歷代志下卷 6 - 現代台語譯本羅馬字版

Só͘-lô-bûn tùi Jîn-bîn Kóng-ōe
( 1 Ông 8.12-21 )

¹ Hit-sî Só͘-lô-bûn kóng, “Siōng Chú bat kóng, I beh tiàm tī ba̍t-hûn ê só͘-chāi.

² Góa í-keng khí chi̍t keng tông-hông ê tiān, chòe lí éng-oán khiā-khí ê só͘-chāi.”

³ Í-sek-lia̍t hōe-chiòng lóng khiā--teh, Só͘-lô-bûn-ông oa̍t kè-lâi kā in chiok-hok.

⁴ I kóng, “Siōng Chú — Í-sek-lia̍t ê Siōng-tè eng-kai tit-tio̍h o-ló! I chhin-chhùi tùi góa ê lāu-pē Tāi-pi̍t èng-ún--ê, lóng chhin-chhiú si̍t-hiān.

⁵ Siōng Chú ū kóng, ‘Tùi góa chhōa góa ê chú-bîn chhut Ai-ki̍p í-lâi, góa m̄-bat tī Í-sek-lia̍t chèng chi-cho̍k tiong-kan kéng chi̍t ê siâⁿ ūi góa ê miâ khí sèng-tiān, mā m̄-bat soán-li̍p lâng chòe góa ê chú-bîn Í-sek-lia̍t ê léng-siù;

⁶ m̄-kú góa ū kéng Iâ-lō͘-sat-léng chòe góa beh lîm-chāi ê só͘-chāi, koh kéng Tāi-pi̍t tī-lí góa ê chú-bîn Í-sek-lia̍t.’

⁷ Góa ê lāu-pē Tāi-pi̍t sim-lāi ū ì-sù beh ūi Siōng Chú — Í-sek-lia̍t ê Siōng-tè ê miâ khí sèng-tiān.

⁸ Chóng-sī Siōng Chú tùi góa ê lāu-pē Tāi-pi̍t kóng, ‘Lí ū ì-sù beh ūi góa ê miâ khí sèng-tiān, lí chit-ê sim-ì chin hó;

⁹ m̄-kú lí m̄-thang khí, lí chhin-siⁿ ê kiáⁿ ōe ūi góa ê miâ khí sèng-tiān.’

¹⁰ “Taⁿ Siōng Chú si̍t-hiān I só͘ kóng ê ōe; góa chiàu Siōng Chú ê ōe khí-lâi sòa-chiap góa ê lāu-pē Tāi-pi̍t chē Í-sek-lia̍t ê ông-ūi, koh ūi Siōng Chú — Í-sek-lia̍t Siōng-tè ê miâ khí sèng-tiān.

¹¹ Góa chiong iok-kūi an-tì tī hia; kūi-lāi ū Siōng Chú kap Í-sek-lia̍t-lâng só͘ li̍p ê iok.”

Só͘-lô-bûn ê Kî-tó
( 1 Ông 8.22-53 ; Si 132.8-9 )

¹² Só͘-lô-bûn tng Í-sek-lia̍t hōe-chiòng ê bīn-chêng, khiā tī Siōng Chú ê chè-tôaⁿ chêng, siang-chhiú gia̍h--khí-lâi.

¹³ Só͘-lô-bûn ū chō chi̍t ê tâng-tâi, tn̂g nn̄g kong-chhioh jī-cha̍p kong-hun, khoah nn̄g kong-chhioh jī-cha̍p kong-hun, koân chi̍t kong-chhioh saⁿ-cha̍p kong-hun, hē tī tiâⁿ ê tiong-ng; i khiā tī tâi-téng, tī Í-sek-lia̍t hōe-chiòng bīn-chêng kūi--lo̍h-khì, gia̍h siang-chhiú ǹg thiⁿ,

¹⁴ kóng, “Siōng Chú — Í-sek-lia̍t ê Siōng-tè, thiⁿ-téng tōe-ē bô chi̍t ê sîn-bêng chhin-chhiūⁿ lí; lí tùi hiah-ê it-sim-it-ì sūn-ho̍k lí ê po̍k-jîn siú-iok si chû-ài.

¹⁵ Lí ū chip-siú tùi lí ê po̍k-jîn góa ê lāu-pē Tāi-pi̍t ê èng-ún; lí chhin-chhùi èng-ún--ê, kin-á-ji̍t lóng chhin-chhiú si̍t-hiān.

¹⁶ Siōng Chú — Í-sek-lia̍t ê Siōng-tè, kiû lí si̍t-hiān tùi lí ê po̍k-jîn góa ê lāu-pē Tāi-pi̍t ê èng-ún; lí ū kóng, ‘Lí ê kiáⁿ-sun nā chhin-chhiūⁿ lí tī góa ê bīn-chêng kín-sīn seng-oa̍h, chun-hêng góa ê lu̍t-hoat, lí ê hō͘-tāi chiū ōe éng-oán chē Í-sek-lia̍t ê ông-ūi.’

¹⁷ Siōng Chú — Í-sek-lia̍t ê Siōng-tè, lí tùi lí ê po̍k-jîn Tāi-pi̍t só͘ kóng--ê, kiû lí si̍t-hiān.

¹⁸ “Siōng-tè ah, lí kiám chin-chiàⁿ beh kap sè-kan-lâng tòa tī tōe-chiūⁿ? Thiⁿ kap thiⁿ-téng ê thiⁿ to bô-kàu thang hō͘ lí tòa, hô-hòng góa só͘ khí chit-keng sèng-tiān?

¹⁹ Siōng Chú — góa ê Siōng-tè, kiû lí àⁿ-lo̍h thiaⁿ lí ê po̍k-jîn ê kî-tó khún-kiû, thiaⁿ lí ê po̍k-jîn tī lí bīn-chêng ê kiû-kiò kî-tó.

²⁰ Goān lí mî-ji̍t khòaⁿ-kò͘ chit-ê sèng-tiān, chiū-sī lí kóng lí beh lîm-chāi ê só͘-chāi. Lí ê po̍k-jîn ǹg chit-ê só͘-chāi kî-tó ê sî, kiû lí thiaⁿ.

²¹ Lí ê po̍k-jîn kap lí ê chú-bîn Í-sek-lia̍t ǹg chit só͘-chāi kî-tó ê sî, goān lí tùi thiⁿ-téng, lí tòa ê só͘-chāi, thiaⁿ goán ê kî-kiû, sià-bián goán.

²² “Lâng nā tek-chōe chhù-piⁿ, siū-pek tio̍h chiù-chōa, i lâi chit-keng tiān tī lí ê tôaⁿ-chêng chiù-chōa i sī bû-ko͘--ê,

²³ kiû lí tùi thiⁿ-téng àⁿ-lo̍h thiaⁿ lâi pān-lí, sím-phòaⁿ lí chiah-ê po̍k-jîn: Pháiⁿ-lâng, chiàu i ê pháiⁿ kā i pò-èng; bû-ko͘--ê, tēng i chòe bô-chōe, chiàu i ê chèng-ti̍t kā i pò-siúⁿ.

²⁴ “Lí ê chú-bîn Í-sek-lia̍t nā tek-chōe lí, hō͘ tùi-te̍k phah-pāi, in nā hoán-hóe kui-ǹg lí, soan-jīn lí ê miâ, koh tī chit-keng sèng-tiān tùi lí kî-tó khún-kiû,

²⁵ kiû lí tùi thiⁿ-téng àⁿ-lo̍h thiaⁿ, sià-bián lí ê chú-bîn Í-sek-lia̍t ê chōe, hō͘ in tò-lâi lí só͘ siúⁿ-sù in kap in lia̍t-chó͘ ê tōe.

²⁶ “In nā tek-chōe lí, lí kā thiⁿ koaiⁿ-ba̍t bô lo̍h-hō͘; lí hêng-hoa̍t in ê sî, in nā ǹg chit só͘-chāi kî-tó, soan-jīn lí ê miâ, lī-khui in ê chōe-ok,

²⁷ kiû lí tùi thiⁿ-téng àⁿ-lo̍h thiaⁿ in ê kî-tó, sià-bián lí ê po̍k-jîn kap lí ê chú-bîn Í-sek-lia̍t ê chōe, kà-sī in kiâⁿ chèng-ti̍t ê lō͘, koh lo̍h-hō͘ tī lí siúⁿ-sù in chòe sán-gia̍p ê tōe.

²⁸ “Chit-ê tōe nā ū ki-hng, un-e̍k, hé-sio-hong, pīⁿ-hāi, chháu-meh, chháu-meh-kong, á-sī tùi-te̍k ûi-khùn in ê siâⁿ, bô-lūn ū sím-mi̍h chai-hō, sím-mi̍h tōa-pīⁿ,

²⁹ lí ê chú-bîn Í-sek-lia̍t tiong nā ū lâng chai ka-kī ê chai-hō khó͘-thàng, ǹg chit-ê sèng-tiān gia̍h-chhiú pek-chhiat khún-kiû,

³⁰ kiû lí tùi thiⁿ-téng, lí khiā-khí ê só͘-chāi, àⁿ-lo̍h thiaⁿ lâi sià-bián in; in-ūi lí chai in ê sim, mā chí-ū lí chai sè-kan-lâng ê sim, goān lí chiàu in ta̍k-ê lâng ê kiâⁿ-chòe tùi-thāi in,

³¹ hō͘ in tī lí siúⁿ-sù goán lia̍t-chó͘ ê tōe, chi̍t-sì-lâng kèng-ùi lí, kiâⁿ lí ê tō-lō͘.

³² “Nā ū gōa-kok-lâng, m̄-sī sio̍k lí ê chú-bîn Í-sek-lia̍t--ê, in-ūi thiaⁿ-tio̍h lí ê tōa-miâ, tōa koân-lêng ê chok-ûi, kap lí kiù-chō͘ ê chhiú-kut, tùi chin hn̄g ê só͘-chāi lâi, ǹg chit-ê tiān kî-tó,

³³ kiû lí tùi thiⁿ-téng, lí khiā-khí ê só͘-chāi, thiaⁿ in ê kî-kiû, chiàu gōa-kok-lâng it-chhè tùi lí khún-kiû--ê lâi chòe, hō͘ thiⁿ-ē bān-bîn lóng ōe chhin-chhiūⁿ lí ê chú-bîn Í-sek-lia̍t siâng-khoán, bat lí ê miâ, kèng-ùi lí; koh hō͘ in chai chit-ê sèng-tiān sī kèng-pài kiû-kiò lí ê só͘-chāi.

³⁴ “Lí ê chú-bîn hōng lí ê bēng-lēng, bô-lūn chhut-khì sím-mi̍h só͘-chāi kap tùi-te̍k kau-chiàn ê sî, nā ǹg lí só͘ kéng-soán ê siâⁿ, kap góa ūi-tio̍h lí ê miâ khí ê tiān tùi lí kî-tó,

³⁵ kiû lí tùi thiⁿ-téng thiaⁿ in ê kî-tó khún-kiû, hō͘ in tek-sèng.

³⁶ “Sè-kan bô chi̍t ê lâng bô hoān-chōe, m̄-kú lí ê chú-bîn nā tek-chōe lí, lí tùi in siū-khì, chiong in kau hō͘ tùi-te̍k, kā in lia̍h-khì gōa-tōe, bô-lūn hn̄g á-sī kūn,

³⁷ in nā tī hō͘ lâng lia̍h--khì ê tōe hôe-sim-tńg-ì, koh tī in siū-lia̍h ê tōe hóe-kái, tùi lí ai-kiû, ‘Goán ū chōe, goán pōe-ge̍k, goán chòe pháiⁿ.’

³⁸ In nā tī tùi-te̍k lia̍h in khì ê tōe, choân-sim choân-ì kui-sūn lí, koh ǹg lí siúⁿ-sù in lia̍t-chó͘ ê tōe, kap lí só͘ kéng-soán ê siâⁿ, í-ki̍p góa hōng lí ê miâ khí ê tiān, tùi lí kî-tó,

³⁹ kiû lí tùi thiⁿ-téng, lí khiā-khí ê só͘-chāi, thiaⁿ in ê kî-tó khún-kiû, chiàu kong-tō tùi-thāi in, koh sià-bián hiah-ê tek-chōe lí ê chú-bîn.

⁴⁰ “Góa ê Siōng-tè ah, taⁿ kiû lí khui ba̍k-chiu khòaⁿ, àⁿ hī-khang thiaⁿ tī chia só͘ hiàn ê kî-tó.

⁴¹ Chú Siōng-tè, kiû lí khí--lâi; lí kap lí ū khùi-la̍t ê iok-kūi chòe-hé ji̍p-khì lí hioh-khùn ê só͘-chāi. Chú Siōng-tè, goān lí ê chè-si ēng kiù-un chòe saⁿ chhēng; goān lí sèng ê chú-bîn in-ūi tit-tio̍h hok-khì hoaⁿ-hí khoài-lo̍k.

⁴² Chú Siōng-tè, kiû lí m̄-thang khì-sak lí boah-iû kéng-soán ê kun-ông; tio̍h tài-liām lí si-lo̍h hō͘ lí ê po̍k-jîn Tāi-pi̍t ê chû-ài.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan