Bìoball air-loidhne

歷代志下卷 17 - 現代台語譯本羅馬字版

Iû-tāi-ông Iok-sa-hoat

¹ Iok-sa-hoat sòa-chiap i ê lāu-pē A-sat chòe Iû-tāi-ông, hùn-hoat chū-kiông, tùi-khòng Í-sek-lia̍t.

² I phài kun-tūi chū-chāi tī Iû-tāi hiah-ê kian-kò͘ ê siâⁿ, koh tī Iû-tāi-tōe, kap i ê lāu-pē A-sat só͘ kong-chhú Í-hoat-liân hiah-ê siâⁿ phài peng hông-siú.

³ Siōng Chú kap Iok-sa-hoat tông-chāi, in-ūi i chiàu i ê lāu-pē chho͘-kî ê só͘-chòe khì chòe, bô pài Pa-le̍k;

⁴ chí-ū ho̍k-sāi i ê lāu-pē ê Siōng-tè, chun-hêng I ê kài-bēng, bô chiàu Í-sek-lia̍t chu-ông ê só͘-chòe khì chòe.

⁵ Só͘-í Siōng Chú kian-kò͘ Iok-sa-hoat ê thóng-tī; Iû-tāi jîn-bîn hiàn lé-mi̍h hō͘ i. I chiū ū chin chōe châi-hù koh chin siū lâng chun-kèng.

⁶ I ióng-kám kiâⁿ Siōng Chú ê tō-lō͘; koh tùi Iû-tāi hòe-tû soaⁿ-thâu-tôaⁿ kap A-sià-la lú-sîn ê thiāu-siōng.

⁷ I choh-ông tē-saⁿ nî phài i ê jîn-sîn Piān Hâi-i-le̍k, Gô-pa-tí-a, Sat-ka-lī-a, Ná-thán-gia̍p, Bí-kai-a, khì Iû-tāi ta̍k-ê siâⁿ kàu-tō jîn-bîn.

⁸ Kap in chòe-hé khì--ê ū Lī-bī-lâng Sī-má-ngá, Nî-thàm-ngá, Se-pa-tē-ngá, A-sat-hek, Sī-bí-la-boa̍t, Iok-ná-tan, A-to-nî-ngá, To-pí-ngá, Tô Pa-to-nî-ngá, í-ki̍p chè-si Í-lī-sa-má kap Iok-lân.

⁹ In tòa Siōng Chú lu̍t-hoat ê chheh, kiâⁿ-thàu Iû-tāi só͘-ū ê siâⁿ, kà-sī jîn-bîn.

Iok-sa-hoat ê Kun-le̍k

¹⁰ Iû-tāi chiu-ûi lia̍t-kok lóng chin kiaⁿ Siōng Chú, m̄-káⁿ kap Iok-sa-hoat kau-chiàn.

¹¹ Hui-lī-sū-lâng ū-ê chìn-kòng gûn hō͘ Iok-sa-hoat; A-la-pek-lâng koh sàng mî-iûⁿ-káng kap soaⁿ-iûⁿ-káng kok chhit-chheng chhit-pah chiah.

¹² Iok-sa-hoat jú lâi jú kiông-sēng, tī Iû-tāi khí iàu-sài kap tún-chek ê siâⁿ.

¹³ I tī Iû-tāi ê siâⁿ ū chòe chin chōe kang-thêng; koh tī Iâ-lō͘-sat-léng ū ióng-béng ê chiàn-sū.

¹⁴ In ê sò͘-bo̍k, chiàu chong-cho̍k kì tī ē-bīn: Iû-tāi chi-cho̍k tē-it ê chí-hui-koaⁿ sī Ap-ná, chhōa ióng-béng ê chiàn-sū saⁿ-cha̍p-bān;

¹⁵ tē-jī ê sī Iok-hap-lân, chhōa jī-cha̍p-poeh-bān;

¹⁶ tē-saⁿ ê sī Sè-ki-lī ê kiáⁿ A-má-su-ngá, i kam-goān hōng-hiàn ka-kī hō͘ Siōng Chú, chhōa jī-cha̍p-bān ióng-béng ê chiàn-sū.

¹⁷ Piān-ngá-bín chi-cho̍k ê ióng-béng chiàn-sū Í-lī-ngá-tāi, chhōa gia̍h keng-chìⁿ kap tún-pâi ê chiàn-sū jī-cha̍p-bān;

¹⁸ tē-jī ê sī Iok-sat-poa̍t, chhōa bú-chong chiàn-sū cha̍p-poeh-bān.

¹⁹ Chiah-ê lóng teh sū-hāu ông; lēng-gōa iáu ū ông phài-chū tī Iû-tāi kian-kò͘ ê siâⁿ ê kun-tūi.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan