tio̍h chhōa Má-lī-a ji̍p-mn̂g chòe bó͘, in-ūi i só͘ hoâi-īn ê thai sī tùi Sèng Sîn lâi--ê.

²¹ I ōe siⁿ chi̍t ê ta-po͘-kiáⁿ, lí tio̍h kā I hō-miâ kiò-chòe Iâ-so͘, in-ūi I beh kiù I ê chú-bîn thoat-lī in ê chōe.”

²² Che it-chhè ê sū hoat-seng sī beh èng-giām Chú thok sian-ti só͘ kóng ê ōe:

²³ Lí khòaⁿ, chāi-sek-lú ōe hoâi-īn siⁿ-kiáⁿ, I ê miâ beh kiò-chòe Í-má-lōe-lī. “Í-má-lōe-lī” ê ì-sù sī “Siōng-tè kap lán tông-chāi”.

²⁴ Iok-sek chi̍t-ē khùn-chhíⁿ, chiū chiàu Chú ê thiⁿ-sài só͘ hoan-hù chhōa Má-lī-a ji̍p-mn̂g chòe bó͘,

²⁵ put-kò chit-ê ta-po͘-kiáⁿ iáu-bē chhut-sì í-chêng bô kap Má-lī-a tâng-pâng. Eⁿ-á chhut-sì, Iok-sek chiū kā I hō-miâ kiò-chòe Iâ-so͘.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan