Bìoball air-loidhne

歷代志下卷 4 - 現代台語譯本羅馬字版

Sèng-tiān ê Khì-khū
( 1 Ông 7.23-51 )

¹ Só͘-lô-bûn koh chō chi̍t chō tâng-tôaⁿ, tn̂g káu kong-chhioh, khoah káu kong-chhioh, koân sì kong-chhioh-pòaⁿ.

² Koh chù chi̍t ê îⁿ-hêng ê tâng-hái, chhim nn̄g kong-chhioh jī-cha̍p kong-hun; ti̍t-kèng sì kong-chhioh sì-cha̍p kong-hun, chiu-ûi cha̍p-saⁿ kong-chhioh jī-cha̍p kong-hun.

³ Tâng-hái ê tûn ē-bīn ū nn̄g pâi gû ûi--teh, múi sì-cha̍p-gō͘ kong-hun cha̍p chiah, sī chù tâng-hái ê sî siâng-sî chù--ê.

⁴ Tâng-hái an tī cha̍p-jī chiah tâng-gû ê téng-bīn, saⁿ chiah ǹg pak, saⁿ chiah ǹg sai, saⁿ chiah ǹg lâm, saⁿ chiah ǹg tang; gû-bé ǹg lāi-bīn.

⁵ Tâng-hái ê kāu-tō͘ chhit kong-hun-pòaⁿ; i ê tûn chhin-chhiūⁿ poe ê tûn, hêng chhin-chhiūⁿ pek-ha̍p-hoe; ōe-tàng tóe la̍k-bān kong-seng.

⁶ Koh chō cha̍p ê phûn, gō͘ ê hē tī lâm-pêng, gō͘ ê tī pak-pêng, lāi-bīn thang sóe hiàn sio-hòa-chè ê mi̍h. Tâng-hái kan-ta hō͘ chè-si sóe-tn̄g.

⁷ Koh chiàu kui-tēng ê khoán-sit chō cha̍p ê kim teng-tâi, hē tī tiān-lāi, gō͘ ê tī chiàⁿ-pêng, gō͘ ê tī tò-pêng;

⁸ koh chō cha̍p tè toh hē tī tiān-lāi, gō͘ tè tī chiàⁿ-pêng, gō͘ tè tī tò-pêng; koh chō chi̍t-pah tè kim-óaⁿ.

⁹ Koh chō chè-si-tiâⁿ, mā chō tōa-tiâⁿ, í-ki̍p tōa-tiâⁿ ê mn̂g; mn̂g-sìⁿ ēng tâng pau--teh.

¹⁰ Tâng-hái hē tī sèng-tiān ê tang-lâm-pêng.

¹¹ Hō͘-lân koh chō phûn, thuh-á, kap óaⁿ. Án-ni, Hō͘-lân ūi-tio̍h Só͘-lô-bûn-ông oân-sêng Siōng-tè sèng-tiān it-chhè ê kang.

¹² I só͘ chō--ê ū: Nn̄g ki thiāu, thiāu-téng óaⁿ-hêng ê thiāu-táu, khàm óaⁿ-hêng thiāu-táu ê bāng-á;

¹³ sì-pah lia̍p sia̍h-liû, pun-chòe nn̄g pêng, chi̍t pêng nn̄g pâi, an tī nn̄g niá khàm óaⁿ-hêng thiāu-táu ê bāng-á;

¹⁴ phûn-chō kap chō-téng ê phûn;

¹⁵ chi̍t chō tâng-hái, tâng-hái ē-bīn cha̍p-jī chiah gû;

¹⁶ phûn, thuh-á, kap bah-chhe; í-siōng chiah-ê khì-khū lóng sī sai-hū Hō͘-lân ūi-tio̍h Só͘-lô-bûn-ông khí Siōng Chú sèng-tiān ēng kng-liāng ê tâng chòe--ê.

¹⁷ Chiah-ê khì-khū sī ông tī Iok-tàn pêng-goân, ēng So͘-kat kap Sat-la-tàn tiong-kan ê liâm-thô͘ chòe bô͘ chù-chō--ê.

¹⁸ Só͘-lô-bûn chō ê khì-khū hui-siông chōe, tâng ê tāng-liōng bô hoat-tō͘ kè-sǹg.

¹⁹ Só͘-lô-bûn koh chō Siōng-tè tiān-lāi só͘-ū ê khì-khū: kim-tôaⁿ, pâi hiàn-chè ê piáⁿ ê toh,

²⁰ chhāi tī Chì-sèng-só͘ thâu-chêng, chiàu kui-lē tiám-to̍h ê sûn-kim teng-tâi kap teng;

²¹ sûn-kim chòe ê teng-tâi ê hoe, teng, kap giap-á;

²² sûn-kim chòe ê teng-sim ê chián-to, pôaⁿ, khǹg hiuⁿ ê phiat-á, kap khǹg hé-thòaⁿ ê phûn; koh ū sèng-tiān ê mn̂g, chiū-sī Chì-sèng-só͘ ê mn̂g kap chêng-tiān ê mn̂g, lóng ēng kim pau--teh.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan