Bìoball air-loidhne

歷代志下卷 22 - 現代台語譯本羅馬字版

Iû-tāi-ông A-hap-siā
( 2 Ông 8.25-29 ; 9.21-28 )

¹ Iâ-lō͘-sat-léng ê chū-bîn siat-li̍p Iok-lân ê soah-bé-kiáⁿ A-hap-siā sòa-chiap i choh-ông; in-ūi kap A-la-pek-lâng chòe-hé lâi kong-siâⁿ ê kun-tūi, chiong A-hap-siā ê hiaⁿ-ko lóng thâi-sí. Án-ni Iû-tāi-ông Iok-lân ê kiáⁿ A-hap-siā chiū choh-ông.

² A-hap-siā chē-ūi ê sî jī-cha̍p-jī hè, tī Iâ-lō͘-sat-léng choh-ông chi̍t nî. I ê lāu-bú kiò-chòe A-tha-lī-ngá, sī Í-sek-lia̍t-ông Àm-lī ê cha-bó͘-sun.

³ I mā kiâⁿ A-hap-ke ê lō͘; in-ūi i ê lāu-bú kà i chòe pháiⁿ.

⁴ I chhin-chhiūⁿ A-hap-ke chòe Siōng Chú khòaⁿ-chòe pháiⁿ ê sū; in-ūi i ê lāu-pē sí liáu-āu, A-hap-ke ê lâng lâi kà i chòe pháiⁿ tì-kàu i bia̍t-bông.

⁵ I chiap-siū in ê kè-chhek, kap Í-sek-lia̍t-ông A-hap ê kiáⁿ Iok-hô-lân chòe-hé khì Ki-lia̍t ê La-boa̍t, kap Sū-lī-a-ông Hap-sih kau-chiàn; Sū-lī-a-lâng phah-siong Iok-hô-lân.

⁶ Iok-hô-lân tò-khì Iâ-su-lia̍t, beh i-tī i tī La-boa̍t kap Sū-lī-a-ông Hap-sih kau-chiàn ê sî só͘ siū ê siong. Iok-lân ê kiáⁿ Iû-tāi-ông A-hap-siā lo̍h-khì Iâ-su-lia̍t, thàm-hóng A-hap ê kiáⁿ Iok-hô-lân, in-ūi i phòa-pīⁿ.

⁷ A-hap-siā lâi khòaⁿ Iok-hô-lân, soah tú-tio̍h hām-hāi, che sī chhut tī Siōng-tè ê ì-sù. I tī hia ê sî, kap Iok-hô-lân chhut--khì, tú-tio̍h Lêng-sī ê sun Iâ-hō͘; Siōng Chú ū soán-li̍p Iâ-hō͘, beh hō͘ i siau-bia̍t A-hap-ke.

⁸ Iâ-hō͘ teh chip-hêng Siōng-tè ê sím-phòaⁿ, hêng-hoa̍t A-hap-ke ê sî, tú-tio̍h Iû-tāi hiah-ê léng-siù, kap A-hap-siā hiaⁿ-ko ê kiáⁿ — in lóng sī teh sū-hāu A-hap-siā; Iâ-hō͘ chiong in lóng thâi-sí.

⁹ A-hap-siā bih tī Sat-má-lī-a, Iâ-hō͘ phài lâng khì lia̍h i; lâng chhē-tio̍h i, kā i tòa-khì Iâ-hō͘ hia, chiong i thâi-sí. Lâng kā i bâi-chòng, in-ūi in kóng, “I sī hit-ê choan-sim chhē-kiû Siōng Chú ê Iok-sa-hoat ê sun.” Án-ni, A-hap-siā ê ke bô lâng ū lêng-le̍k î-chhî ông-koân.

A-tha-lī-ngá Chhoàn-ūi
( 2 Ông 11.1-3 )

¹⁰ A-hap-siā ê lāu-bú A-tha-lī-ngá chi̍t-ē chai i ê kiáⁿ siū sat-hāi, chiū khí-lâi châu-bia̍t Iû-tāi ông-sek só͘-ū ê hō͘-tāi.

¹¹ M̄-kú Iok-lân-ông ê cha-bó͘-kiáⁿ Iok-sī-pa, chiong A-hap-siā ê kiáⁿ Iok-a-si, tùi hiah-ê siū-thâi ê ông-chú tiong thau-phō--chhut-lâi, chiong i kap i ê lin-bú chhàng tī sèng-tiān ê khùn-pâng, bô hō͘ A-tha-lī-ngá chai, hō͘ Iok-a-si bián siū sat-hāi. Iok-sī-pa sī A-hap-siā ê sió-bē, chè-si Iâ-hô-iâ-tāi ê bó͘.

¹² A-tha-lī-ngá tī-lí Iû-tāi-kok ê sî, Iok-a-si kap i ê lin-bú chòe-hé bih tī Siōng-tè ê tiān la̍k nî kú.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan