Bìoball air-loidhne

歷代志下卷 16 - 現代台語譯本羅馬字版

Iû-tāi kap Í-sek-lia̍t Kau-chiàn
( 1 Ông 15.17-22 )

¹ A-sat choh-ông tē-saⁿ-cha̍p-la̍k nî, Í-sek-lia̍t-ông Pa-sa lâi kong-kek Iû-tāi, siu-kiàn La-má-siâⁿ, beh chó͘-tòng lâng tī Iû-tāi-ông A-sat hia chhut-ji̍p.

² A-sat chiū tùi Siōng Chú sèng-tiān kap ông-kiong ê hú-khò͘ the̍h kim gûn, sàng hō͘ khiā-khí tī Tāi-má-sū-kek ê Sū-lī-a-ông Piān Hap-ta̍t, tùi i kóng,

³ “Lán lâi kiat-bêng, chhin-chhiūⁿ lí ê lāu-pē bat kap góa ê lāu-pē kiat-bêng. Taⁿ góa chiong kim gûn sàng lí, chhiáⁿ lí hòe-tû lí kap Í-sek-lia̍t-ông Pa-sa só͘ li̍p ê iok, hō͘ i tùi Iû-tāi thiat-thè.”

⁴ Piān Hap-ta̍t tông-ì A-sat-ông ê ōe, chiū phài i ê kun-tiúⁿ khì kong-kek Í-sek-lia̍t ê siâⁿ, kong-phòa Í-hûn, Tān, A-pek Pek Má-ka, kap Ná-hut-tha-lī só͘-ū tún-chek ê siâⁿ.

⁵ Pa-sa thiaⁿ-tio̍h chit-ê siau-sit, chiū thêng-kang bô koh siu-kiàn La-má.

⁶ Tùi án-ni, A-sat-ông chhōa Iû-tāi jîn-bîn, chiong Pa-sa ēng lâi beh siu-kiàn La-má ê chio̍h-thâu kap chhâ-liāu, poaⁿ-khì tiông-kiàn Ka-pa kap Bí-su-pa.

Sian-kiàn Hap-ná-nî

⁷ Hit-sî, sian-kiàn Hap-ná-nî lâi kìⁿ Iû-tāi-ông A-sat, tùi i kóng, “In-ūi lí óa-khò Sū-lī-a-ông, bô óa-khò Siōng Chú — lí ê Siōng-tè, só͘-í Sū-lī-a-ông ê kun-peng ōe thoat-lī lí ê chhiú-thâu.

⁸ Kó͘-si̍t-lâng kap Lī-pí-a-lâng ê kun-tūi kiám m̄-sī chin kiông-tāi? In ê chiàn-chhia kap bé-peng kiám m̄-sī chin chōe? M̄-kú in-ūi lí óa-khò Siōng Chú, I chiū chiong in kau tī lí ê chhiú.

⁹ Siōng Chú ê ba̍k-chiu teh sûn-sī choân-tōe; só͘-ū choan-sim kui-ǹg I--ê, I ōe siúⁿ-sù in khùi-la̍t. Tī kap Sū-lī-a kiat-bêng chit-ê tāi-chì, lí chòe-liáu chin gōng; in-ūi án-ni, lí í-āu put-sî ōe ū chiàn-cheng.”

¹⁰ A-sat thiaⁿ-liáu hui-siông siū-khì, chiū chiong sian-kiàn koaiⁿ tī kaⁿ--ni̍h. Siâng-sî, A-sat mā ge̍k-thāi chi̍t-kóa jîn-bîn.

A-sat ê Sí
( 1 Ông 15.23-24 )

¹¹ A-sat ê sū-chek, tùi thâu kàu bé lóng kì-chài tī Iû-tāi kap Í-sek-lia̍t Lia̍t-ông-sú.

¹² A-sat-ông tē-saⁿ-cha̍p-káu nî, i ê kha tio̍h-pīⁿ, chèng-thâu chin siong-tiōng. Phòa-pīⁿ ê sî i bô kiû Siōng Chú, kan-ta chhē i-seng.

¹³ A-sat choh-ông sì-cha̍p-it nî chiū sí,

¹⁴ an-chòng tī Tāi-pi̍t-siâⁿ, i ūi ka-kī phah-hó ê bōng. Lâng chiong i hē tī chhn̂g-pang; chhn̂g-pang téng khǹg chin chōe chiàu te̍k-pia̍t ê hong-hoat tiâu-hô ê ta̍k-chióng phang-liāu. Lâng koh khí chin tōa ê hé kì-liām i.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan