Bìoball air-loidhne

歷代志下卷 7 - 現代台語譯本羅馬字版

Hōng-hiàn Sèng-tiān
( 1 Ông 8.62-66 )

¹ Só͘-lô-bûn kî-tó soah, chiū ū hé tùi thiⁿ kàng-lo̍h, chiong sio-hòa-chè kap só͘-ū ê chè-mi̍h lóng sio-chīn; Siōng Chú ê êng-kng chhiong-móa sèng-tiān.

² In-ūi Siōng Chú ê êng-kng chhiong-móa Siōng Chú ê tiān, só͘-í chè-si bōe-tàng ji̍p--khì.

³ Í-sek-lia̍t chèng-lâng khòaⁿ-tio̍h hé kàng-lo̍h, koh Siōng Chú ê êng-kng tà tī sèng-tiān téng-bīn, chiū tī pho͘-chio̍h ê só͘-chāi phak lo̍h-khì kèng-pài, kám-siā Siōng Chú, kóng: Siōng Chú chì-siān, I ê chû-ài sòa kàu éng-oán.

⁴ Ông kap choân-thé jîn-bîn tī Siōng Chú ê bīn-chêng hiàn-chè.

⁵ Só͘-lô-bûn-ông hiàn gû nn̄g-bān nn̄g-chheng chiah, iûⁿ cha̍p-jī-bān chiah chòe chè; án-ni, ông kap choân-thé jîn-bîn ūi-tio̍h Siōng-tè ê tiān kú-hêng hōng-hiàn-lé.

⁶ Chè-si chiàu in ka-kī ê chit-bū khiā-teh sū-hōng; Lī-bī-lâng the̍h í-chêng Tāi-pi̍t-ông só͘ chō ê ga̍k-khì, chhiùⁿ Tāi-pi̍t só͘ choh ê si, chheng-chàn Siōng Chú kóng, “I ê chû-ài sòa kàu éng-oán.” Chè-si tī Lī-bī-lâng ê tùi-bīn pûn lat-pah; só͘-ū ê Í-sek-lia̍t-lâng lóng khiā--teh.

⁷ Só͘-lô-bûn in-ūi i só͘ chō ê tâng-tôaⁿ siuⁿ sòe, bô-kàu thang tī hia hiàn sio-hòa-chè, sò͘-chè, kap pêng-an-chè ê iû, chiū chiong Siōng Chú tiān-chêng ê tiâⁿ tiong-ng ê só͘-chāi hun-pia̍t-choh-sèng, tī hia hiàn sio-hòa-chè, kap pêng-an-chè ê iû.

⁸ Hit-sî, Só͘-lô-bûn kap Í-sek-lia̍t jîn-bîn chòe-hé siú-choeh chhit ji̍t; Í-sek-lia̍t jîn-bîn tùi Hap-má ài-kháu kàu Ai-ki̍p ê khoe-kok lâi chham-ka, chiâⁿ-chòe sēng-hóng ê tāi-hōe.

⁹ Kàu tē-poeh ji̍t in kú-hêng giâm-siok-hōe; in siú chè-tôaⁿ ê hōng-hiàn-lé chhit ji̍t, koh siú-choeh chhit ji̍t.

¹⁰ Chhit-ge̍h jī-cha̍p-saⁿ ji̍t, ông kā jîn-bîn kái-sàn, hō͘ in tò-khì in tau. Jîn-bîn in-ūi Siōng Chú tùi Tāi-pi̍t, Só͘-lô-bûn, kap I ê chú-bîn Í-sek-lia̍t só͘ siúⁿ-sù ê un-hūi, sim-lāi hoaⁿ-hí khoài-lo̍k.

Siōng-tè koh tùi Só͘-lô-bûn Hián-hiān
( 1 Ông 9.1-9 )

¹¹ Só͘-lô-bûn oân-sêng Siōng Chú sèng-tiān kap ông-kiong ê kang-thêng; i sūn-lī oân-sêng sim-lāi só͘ kè-ōe it-chhè ê kiàn-tio̍k.

¹² Mî--sî Siōng Chú tùi Só͘-lô-bûn hián-hiān, tùi i kóng, “Góa ū thiaⁿ-tio̍h lí ê kî-tó, mā kéng chit só͘-chāi chòe ǹg góa hiàn-chè ê sèng-tiān.

¹³ Góa nā kā thiⁿ koaiⁿ-ba̍t bô lo̍h-hō͘, á-sī bēng-lēng chháu-meh chia̍h lông-chok-bu̍t, á-sī kàng un-e̍k tī góa chú-bîn ê tiong-kan,

¹⁴ góa ê chú-bîn nā khiam-pi, kî-tó, hóe-kái, lī-khui in ê pháiⁿ hêng-ûi, góa chiū beh tùi thiⁿ-téng thiaⁿ in ê kî-tó, sià-bián in ê chōe, hō͘ thó͘-tōe koh-chài seng-sán.

¹⁵ Góa ê ba̍k-chiu beh khòaⁿ, hī-khang beh thiaⁿ tī chit só͘-chāi só͘ hiàn ê kî-tó.

¹⁶ Hiān-chāi góa í-keng kéng chit-ê tiān, kā i hun-pia̍t-choh-sèng, chòe góa éng-oán lîm-chāi ê só͘-chāi; góa ê ba̍k-chiu, góa ê sim mā beh éng-oán tī chia.

¹⁷ Lí tī góa bīn-chêng ê kiâⁿ-chòe, nā chhin-chhiūⁿ lí ê lāu-pē Tāi-pi̍t, chun-thàn góa ê kài-bēng, chip-siú góa ê kui-lē kap bēng-lēng,

¹⁸ Góa chiū beh kian-kò͘ lí ê ông-ūi, chiàu góa kap lí ê lāu-pē Tāi-pi̍t só͘ li̍p ê iok, kóng, ‘Lí ê hō͘-tāi ōe éng-oán thóng-tī Í-sek-lia̍t.’

¹⁹ “Lín nā oa̍t-cháu, khì-sak góa pan-pò͘ hō͘ lín ê kui-lē kap kài-bēng, khì ho̍k-sāi kèng-pài pa̍t-ê sîn-bêng,

²⁰ góa chiū beh chiong Í-sek-lia̍t-lâng tùi góa siúⁿ-sù in ê tōe kā in pu̍ih--chhut-lâi, mā beh khì-sak chit-keng hun-pia̍t-choh-sèng ēng lâi kèng-pài góa ê tiān, hō͘ i tī bān-kok tiong chòe chhiàu-tâm, siū lâng thí-chhiò.

²¹ “Chit-keng sèng-tiān sui-jiân siū lâng chun-chông, kàu hit-sî, keng-kè ê lâng ōe tio̍h-kiaⁿ, kóng, ‘Siōng Chú ná ōe án-ni tùi-thāi chit-ê tōe kap chit-keng tiān?’

²² Ū lâng ōe ìn kóng, ‘Sī in-ūi in khì-sak chhōa in chhut Ai-ki̍p-tōe ê Siōng Chú — in lia̍t-chó͘ ê Siōng-tè, khì sìn-hōng pa̍t-ê sîn-bêng, kèng-pài ho̍k-sāi in, só͘-í Siōng Chú hō͘ chiah-ê it-chhè ê chai-hō lîm-kàu in.’”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan