歷代志下卷 34 - 現代台語譯本羅馬字版

Iû-tāi-ông Iok-se-a
( 2 Ông 22.1-2 )

¹ Iok-se-a chē-ūi ê sî poeh hè, tī Iâ-lō͘-sat-léng choh-ông saⁿ-cha̍p-it nî.

² I chòe Siōng Chú khòaⁿ-chòe hó ê sū, kiâⁿ i ê chó͘-sian Tāi-pi̍t ê lō͘, bô phian-chó-phian-iū.

Iok-se-a Sàu-tû Ngó͘-siōng Chông-pài

³ Iok-se-a choh-ông tē-poeh nî, iáu siàu-liân chiū chhē-kiû i ê chó͘-sian Tāi-pi̍t ê Siōng-tè; sì nî āu, khai-sí kiat-chēng Iû-tāi kap Iâ-lō͘-sat-léng, sàu-tû soaⁿ-thâu-tôaⁿ, A-sià-la thiāu-siōng, tiau-khek ê siōng, kap chù-chō ê siōng.

⁴ Jîn-bîn chiàu i ê bēng-lēng húi-hoāi Pa-le̍k ê tôaⁿ, chām-tn̄g tôaⁿ-téng koân-koân ê hiuⁿ-tâi; i koh chiong A-sià-la thiāu-siōng, tiau-khek ê siōng, kap chù-chō ê siōng phah-chhùi, géng-chòe hún, iā tī hiah-ê bat hiàn-chè hō͘ ngó͘-siōng ê lâng ê bōng;

⁵ chiong gōa-pang sîn-bêng ê chè-si ê kut-thâu hē tī in ê chè-tôaⁿ téng sio, ēng án-ni kiat-chēng Iû-tāi kap Iâ-lō͘-sat-léng.

⁶ Iok-se-a koh tī Má-ná-se, Í-hoat-liân, Se-biān, kap Ná-hut-tha-lī tōe-khu hiah-ê hong-hòe ê siâⁿ,

⁷ thiah-húi chè-tôaⁿ, phah-chhùi A-sià-la thiāu-siōng kap tiau-khek ê siōng, géng-chòe hún, chām-tn̄g Í-sek-lia̍t ta̍k só͘-chāi ê hiuⁿ-tâi, chiū tò-khì Iâ-lō͘-sat-léng.

Hoat-kiàn Lu̍t-hoat-su
( 2 Ông 22.3-20 )

⁸ Iok-se-a choh-ông tē-cha̍p-poeh nî, thó͘-tōe kap sèng-tiān kiat-chēng liáu-āu, i phài A-sat-lī-ngá ê kiáⁿ Sa-hoan, chhī-tiúⁿ Má-se-ngá, Iok-hap-su ê kiáⁿ sú-koaⁿ Iok-a, khì chéng-siu Siōng Chú — i ê Siōng-tè ê tiān.

⁹ In chiū khì kìⁿ tōa-chè-si Hi-le̍k-ka, chiong só͘-ū hiàn tī Siōng-tè sèng-tiān ê gûn kau hō͘ i; chiah-ê gûn sī sèng-tiān mn̂g-kháu ê siú-ōe Lī-bī-lâng tùi Má-ná-se, Í-hoat-liân, kap Í-sek-lia̍t só͘-ū chhun--lo̍h-lâi ê lâng, í-ki̍p Iû-tāi, Piān-ngá-bín, kap Iâ-lō͘-sat-léng ê jîn-bîn siu--lâi-ê.

^10-11 In chiong hiah-ê gûn kau hō͘ koán-lí Siōng Chú sèng-tiān ê lâng, hō͘ in choán-kau Siōng Chú tiān-lāi ê kang-lâng, chiū-sī choh-ba̍k sai-hū kap kiàn-tio̍k kang-lâng, khì bóe phah-hó ê chio̍h, chòe niû kap thiāu ê bo̍k-châi, thang siu-lí sèng-tiān lāi-bīn hō͘ hiah-ê Iû-tāi-ông sún-hoāi ê só͘-chāi.

¹² Hiah-ê lâng chòe tāi-chì sêng-si̍t; kàm-kang--ê sī Lī-bī-lâng Bí-la-lī ê kiáⁿ-sun Ngá-hap kap Gô-pa-tí-a, tok-kang--ê sī Ko-hat ê kiáⁿ-sun Sat-ka-lī-a kap Bí-su-lân, koh ū chin gâu chàu-ga̍k ê Lī-bī-lâng.

¹³ In koán-lí hiah-ê ūn-poaⁿ ê kang-lâng, mā kàm-tok só͘-ū chòe ta̍k-khoán kang-chok ê lâng; Lī-bī-lâng ū-ê chòe su-kì, chòe koaⁿ-oân, kap siú-ōe.

¹⁴ In chiong hiàn tī Siōng Chú sèng-tiān ê gûn poaⁿ--chhut-khì ê sî, tōa-chè-si Hi-le̍k-ka hoat-kiàn Mô͘-se só͘ thoân Siōng Chú lu̍t-hoat ê chheh.

¹⁵ Hi-le̍k-ka tùi su-kì Sa-hoan kóng, “Góa tī Siōng Chú sèng-tiān lāi-bīn hoat-kiàn chi̍t kńg lu̍t-hoat ê chheh.” Hi-le̍k-ka chiong chheh kau hō͘ Sa-hoan.

¹⁶ Sa-hoan chiū tòa chit-kńg chheh khì ông hia, kā ông pò-kò kóng, “Ông kau-thok lí ê po̍k-jîn ê kang-chok, in lóng ū teh chòe.

¹⁷ Hōng-hiàn tī Siōng Chú sèng-tiān ê gûn lóng piàⁿ--chhut-lâi, kau hō͘ tok-kang kap kang-lâng.”

¹⁸ Su-kì Sa-hoan koh tùi ông kóng, “Tōa-chè-si Hi-le̍k-ka ū the̍h chi̍t kńg chheh hō͘ góa.” Sa-hoan chiū tī ông ê bīn-chêng tōa-siaⁿ tha̍k hit-kńg chheh.

¹⁹ Ông thiaⁿ-tio̍h lu̍t-hoat ê ōe, chiū thiah-li̍h i ê saⁿ.

²⁰ Ông hoan-hù Hi-le̍k-ka, Sa-hoan ê kiáⁿ A-hi-kam, Bí-ka ê kiáⁿ A-pek-tùn, su-kì Sa-hoan, kap ông ê jîn-sîn A-sat-ngá, kóng,

²¹ “Lín khì, ūi góa, ūi Í-sek-lia̍t kap Iû-tāi lâu--lo̍h-lâi ê jîn-bîn, chiong só͘ hoat-kiàn chit-kńg chheh ê ōe chhéng-būn Siōng Chú. In-ūi lán ê chó͘-sian bô chun-siú Siōng Chú ê ōe, bô chiàu chit-kńg chheh só͘ kì-chài ê kà-sī khì chòe, só͘-í Siōng Chú tùi lán hoat tōa siū-khì.”

²² Tùi án-ni, Hi-le̍k-ka kap ông só͘ phài ê lâng chòe-hé khì kìⁿ lú sian-ti Hō͘-le̍k-tāi. I sī koán-lí lé-ho̍k hit-ê Sa-liông ê bó͘; Sa-liông sī Hap-ní-hap-su ê sun, Te̍k-óa ê kiáⁿ. Hō͘-le̍k-tāi tòa tī Iâ-lō͘-sat-léng sin ê siâⁿ-khu. In kā i chhéng-kàu.

²³ I tùi in kóng, “Siōng Chú — Í-sek-lia̍t ê Siōng-tè án-ni kóng, ‘Lín khì hôe-ho̍k chhe lín lâi kìⁿ góa ê lâng, kā i kóng

²⁴ Siōng Chú án-ni kóng: Góa beh chiàu tī Iû-tāi-ông bīn-chêng tha̍k ê chheh só͘ kì-chài ê chiù-chó͘, kàng chai-hō tī chit-ê só͘-chāi kap chia ê chū-bîn.

²⁵ In-ūi in khì-sak góa, kā pa̍t-ê sîn-bêng sio-hiuⁿ, ēng in ê só͘-chòe kek góa siū-khì, só͘-í góa beh chiong tōa siū-khì piàⁿ-lo̍h tī chit-ê só͘-chāi bô-soah.’

²⁶ M̄-kú chhe lín lâi chhéng-būn Siōng Chú ê Iû-tāi-ông, lín tio̍h án-ni tùi i kóng, ‘Siōng Chú — Í-sek-lia̍t ê Siōng-tè án-ni kóng: Lí thiaⁿ-tio̍h

²⁷ góa tùi chit-ê só͘-chāi kap chia ê chū-bîn kéng-kò ê ōe, lí chiū chhàm-hóe, tī Siōng-tè bīn-chêng khiam-pi, koh thiah-li̍h saⁿ, tī góa ê bīn-chêng thî-khàu, góa ū thiaⁿ--tio̍h. Siōng Chú kóng:

²⁸ Góa beh hō͘ lí pêng-an lī-khui sè-kan, tńg-khì lí ê lia̍t-chó͘ hia. Lí bōe khòaⁿ-tio̍h góa só͘ beh kàng-lo̍h tī chit só͘-chāi kap chia ê chū-bîn it-chhè ê chai-hō.’” In chiū tò--khì, chiong chiah-ê ōe tùi ông hôe-ho̍k.

Iok-se-a ê Kái-kek
( 2 Ông 23.1-20 )

²⁹ Iok-se-a-ông phài lâng tiàu-chi̍p Iû-tāi kap Iâ-lō͘-sat-léng ê chèng tiúⁿ-ló.

³⁰ Ông chiūⁿ-khì Siōng Chú ê tiān; Iû-tāi chèng-lâng kap Iâ-lō͘-sat-léng só͘-ū ê chū-bîn, chè-si, Lī-bī-lâng, kap só͘-ū ê jîn-bîn, bô-lūn tōa-sòe, mā lóng chiūⁿ--khì. Ông chiū chiong tī Siōng Chú tiān-lāi hoat-kiàn ê iok-su it-chhè ê ōe tha̍k hō͘ in thiaⁿ.

³¹ Ông khiā tī i ê ūi, tī Siōng Chú ê bīn-chêng li̍p-iok, beh choân-sim choân-ì sūn-thàn Siōng Chú, chun-siú I ê kài-bēng, kà-sī, kap kui-lē, si̍t-hêng chit-kńg chheh só͘ siá li̍p-iok ê ōe.

³² I hō͘ Iâ-lō͘-sat-léng kap Piān-ngá-bín só͘-ū ê jîn-bîn lóng tah-èng chun-siú chit-ê iok; Iâ-lō͘-sat-léng ê chū-bîn chiū chun-hêng in kap in lia̍t-chó͘ ê Siōng-tè só͘ li̍p ê iok.

³³ Iok-se-a chiong kok-lāi it-chhè khó-ò͘ⁿ ê ngó͘-siōng tû--khì, koh hō͘ só͘-ū ê Í-sek-lia̍t-lâng lóng ho̍k-sāi Siōng Chú — in ê Siōng-tè. Iok-se-a oa̍h--teh ê ji̍t, jîn-bîn sūn-thàn Siōng Chú — in lia̍t-chó͘ ê Siōng-tè, lóng bô phian-lī.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan