Bìoball air-loidhne

歷代志下卷 25 - 現代台語譯本羅馬字版

Iû-tāi-ông A-má-siā
( 2 Ông 14.2-6 )

¹ A-má-siā chē-ūi ê sî jī-cha̍p-gō͘ hè, tī Iâ-lō͘-sat-léng choh-ông jī-cha̍p-káu nî; i ê lāu-bú kiò-chòe Iok-iâ-tān, sī Iâ-lō͘-sat-léng-lâng.

² A-má-siā chòe Siōng Chú khòaⁿ-chòe hó ê sū, m̄-kú sim bô choan-it.

³ I ê ông-koân chi̍t-ē kian-kò͘, chiū chiong thâi-sí i lāu-pē Iû-tāi-ông hiah-ê jîn-sîn chhú-sí.

⁴ M̄-kú i bô thâi-sí hiah-ê jîn-sîn ê kiáⁿ-jî, sī chiàu Mô͘-se lu̍t-hoat ê chheh só͘ kì-chài Siōng Chú ê bēng-lēng: M̄-thang in-ūi kiáⁿ-jî ê só͘-chòe kā lāu-pē chhú-sí, mā m̄-thang in-ūi lāu-pē ê só͘-chòe kā kiáⁿ-jî chhú-sí; ta̍k-ê lâng tio̍h in-ūi ka-kī ê chōe sí.

Kap Í-tong Kau-chiàn
( 2 Ông 14.7 )

⁵ A-má-siā tiàu-chi̍p Iû-tāi jîn-bîn, chiàu chong-cho̍k tī Iû-tāi kap Piān-ngá-bín chi-cho̍k siat-li̍p chhōa chi̍t-chheng lâng á-sī chi̍t-pah lâng ê kun-koaⁿ. I tiám-sǹg jī-cha̍p hè í-siōng te̍k-soán ê peng ū saⁿ-cha̍p-bān lâng; in lóng ōe-tàng gia̍h chhiuⁿ, the̍h tún-pâi chhut-chiàn.

⁶ I koh ēng saⁿ-chheng sì-pah kong-kun ê gûn, tùi pak-kok Í-sek-lia̍t chhiàⁿ cha̍p-bān ê ióng-béng ê chiàn-sū.

⁷ Ū chi̍t ê Siōng-tè tiōng-iōng ê lâng lâi kìⁿ i kóng, “Ông ah, m̄-thang hō͘ Í-sek-lia̍t ê kun-peng kap lí chòe-hé khì; in-ūi Siōng Chú bô kap Í-sek-lia̍t-lâng, chiū-sī Í-hoat-liân ê hō͘-tāi tông-chāi.

⁸ Lí nā it-tēng beh án-ni chòe, bô-lūn lí án-chóaⁿ hùn-ióng chok-chiàn, Siōng-tè mā ōe hō͘ lí thâi-su; in-ūi Siōng-tè ōe-tàng hō͘ lâng iâⁿ, mā ōe-tàng hō͘ lâng su.”

⁹ A-má-siā mn̄g Siōng-tè tiōng-iōng ê lâng kóng, “Góa í-keng ēng saⁿ-chheng sì-pah kong-kun ê gûn hō͘ Í-sek-lia̍t ê kun-tūi, hiah-ê gûn beh án-chóaⁿ?” Siōng-tè tiōng-iōng ê lâng ìn kóng, “Siōng Chú ōe hō͘ lí koh-khah chōe.”

¹⁰ A-má-siā chiū kái-sàn tùi pak-kok Í-sek-lia̍t lâi ê kun-peng, kiò in tò-khì in tau; in tùi Iû-tāi-lâng chin siū-khì, khì-phut-phut tò-khì in tau.

¹¹ A-má-siā kian-kiông--khí-lâi, chhōa i ê kun-peng chhut-khì kàu Iâm ê Soaⁿ-kok, thâi-sí chi̍t-bān ê Í-tong-lâng.

¹² Iû-tāi-lâng koh oa̍h-lia̍h chi̍t-bān lâng, chiong in tòa kàu soaⁿ-khàm téng-bīn, tùi hia kā in chhia--lo̍h-khì, in lóng siak kah chhùi-kut-hun-si.

¹³ Hiah-ê hō͘ A-má-siā kái-sàn ê Í-sek-lia̍t kun-peng, soah kong-kek Sat-má-lī-a kap Pek Hô-lûn tiong-kan ê Iû-tāi siâⁿ-tìn, thâi-sí saⁿ-chheng lâng, koh chhiúⁿ chin chōe mi̍h-kiāⁿ.

¹⁴ A-má-siā thâi-iâⁿ Í-tong-lâng tò--lâi, tòa in ê sîn-siōng, chhāi chòe sîn-bêng, kā in kūi-pài sio-hiuⁿ.

¹⁵ In-ūi án-ni, Siōng Chú tùi A-má-siā hoat tōa siū-khì, chiū chhe chi̍t ê sian-ti khì kìⁿ i, kóng, “Hiah-ê gōa-cho̍k ê sîn-bêng to bōe-tàng kiù in ê jîn-bîn thoat-lī lí ê chhiú, lí sī-án-chóaⁿ kiû-mn̄g in?”

¹⁶ I kap ông kóng-ōe ê sî, ông kā i cha̍h-ōe kóng, “Tiām--khì! Siáⁿ-lâng siat-li̍p lí chòe ông ê chham-bô͘? Lí ài sí o͘h?” Sian-ti chiū tiām--khì, m̄-kú koh kóng, “Góa chai Siōng-tè koat-tēng beh kā lí siau-bia̍t, in-ūi lí chòe chit-ê tāi-chì, koh m̄ thiaⁿ góa ê khoàn-kài.”

Kap Í-sek-lia̍t Kau-chiàn
( 2 Ông 14.8-20 )

¹⁷ Hit-sî, Iû-tāi-ông A-má-siā kap i ê chham-bô͘ chham-siông liáu, phài sù-chiá khì kìⁿ Iâ-hō͘ ê sun, Iok-hap-su ê kiáⁿ, Í-sek-lia̍t-ông Iok-hôa-si, kóng, “Lâi, lán lâi chiàn-tiûⁿ piàⁿ su-iâⁿ.”

¹⁸ Í-sek-lia̍t-ông Iok-hôa-si phài sù-chiá khì kā Iû-tāi-ông A-má-siā kóng, “Lê-pa-lūn ê chháu-chhì chhe sù-chiá khì kìⁿ Lê-pa-lūn ê pek-hiuⁿ-chhiū, kóng, ‘Lí ê cha-bó͘-kiáⁿ hō͘ góa ê kiáⁿ chòe bó͘!’ Āu-lâi Lê-pa-lūn ū chi̍t chiah iá-siù keng-kè, kā chháu-chhì thún-ta̍h.

¹⁹ Lí í-keng thâi-iâⁿ Í-tong, sim chiū kiau-ngō͘ sáng-sè. Lí tiàm lín tau hióng-siū lí ê êng-kng chiū hó, ná beh jiá chai-hō, hō͘ lí pún-sin kap Iû-tāi-kok chòe-hé bia̍t-bông?”

²⁰ M̄-kú A-má-siā thiaⁿ bōe lo̍h--khì; chit-ê tāi-chì sī chhut tī Siōng-tè, beh chiong in kau hō͘ tùi-te̍k, in-ūi in kiû-mn̄g Í-tong ê sîn-bêng.

²¹ Tùi án-ni, Í-sek-lia̍t-ông Iok-hôa-si chiūⁿ--lâi, tī Iû-tāi ê Pek Sī-be̍k kap Iû-tāi-ông A-má-siā kau-chiàn.

²² Iû-tāi hō͘ Í-sek-lia̍t phah-pāi, ta̍k-ê lâng cháu tò-khì in tau.

²³ Í-sek-lia̍t-ông Iok-hôa-si tī hia lia̍h-tio̍h Iû-tāi-ông A-má-siā, i sī Iok-hap-su ê sun, Iok-a-si ê kiáⁿ, kā i tòa kàu Iâ-lō͘-sat-léng, koh thiah-húi Iâ-lō͘-sat-léng ê siâⁿ-chhiûⁿ, tùi Í-hoat-liân-mn̂g kàu Kak-mn̂g, iok nn̄g-pah kong-chhioh.

²⁴ Iok-hôa-si chiong ông-kiong ê châi-pó, kap Gô-pia̍t Í-tong ê hō͘-tāi só͘ kò͘-siú Siōng-tè sèng-tiān ê kim, gûn, khì-khū lóng the̍h--khì, koh lia̍h lâng chòe jîn-chit, chiah tò-khì Sat-má-lī-a.

²⁵ Iok-hap-su ê kiáⁿ Í-sek-lia̍t-ông Iok-hôa-si sí-liáu, Iok-a-si ê kiáⁿ Iû-tāi-ông A-má-siā koh-chài oa̍h cha̍p-gō͘ nî.

²⁶ A-má-siā kî-tha ê sū-chek, tùi thâu kàu bé lóng kì-chài tī Iû-tāi kap Í-sek-lia̍t Lia̍t-ông-sú.

²⁷ Tùi A-má-siā phian-lī bô tè Siōng Chú liáu-āu, tī Iâ-lō͘-sat-léng ū lâng kè-bô͘ beh hāi i, i chiū tô-cháu khì La-kiat. In phài lâng jip kàu La-kiat, tī hia kā i thâi-sí.

²⁸ Lâng ēng bé chài i ê si-thé tò--lâi, chiong i an-chòng tī Iû-tāi ê siâⁿ, lia̍t-chó͘ ê bōng-tōe.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan