Bìoball air-loidhne

歷代志下卷 30 - 現代台語譯本羅馬字版

Chún-pī Siú Pôaⁿ-kè-choeh

¹ Hi-se-ka phài lâng khì Í-sek-lia̍t kap Iû-tāi ta̍k só͘-chāi, koh siá-phoe hō͘ Í-hoat-liân kap Má-ná-se ê lâng, iau-chhiáⁿ in lâi Iâ-lō͘-sat-léng Siōng Chú ê sèng-tiān siú Pôaⁿ-kè-choeh, ho̍k-sāi Siōng Chú — Í-sek-lia̍t ê Siōng-tè.

² In-ūi ông kap i ê koaⁿ-oân, kap tī Iâ-lō͘-sat-léng ê hōe-chiòng, í-keng chham-siông hó, beh tī jī--ge̍h siú Pôaⁿ-kè-choeh.

³ Chiaⁿ--ge̍h in bōe-tàng siú-choeh, in-ūi kiat-chēng ka-kī ê chè-si ê jîn-sò͘ iáu bô kàu-gia̍h, jîn-bîn mā iáu-bē chū-chi̍p tī Iâ-lō͘-sat-léng.

⁴ Ông kap hōe-chiòng lóng chàn-sêng chit-ê kè-ōe,

⁵ chiū tī Í-sek-lia̍t choân-tōe, tùi Pia̍t-sī-pa kàu Tān soan-kò, chhiáⁿ jîn-bîn lóng lâi Iâ-lō͘-sat-léng siú Pôaⁿ-kè-choeh, ho̍k-sāi Siōng Chú — Í-sek-lia̍t ê Siōng-tè; in-ūi kè-khì chiàu só͘ siá ê lu̍t-hoat lâi siú-choeh ê lâng bô hiah-ni̍h chōe.

⁶ Sàng-phoe ê lâng tòa ông kap i hiah-ê koaⁿ-oân ê phoe, khì Í-sek-lia̍t kap Iû-tāi choân-tōe, soan-tho̍k ông ê bēng-lēng, kóng, “Í-sek-lia̍t-lâng, tio̍h kui-ǹg Siōng Chú — A-pek-la-hán, Í-sat, Ngá-kok ê Siōng-tè, I chiū beh choán-ǹg lín, chiū-sī lín chiah-ê thoat-lī A-su̍t chu-ông ê chhiú só͘ chhun ê jîn-bîn.

⁷ Lín m̄-thang chhin-chhiūⁿ lín ê lia̍t-chó͘ kap lín ê tông-pau. Chiàu lín só͘ chai, in tek-chōe Siōng Chú — in lia̍t-chó͘ ê Siōng-tè, tì-kàu I kā in siau-bia̍t.

⁸ Taⁿ m̄-thang chhin-chhiūⁿ lín ê lia̍t-chó͘ ngī-sim kò͘-chip; tio̍h kui-sūn Siōng Chú, chìn-ji̍p I éng-oán hun-pia̍t-choh-sèng ê sèng-tiān, koh tio̍h ho̍k-sāi Siōng Chú — lín ê Siōng-tè, hō͘ I bô koh tùi lín hoat tōa siū-khì.

⁹ Lín nā kui-ǹg Siōng Chú, lín ê tông-pau kap lín ê jî-lú ōe tùi lia̍h in ê lâng tit-tio̍h lîn-bín, koh tò-lâi chit-ê só͘-chāi, in-ūi Siōng Chú — lín ê Siōng-tè sī chû-pi lîn-bín. Lín nā kui-ǹg I, I it-tēng ōe chiap-la̍p lín.”

¹⁰ Sàng-phoe ê lâng chi̍t-siâⁿ kè chi̍t-siâⁿ, kiâⁿ-thàu Í-hoat-liân, Má-ná-se, ti̍t-kàu Se-pò͘-lûn chiah-ê tōe-khu, m̄-kú hiah-ê lâng kā in thí-chhiò, bú-jio̍k.

¹¹ A-siat, Má-ná-se, Se-pò͘-lûn tiong-kan ū chi̍t-kóa lâng ka-kī khiam-pi, lâi kàu Iâ-lō͘-sat-léng.

¹² Siōng-tè mā kám-tōng Iû-tāi-lâng, hō͘ in tâng-sim chi̍t-ì sūn-thàn Siōng Chú ê ōe, chiàu ông kap hiah-ê léng-siù ê bēng-lēng khì chòe.

Siú Pôaⁿ-kè-choeh

¹³ Jī--ge̍h, ū chin chōe lâng chū-chi̍p tī Iâ-lō͘-sat-léng, chiâⁿ-chòe chin tōa ê tāi-hōe, beh siú Tû-kàⁿ-choeh.

¹⁴ In chiong Iâ-lō͘-sat-léng hiàn-chè sio-hiuⁿ ê tôaⁿ lóng sóa-cháu, hiat tī Khip-lûn Khoe-kok.

¹⁵ Jī-ge̍h cha̍p-sì, in thâi Pôaⁿ-kè-choeh ê iûⁿ-ko. Chè-si kap Lī-bī-lâng kám-kak kiàn-siàu chū-chek, chiū kiat-chēng ka-kī, koh tòa sio-hòa-chè lâi Siōng Chú ê tiān.

¹⁶ In chiàu Siōng-tè tiōng-iōng ê lâng Mô͘-se ê lu̍t-hoat ê kui-tēng, ta̍k-ê lâng khiā tī in sū-hōng ê só͘-chāi; chè-si chiong tùi Lī-bī-lâng chiap--kè-lâi ê huih hiù tī chè-tôaⁿ téng.

¹⁷ Hōe-tiong ū chin chōe lâng lé-gî-siōng bô chheng-khì, só͘-í thok Lī-bī-lâng thòe in thâi Pôaⁿ-kè-choeh ê iûⁿ-ko, hō͘ in tī Siōng Chú ê bīn-chêng chiâⁿ-chòe chheng-khì.

¹⁸ Tùi Í-hoat-liân, Má-ná-se, Í-sat-ka, Se-pò͘-lûn tōe-khu lâi ê lâng, ū chin chōe bô chiàu kui-tēng kiat-chēng ka-kī, mā chia̍h Pôaⁿ-kè-choeh ê chè-mi̍h. Hi-se-ka thòe in kî-tó, kóng, “Khún-kiû chì-siān ê Siōng Chú sià-bián

¹⁹ só͘-ū bô chiàu kui-tēng kiat-chēng ka-kī ê lâng, in-ūi in choan-sim chhē-kiû Siōng-tè, chiū-sī Siōng Chú — in lia̍t-chó͘ ê Siōng-tè.”

²⁰ Siōng Chú thiaⁿ Hi-se-ka ê kî-tó, chiū sià-bián jîn-bîn.

²¹ Tòa tī Iâ-lō͘-sat-léng ê Í-sek-lia̍t-lâng hui-siông hoaⁿ-hí, siú Tû-kàⁿ-choeh chhit ji̍t kú; Lī-bī-lâng kap chè-si ta̍k-ji̍t ēng hiáng-liāng ê ga̍k-khì chheng-chàn Siōng Chú.

²² Hi-se-ka kó͘-lē só͘-ū gâu ho̍k-sāi Siōng Chú ê Lī-bī-lâng. Chèng-lâng chia̍h iàn-se̍k chhit ji̍t, hiàn pêng-an-chè, koh kám-siā Siōng Chú — in lia̍t-chó͘ ê Siōng-tè.

Kè-sio̍k Siú-choeh

²³ Tāi-hōe choân-thé hōe-chiòng koat-tēng beh koh siú-choeh chhit ji̍t. In chiū hoaⁿ-hoaⁿ-hí-hí koh khèng-chiok chhit ji̍t.

²⁴ Iû-tāi-ông Hi-se-ka sàng tāi-hōe gû-káng chi̍t-chheng chiah, iûⁿ chhit-chheng chiah; chèng léng-siù mā sàng gû-káng chi̍t-chheng chiah, iûⁿ chi̍t-bān chiah; koh ū chin chōe chè-si kiat-chēng ka-kī.

²⁵ Iû-tāi hōe-chiòng, chè-si, Lī-bī-lâng, kap tùi Í-sek-lia̍t lâi ê hōe-chiòng, í-ki̍p hiah-ê tùi Í-sek-lia̍t-tōe lâi ê gōa-cho̍k-lâng, kap tòa tī Iû-tāi ê gōa-cho̍k-lâng, lóng hoaⁿ-hí khoài-lo̍k.

²⁶ Án-ni, Iâ-lō͘-sat-léng chhiong-móa hoaⁿ-hí khoài-lo̍k, in-ūi tùi Í-sek-lia̍t-ông Tāi-pi̍t ê kiáⁿ Só͘-lô-bûn í-āu, tī Iâ-lō͘-sat-léng m̄-bat chiah-ni̍h hoaⁿ-hí.

²⁷ Chè-si kap Lī-bī-lâng khí-lâi kā jîn-bîn chiok-hok; in ê siaⁿ Siōng-tè ū thiaⁿ--kìⁿ, in ê kî-tó thàu kàu I thiⁿ--ni̍h ê sèng-só͘.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan