Bìoball air-loidhne

歷代志下卷 21 - 現代台語譯本羅馬字版

¹ Iok-sa-hoat tńg-khì i ê lia̍t-chó͘ hia, kap i ê lia̍t-chó͘ an-chòng tī Tāi-pi̍t-siâⁿ; i ê kiáⁿ Iok-lân sòa-chiap i choh-ông.

Iû-tāi-ông Iok-lân
( 2 Ông 8.17-24 )

² Iok-lân ū kúi-nā ê sió-tī, chiū-sī Iok-sa-hoat ê kiáⁿ A-sat-lī-ngá, Iâ-hiat, Sat-ka-lī-a, A-sat-lia̍t-hu, Bí-ka-le̍k, Sī-hoat-thê-ngá; in lóng sī Iû-tāi-ông Iok-sa-hoat ê kiáⁿ.

³ In ê lāu-pē ēng chin chōe kim, gûn, pó-pòe, kap Iû-tāi-tōe kian-kò͘ ê siâⁿ chòe lé-mi̍h hō͘ in, m̄-kú chiong kok-ūi kau hō͘ Iok-lân, in-ūi i sī tōa-kiáⁿ.

⁴ Iok-lân chi̍t-ē khí-lâi tī-lí i lāu-pē ê kok, chiū ka-kiông i ê thóng-tī, thâi-sí i só͘-ū ê sió-tī, kap Í-sek-lia̍t kúi-nā ê siú-léng.

⁵ Iok-lân chē-ūi ê sî saⁿ-cha̍p-jī hè, tī Iâ-lō͘-sat-léng choh-ông poeh nî.

⁶ I kiâⁿ Í-sek-lia̍t chu-ông ê lō͘, só͘ chòe--ê kap A-hap-ke kâng-khoán; in-ūi i chhōa A-hap ê cha-bó͘-kiáⁿ chòe bó͘, chòe Siōng Chú khòaⁿ-chòe pháiⁿ ê sū.

⁷ M̄-kú Siōng Chú in-ūi I kap Tāi-pi̍t só͘ li̍p ê iok, m̄-kam bia̍t Tāi-pi̍t ê ke. Siōng Chú chiàu I ê èng-ún, éng-oán siúⁿ-sù chi̍t pha teng hō͘ Tāi-pi̍t kap i ê kiáⁿ-sun.

⁸ Iok-lân choh-ông ê sî, Í-tong pōe-poān Iû-tāi, thoat-lī Iû-tāi ê thóng-tī, siat-li̍p in ka-kī ê ông.

⁹ Iok-lân chiū chhōa i ê kun-koaⁿ kap só͘-ū ê chiàn-chhia kè--khì. Í-tong-lâng kā in pau-ûi. Mî--sî Iok-lân kap chiàn-chhia-tiúⁿ khí-lâi hoán-kek.

¹⁰ Án-ni Í-tong-lâng pōe-poān Iû-tāi, thoat-lī Iû-tāi ê thóng-tī kàu kin-á-ji̍t. Siâng hit-sî, Li̍p-ná mā thoat-lī Iok-lân ê thóng-tī, in-ūi i khì-sak Siōng Chú — i lia̍t-chó͘ ê Siōng-tè.

¹¹ I koh tī Iû-tāi ê soaⁿ khí soaⁿ-thâu-tôaⁿ, hō͘ Iâ-lō͘-sat-léng ê chū-bîn kiâⁿ siâ-îm, hō͘ Iû-tāi-lâng kiâⁿ phian-lō͘.

¹² Sian-ti Í-lī-a siá-phoe hō͘ Iok-lân, kóng, “Siōng Chú — lí ê chó͘-sian Tāi-pi̍t ê Siōng-tè án-ni kóng, ‘In-ūi lí bô kiâⁿ Iû-tāi-ông, lí ê lāu-pē Iok-sa-hoat kap a-kong A-sat ê lō͘,

¹³ tian-tò khì kiâⁿ Í-sek-lia̍t chu-ông ê lō͘, koh hō͘ Iû-tāi kap Iâ-lō͘-sat-léng ê chū-bîn kiâⁿ siâ-îm, chhin-chhiūⁿ A-hap-ke ê só͘-chòe; lí koh thâi-sí lí lāu-pē ê ke hiah-ê pí lí khah-hó ê sió-tī.

¹⁴ Só͘-í Siōng Chú beh kàng tōa chai-hō phah lí ê jîn-bîn, kap lí ê kiáⁿ-jî, lí ê bó͘, í-ki̍p lí it-chhè só͘ ū--ê.

¹⁵ Lí ê tn̂g-á beh hoān-tio̍h tāng-pīⁿ, jú lâi jú giâm-tiōng, tì-kàu tūi--lo̍h-lâi.’”

¹⁶ Siōng Chú kek-tōng Hui-lī-sū-lâng kap óa-kūn Kó͘-si̍t ê A-la-pek-lâng, lâi kong-táⁿ Iok-lân.

¹⁷ In chiūⁿ-lâi kong-kek Iû-tāi, chhim-ji̍p kok-kéng, chhiúⁿ-toa̍t ông-kiong lāi-bīn só͘-ū ê châi-bu̍t, kap i ê kiáⁿ i ê bó͘; chí-ū lâu soah-bé-kiáⁿ A-hap-siā chi̍t ê.

¹⁸ Chiah-ê tāi-chì í-āu Siōng Chú phah Iok-lân, hō͘ i ê tn̂g-á hoān-tio̍h bōe-i--tit ê pīⁿ.

¹⁹ Án-ni thoa nn̄g nî, i ê tn̂g-á tūi--lo̍h-lâi, pīⁿ tāng chiū sí. I ê jîn-bîn bô khí-hé kì-liām i, bô chhin-chhiūⁿ í-chêng ūi-tio̍h i ê chó͘-sian só͘ chòe--ê.

²⁰ Iok-lân chē-ūi ê sî saⁿ-cha̍p-jī hè, tī Iâ-lō͘-sat-léng choh-ông kiōng poeh nî. I lī-khui sè-kan bô lâng ūi-tio̍h i pi-ai; lâng chiong i an-chòng tī Tāi-pi̍t-siâⁿ, m̄-kú bô kap lia̍t-ông tâi chòe-hé.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan