Bìoball air-loidhne

歷代志下卷 33 - 現代台語譯本羅馬字版

Iû-tāi-ông Má-ná-se
( 2 Ông 21.1-9 )

¹ Má-ná-se chē-ūi ê sî cha̍p-jī hè, tī Iâ-lō͘-sat-léng choh-ông gō͘-cha̍p-gō͘ nî.

² I chòe Siōng Chú khòaⁿ-chòe pháiⁿ ê sū, o̍h hiah-ê hō͘ Siōng Chú tī Í-sek-lia̍t bīn-chêng kóaⁿ-chhut ê lia̍t-kok só͘ chòe khó-ò͘ⁿ ê sū.

³ I tiông-kiàn i ê lāu-pē Hi-se-ka só͘ húi-hoāi ê soaⁿ-thâu-tôaⁿ, ūi Pa-le̍k khí chè-tôaⁿ, chō A-sià-la ê thiāu-siōng, koh kèng-pài ho̍k-sāi thiⁿ-téng ê bān-siōng.

⁴ I tī Siōng Chú ê tiān-lāi ūi-tio̍h hiah-ê sîn-bêng khí kúi-nā ê tôaⁿ; Siōng Chú bat kí chit-ê sèng-tiān, kóng, “Góa ê miâ eng-kai éng-oán tī Iâ-lō͘-sat-léng siū kèng-hōng.”

⁵ Má-ná-se tī Siōng Chú ê tiān nn̄g ê tiâⁿ lāi-bīn, ūi-tio̍h thiⁿ-téng ê bān-siōng khí chè-tôaⁿ.

⁶ I tī Him-lūn-chú Soaⁿ-kok sio i ê kiáⁿ hiàn-chòe chè, pok-kòa, kiâⁿ hoat-su̍t, kiâⁿ siâ-su̍t, mn̄g khan-bông--ê kap tâng-ki toh-thâu, chòe chin chōe Siōng Chú khòaⁿ-chòe pháiⁿ ê sū, kek Siōng Chú siū-khì.

⁷ Má-ná-se koh tī Siōng-tè ê tiān-lāi chhāi tiau-khek ê ngó͘-siōng. Koan-hē chit-keng sèng-tiān, Siōng-tè bat tùi Tāi-pi̍t kap i ê kiáⁿ Só͘-lô-bûn kóng, “Chit-keng sèng-tiān kap Iâ-lō͘-sat-léng, sī góa tī Í-sek-lia̍t chi-cho̍k tiong só͘ kéng-soán--ê, góa ê miâ tio̍h tī chia éng-oán siū kèng-hōng.

⁸ Í-sek-lia̍t-lâng nā thiaⁿ-thàn góa só͘-ū ê bēng-lēng, chiū-sī góa thong-kè Mô͘-se só͘ thoân it-chhè ê kà-sī, kui-lē, kap kài-bēng, góa chiū bô koh hō͘ in tùi góa só͘ siúⁿ-sù in lia̍t-chó͘ ê thó͘-tōe siū chhian-sóa.”

⁹ M̄-kú Má-ná-se chhōa Iû-tāi kap Iâ-lō͘-sat-léng ê chū-bîn chòe pháiⁿ, pí Siōng Chú tī Í-sek-lia̍t-lâng bīn-chêng só͘ húi-bia̍t ê lia̍t-kok koh-khah giâm-tiōng.

Má-ná-se Hóe-kái

¹⁰ Siōng Chú kéng-kài Má-ná-se kap i ê jîn-bîn, m̄-kú in m̄ thiaⁿ.

¹¹ Só͘-í Siōng Chú hō͘ A-su̍t-ông ê kun-tiúⁿ lâi kong-kek in, ēng kau-á kau Má-ná-se, ēng tâng-liān pa̍k i, kā i tòa-khì Pa-pí-lûn.

¹² I tī khùn-khó͘ ê sî chiū khún-kiû Siōng Chú — i ê Siōng-tè, koh tī i lia̍t-chó͘ ê Siōng-tè bīn-chêng hui-siông khiam-pi.

¹³ I kiû-kiò Siōng-tè, Siōng-tè chiū thiaⁿ i ê khún-kiû, hō͘ i tò-lâi Iâ-lō͘-sat-léng, hôe-ho̍k i ê thóng-tī. Má-ná-se chiah chai Siōng Chú sī Siōng-tè.

¹⁴ Āu-lâi, Má-ná-se tī Tāi-pi̍t-siâⁿ ê siâⁿ-gōa, tùi Ki-hùn-chôaⁿ hù-kūn ê soaⁿ-kok, ǹg pak kàu Hî-mn̂g kap Gô-hui-le̍k tōe-khu, khí chin koân ê siâⁿ-chhiûⁿ, koh siat-li̍p kun-tiúⁿ hông-siú Iû-tāi hiah-ê kian-kò͘ ê siâⁿ.

¹⁵ I hòe-tû Siōng Chú sèng-tiān lāi-bīn hiah-ê gōa-cho̍k ê sîn-bêng kap ngó͘-siōng, thiah-húi i tī Siōng Chú sèng-tiān ê soaⁿ kap Iâ-lō͘-sat-léng khí ê tôaⁿ, chiong chiah-ê lóng hiat tī siâⁿ-gōa.

¹⁶ I koh siu-kiàn Siōng Chú ê chè-tôaⁿ, tī tôaⁿ-téng hiàn pêng-an-chè, siā-un-chè, bēng-lēng Iû-tāi-lâng ho̍k-sāi Siōng Chú — Í-sek-lia̍t ê Siōng-tè.

¹⁷ Jîn-bîn iû-goân tī soaⁿ-thâu-tôaⁿ hiàn-chè, m̄-kú chí-ū hiàn hō͘ Siōng Chú — in ê Siōng-tè.

Má-ná-se Sí
( 2 Ông 21.17-18 )

¹⁸ Má-ná-se kî-tha ê sū-chek, i tùi Siōng-tè ê kî-tó, kap sian-kiàn hōng Siōng Chú — Í-sek-lia̍t ê Siōng-tè ê miâ tùi i kéng-kài ê ōe, lóng kì-chài tī Í-sek-lia̍t Lia̍t-ông-sú.

¹⁹ I ê kî-tó, kap Siōng-tè tùi i ê ìn-tap, í-ki̍p i iáu-bē hóe-kái í-chêng ê chōe-kò kè-sit, kap i tī sím-mi̍h só͘-chāi khí soaⁿ-thâu-tôaⁿ, chhāi A-sià-la thiāu-siōng kap ngó͘-siōng, lóng kì-chài tī Hô-sài ê chheh.

²⁰ Má-ná-se tńg-khì i ê lia̍t-chó͘ hia, lâng chiong i an-chòng tī i ka-kī ê kiong-lāi. I ê kiáⁿ A-bûn sòa-chiap i choh-ông.

Iû-tāi-ông A-bûn
( 2 Ông 21.19-26 )

²¹ A-bûn chē-ūi ê sî jī-cha̍p-jī hè, tī Iâ-lō͘-sat-léng choh-ông nn̄g nî.

²² I chòe Siōng Chú khòaⁿ-chòe pháiⁿ ê sū, chhin-chhiūⁿ i ê lāu-pē Má-ná-se só͘ chòe--ê. A-bûn tùi i ê lāu-pē Má-ná-se só͘ chō ê ngó͘-siōng hiàn-chè, koh ho̍k-sāi in.

²³ I bô chhin-chhiūⁿ i ê lāu-pē Má-ná-se tī Siōng Chú ê bīn-chêng ka-kī khiam-pi. Chit-ê A-bûn hoān-chōe jú lâi jú giâm-tiōng.

²⁴ I ê jîn-sîn pōe-poān i, tī ông-kiong lāi-bīn kā i thâi-sí.

²⁵ M̄-kú kok-lāi ê jîn-bîn chiong hiah-ê pōe-poān A-bûn-ông ê lâng thâi-sí, siat-li̍p i ê kiáⁿ Iok-se-a sòa-chiap i choh-ông.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan