Bìoball air-loidhne

歷代志下卷 15 - 現代台語譯本羅馬字版

A-sat ê Kái-kek

¹ Siōng-tè ê sîn lîm-kàu Gô-tek ê kiáⁿ A-sat-lī-ngá.

² I chiū khì kìⁿ A-sat, tùi i kóng, “A-sat kap Iû-tāi, Piān-ngá-bín ê jîn-bîn, chhiáⁿ thiaⁿ góa kóng. Lín nā sūn-thàn Siōng Chú, I chiū kap lín tông-chāi; lín nā chhē-kiû I, I ōe hō͘ lín chhē--tio̍h; m̄-kú lín nā khì-sak I, I mā ōe khì-sak lín.

³ Í-sek-lia̍t-lâng í-keng chin kú bô sìn chin Sîn, bô kàu-tō ê chè-si, bô lu̍t-hoat,

⁴ m̄-kú in tī hoān-lān ê sî kui-ǹg chhē-kiû Siōng Chú — Í-sek-lia̍t ê Siōng-tè, I chiū hō͘ in chhē--tio̍h.

⁵ Hit-sî, lia̍t-kok ê chū-bîn tú-tio̍h tōa jiáu-loān, lâng chhut-ji̍p bô pêng-an.

⁶ Kok kong-kek kok, siâⁿ kong-kek siâⁿ, Siōng-tè ēng ta̍k-khoán chai-lān jiáu-loān in.

⁷ Taⁿ lín tio̍h kian-kiông, m̄-thang sit-táⁿ, in-ūi lín ê só͘-chòe ōe tit-tio̍h pò-siúⁿ.”

⁸ A-sat thiaⁿ-tio̍h chiah-ê ōe, kap Gô-tek ê kiáⁿ A-sat-lī-ngá ê ū-giân, chiū kian-kiông--khí-lâi, tī Iû-tāi kap Piān-ngá-bín choân-tōe, í-ki̍p i só͘ kong-chhú Í-hoat-liân soaⁿ-khu hiah-ê siâⁿ, hòe-tû só͘-ū khó-ò͘ⁿ ê ngó͘-siōng, koh siu-kiàn sèng-tiān cháu-lông thâu-chêng Siōng Chú ê chè-tôaⁿ.

⁹ I koh chū-chi̍p Iû-tāi-lâng, Piān-ngá-bín-lâng, í-ki̍p kià-ku tī in tiong-kan ê Í-hoat-liân-lâng, Má-ná-se-lâng, kap Se-biān-lâng; ū chin chōe Í-sek-lia̍t-lâng chhut-lâi kui-sūn A-sat, in-ūi in khòaⁿ-kìⁿ Siōng Chú — i ê Siōng-tè kap i tông-chāi.

¹⁰ A-sat-ông tē-cha̍p-gō͘ nî saⁿ--ge̍h, in lóng chū-chi̍p tī Iâ-lō͘-sat-léng.

¹¹ Hit-ji̍t, in tùi tòa--lâi ê chiàn-lī-phín tiong-kan, hōng-hiàn chhit-pah chiah gû kap chhit-chheng chiah iûⁿ chòe chè hō͘ Siōng Chú.

¹² In li̍p-iok, beh choân-sim choân-ì chhē-kiû Siōng Chú — in lia̍t-chó͘ ê Siōng-tè;

¹³ só͘-ū bô chhē-kiû Siōng Chú — Í-sek-lia̍t ê Siōng-tè ê lâng, bô-lūn lâm-lú tōa-sòe, lóng tio̍h chhú-sí.

¹⁴ In chiū tōa-siaⁿ hoan-ho͘, pûn sàu-kak kap lat-pah, tùi Siōng Chú chiù-chōa.

¹⁵ Iû-tāi jîn-bîn lóng chin hoaⁿ-hí, in-ūi in choân-sim tùi Siōng Chú chiù-chōa, koh choân-ì chhē-kiû Siōng Chú, Siōng Chú chiū hō͘ in chhē--tio̍h, siúⁿ-sù in sù-kéng-pêng-an.

¹⁶ A-sat-ông hòe-tû i ê a-má Má-ka thài-hō͘ ê ūi, in-ūi Má-ka ū chō A-sià-la khó-ò͘ⁿ ê sîn-siōng. A-sat chiong sîn-siōng chhò-tiāu, phòa hō͘ chhùi-chhùi, tī Khip-lûn Khoe-kok pàng-hé sio.

¹⁷ Sui-jiân hiah-ê soaⁿ-thâu-tôaⁿ iáu-bē tùi Í-sek-lia̍t tiong tû--khì, m̄-kú A-sat it-seng oân-choân sūn-ho̍k Siōng Chú.

¹⁸ I chiong i ê lāu-pē kap i pún-sin hun-pia̍t-choh-sèng ê kim, gûn, kap khì-khū, lóng tòa-ji̍p Siōng-tè ê sèng-tiān.

¹⁹ Tùi hit-sî kàu A-sat choh-ông tē-saⁿ-cha̍p-gō͘ nî, lóng bô koh ū chiàn-cheng.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan