Bìoball air-loidhne

歷代志下卷 24 - 現代台語譯本羅馬字版

Iû-tāi-ông Iok-a-si
( 2 Ông 12.1-16 )

¹ Iok-a-si choh-ông ê sî chiah chhit hè, tī Iâ-lō͘-sat-léng choh-ông sì-cha̍p nî; i ê lāu-bú kiò-chòe Se-pí-a, sī Pia̍t-sī-pa-lâng.

² Chè-si Iâ-hô-iâ-tāi oa̍h--teh ê sî, Iok-a-si chòe Siōng Chú khòaⁿ-chòe hó ê sū.

³ Iâ-hô-iâ-tāi kā i chhōa nn̄g ê bó͘, i ū siⁿ hāu-siⁿ cha-bó͘-kiáⁿ.

⁴ Āu-lâi Iok-a-si koat-tēng beh chéng-siu Siōng Chú ê tiān,

⁵ chiū tiàu-chi̍p chè-si kap Lī-bī-lâng, kā in kóng, “Lín tio̍h khì Iû-tāi ta̍k-ê siâⁿ, tùi Í-sek-lia̍t chèng-lâng siu sè-kim, thang ta̍k-nî siu-lí Siōng-tè ê tiān. Lín tio̍h kóaⁿ-kín pān-lí chit-ê sū.” M̄-kú Lī-bī-lâng bô sûi-sî pān-lí.

⁶ Ông tiàu in ê léng-siù Iâ-hô-iâ-tāi lâi, tùi i kóng, “Siōng Chú ê po̍k-jîn Mô͘-se kap Í-sek-lia̍t ê hōe-chiòng, ū ūi-tio̍h iok-kūi ê hōe-bō͘ kui-tēng tio̍h la̍p ê sè, lí sī-án-chóaⁿ lóng bô bēng-lēng Lī-bī-lâng tùi Iû-tāi kap Iâ-lō͘-sat-léng teng-siu?”

⁷ In-ūi hit-ê pháiⁿ hū-jîn-lâng A-tha-lī-ngá kap tè-i--ê bat chhim-ji̍p Siōng-tè ê tiān, koh ēng Siōng Chú tiān-lāi sèng-hòa kui Siōng Chú ê mi̍h hiàn hō͘ Pa-le̍k.

⁸ Ông chiū bēng-lēng lâng chòe chi̍t ê hōng-hiàn-kūi, hē tī Siōng Chú sèng-tiān ê mn̂g-gōa.

⁹ I koh tùi Iû-tāi kap Iâ-lō͘-sat-léng ê jîn-bîn soan-pò͘, tio̍h chiàu Siōng-tè ê po̍k-jîn Mô͘-se tī khòng-iá só͘ kui-tēng tio̍h hiàn ê sè-kim, tòa-lâi hiàn hō͘ Siōng Chú.

¹⁰ Só͘-ū ê siú-léng kap jîn-bîn lóng hoaⁿ-hí tòa-lâi lok tī hōng-hiàn-kūi, kàu tīⁿ--khí-lâi.

¹¹ Lī-bī-lâng khòaⁿ-tio̍h hōng-hiàn-kūi í-keng tīⁿ, chiū tòa-khì hō͘ ông phài ê koaⁿ-oân; ông ê su-kì kap tōa-chè-si ê tāi-piáu chiū lâi, chiong lāi-bīn ê gûn siu--khí-lâi, chiah koh chiong hōng-hiàn-kūi hē tńg-khì goân-ūi. In ta̍k-ji̍t án-ni chòe, siu--tio̍h ê gûn chin chōe.

¹² Ông kap Iâ-hô-iâ-tāi chiong chîⁿ kau hō͘ kàm-tok chéng-siu Siōng Chú sèng-tiān ê lâng; in chiū chhiàⁿ phah-chio̍h, choh-ba̍k, phah-thih, kap phah-tâng ê sai-hū siu-lí Siōng Chú ê sèng-tiān.

¹³ Chòe-kang ê lâng lóng jīn-chin chòe-kang, siu-lí ê kang-thêng chiū sūn-lī oân-sêng; Siōng-tè ê sèng-tiān hôe-ho̍k chhin-chhiūⁿ í-chêng, koh chin kian-kò͘.

¹⁴ Oân-kang liáu-āu, in chiong só͘ chhun ê chîⁿ kau hō͘ ông kap Iâ-hô-iâ-tāi, the̍h-lâi chō Siōng Chú tiān-lāi ê khì-khū, chiū-sī ho̍k-sāi kap hiàn sio-hòa-chè ê khì-khū; koh chō khǹg hiuⁿ ê phiat-á í-ki̍p kim-gûn ê khì-khū. Iâ-hô-iâ-tāi oa̍h--teh ê sî, lâng siông-siông tī Siōng Chú ê sèng-tiān hiàn sio-hòa-chè.

Iâ-hô-iâ-tāi ê Kái-kek Siū Hòe-tû

¹⁵ Iâ-hô-iâ-tāi nî-lāu, hè-siū chiok, chiū sí; sí ê sî chi̍t-pah saⁿ-cha̍p hè.

¹⁶ Lâng chiong i kap lia̍t-ông chòe-hé an-chòng tī Tāi-pi̍t-siâⁿ; in-ūi i tī Í-sek-lia̍t tiong ūi Siōng-tè kap Siōng-tè ê tiān ū chin tōa ê kòng-hiàn.

¹⁷ Iâ-hô-iâ-tāi sí-liáu, Iû-tāi chèng siú-léng lâi tiâu-kìⁿ ông; ông chiap-siū in ê ì-kiàn.

¹⁸ Ông kap chèng siú-léng pàng-sak Siōng Chú — in lia̍t-chó͘ ê Siōng-tè ê tiān, khì ho̍k-sāi A-sià-la lú-sîn kap ngó͘-siōng. In hoān chit-ê chōe, Siōng-tè ê tōa siū-khì chiū lîm-kàu Iû-tāi kap Iâ-lō͘-sat-léng.

¹⁹ Sui-jiân Siōng Chú chhe sian-ti khì in hia beh chhōa in kui-ǹg Siōng Chú; sian-ti kā in kéng-kò, m̄-kú in m̄ thiaⁿ.

²⁰ Hit-sî Siōng-tè ê sîn lîm-kàu chè-si Iâ-hô-iâ-tāi ê kiáⁿ Sat-ka-lī-a; i khiā tī koân ê só͘-chāi tùi jîn-bîn kóng, “Siōng-tè án-ni kóng, ‘Lín sī-án-chóaⁿ ûi-pōe Siōng Chú ê kài-bēng, tì-kàu bōe heng-thong hoân-êng? In-ūi lín khì-sak Siōng Chú, Siōng Chú mā khì-sak lín.’”

²¹ In kiōng-bô͘ beh hāi Sat-ka-lī-a, chiū chiàu ông ê bēng-lēng, tī Siōng Chú sèng-tiān ê tiâⁿ, ēng chio̍h-thâu kā i tìm-sí.

²² Iok-a-si-ông bô tài-liām Sat-ka-lī-a ê lāu-pē Iâ-hô-iâ-tāi tùi i ê un-chêng, hāi-sí Iâ-hô-iâ-tāi ê kiáⁿ. Sat-ka-lī-a sí ê sî, kóng, “Goān Siōng Chú kàm-chhat sin-oan!”

Iok-a-si Siū Thâi

²³ Nî-bé, Sū-lī-a ê kun-peng chiūⁿ-lâi kong-kek Iok-a-si, lâi kàu Iû-tāi kap Iâ-lō͘-sat-léng, thâi-sí jîn-bîn ê siú-léng, chiong só͘ chhiúⁿ ê chiàn-lī-phín ūn-khì Tāi-má-sū-kek-ông hia.

²⁴ Sū-lī-a ê kun-peng chí-ū chi̍t sió-tūi ê lâng, m̄-kú Siōng Chú hō͘ in phah-pāi Iû-tāi tāi-kun, sī in-ūi Iû-tāi pàng-sak Siōng Chú — in lia̍t-chó͘ ê Siōng-tè, chiah ēng án-ni chek-hoa̍t Iok-a-si.

²⁵ Iok-a-si siū tāng-siong. Sū-lī-a ê kun-peng thiat-thè liáu-āu, Iok-a-si ê jîn-sîn pōe-poān i, ūi-tio̍h pò-ho̍k i sat-hāi chè-si Iâ-hô-iâ-tāi hiah-ê kiáⁿ, chiong i thâi-sí tī i ka-kī ê bîn-chhn̂g. Lâng chiong i an-chòng tī Tāi-pi̍t-siâⁿ, m̄-kú bô kap lia̍t-ông tâi chòe-hé.

²⁶ Pōe-poān i--ê sī A-bûn ê hū-jîn-lâng Sī-bí-ap ê kiáⁿ Sat-poa̍t, kap Mô͘-ap ê hū-jîn-lâng Sī-bí-lī ê kiáⁿ Iok-sat-poa̍t.

²⁷ Iú-koan Iok-a-si hiah-ê kiáⁿ, kap tùi i ê ū-giân, í-ki̍p i chéng-siu Siōng-tè sèng-tiān ê sū-chek, lóng kì-chài tī Lia̍t-ông Phêng-lūn-chi̍p. I ê kiáⁿ A-má-siā sòa-chiap i choh-ông.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan