Bìoball air-loidhne

歷代志下卷 1 - 現代台語譯本羅馬字版

Só͘-lô-bûn Kiû Tì-hūi
( 1 Ông 3.1-15 )

¹ Tāi-pi̍t ê kiáⁿ Só͘-lô-bûn kian-kò͘ i tùi Í-sek-lia̍t ê thóng-tī, Siōng Chú — i ê Siōng-tè kap i tông-chāi, hō͘ i siū chun chòe tōa.

² Só͘-lô-bûn tiàu-chi̍p Í-sek-lia̍t chèng-lâng, chiū-sī koán chi̍t-chheng lâng kap koán chi̍t-pah lâng ê kun-koaⁿ, sím-phòaⁿ-koaⁿ, í-ki̍p choân Í-sek-lia̍t ê léng-siù kap cho̍k-tiúⁿ,

³ chhōa in khì Ki-piàn ê soaⁿ-thâu-tôaⁿ; tī hia ū Siōng-tè ê hōe-bō͘, sī Siōng Chú ê po̍k-jîn Mô͘-se tī khòng-iá só͘ chō--ê.

⁴ Hit-sî Tāi-pi̍t í-keng chiong Siōng-tè ê iok-kūi tùi Ki-lia̍t Iâ-lîm sóa-lâi Iâ-lō͘-sat-léng, khǹg tī i ūi-tio̍h iok-kūi tah ê pò͘-pîⁿ.

⁵ M̄-kú Hō͘-ní ê sun, O͘-lī ê kiáⁿ Pí-sat-lia̍t só͘ chō ê tâng-tôaⁿ iáu tī Ki-piàn Siōng Chú ê hōe-bō͘ chêng; Só͘-lô-bûn kap hōe-chiòng tī hia kiû-mn̄g Siōng Chú.

⁶ Só͘-lô-bûn tī hōe-bō͘ chêng kèng-pài Siōng Chú, tī tâng-tôaⁿ hiàn chi̍t-chheng chiah cheng-siⁿ chòe sio-hòa-chè.

⁷ Hit-mî, Siōng-tè tùi Só͘-lô-bûn hián-hiān, kā i kóng, “Lí ài góa sù lí sím-mi̍h, thang tùi góa kiû.”

⁸ Só͘-lô-bûn tùi Siōng-tè kóng, “Lí bat si tōa-un hō͘ góa ê lāu-pē Tāi-pi̍t, koh hō͘ góa sòa-chiap i choh-ông.

⁹ Chú Siōng-tè, taⁿ kiû lí si̍t-hiān lí tùi góa ê lāu-pē Tāi-pi̍t ê èng-ún, in-ūi lí siat-li̍p góa chòe chit-ê jîn-bîn ê ông, in chhin-chhiūⁿ tōe-chiūⁿ ê thô͘-soa hiah chōe.

¹⁰ Taⁿ kiû lí sù góa tì-hūi chhong-bêng, hō͘ góa thang léng-tō chit-ê kok-ka, tī-lí chiah-ê jîn-bîn; nā m̄-sī án-ni, siáⁿ-lâng ōe-tàng tī-lí lí chiah chōe ê jîn-bîn?”

¹¹ Siōng-tè tùi Só͘-lô-bûn kóng, “Kì-jiân lí ê sim-ì sī án-ni, bô kiû chîⁿ-châi, hù-chiok, chun-êng, kap siau-bia̍t tùi-te̍k ê sìⁿ-miā, mā bô kiû tn̂g-hè-siū, chí-ū kiû tì-hūi chhong-bêng, thang tī-lí góa ê chú-bîn, chiū-sī lí siū siat-li̍p choh-ông tī-lí ê jîn-bîn.

¹² Só͘-í góa beh sù lí tì-hūi chhong-bêng, mā beh sù lí chîⁿ-châi, hù-chiok, chun-êng; chhiau-kè lí í-chêng ê lia̍t-ông, tī lí í-āu mā bōe ū lâng chhin-chhiūⁿ lí án-ni.”

Só͘-lô-bûn ê Peng-le̍k kap Châi-le̍k
( 1 Ông 10.26-29 )

¹³ Só͘-lô-bûn tùi Ki-piàn soaⁿ-thâu-tôaⁿ ê hōe-bō͘ tò-lâi Iâ-lō͘-sat-léng, choh-ông tī-lí Í-sek-lia̍t.

¹⁴ Só͘-lô-bûn-ông ū kiàn-li̍p kun-tūi, chiàn-chhia chi̍t-chheng sì-pah tâi, bé-peng chi̍t-bān nn̄g-chheng miâ; kā in an-tì tī hiah-ê tún chiàn-chhia ê siâⁿ, kap Iâ-lō͘-sat-léng ông hia.

¹⁵ Ông thóng-tī kî-kan, Iâ-lō͘-sat-léng ê kim-gûn chhin-chhiūⁿ chio̍h-thâu hiah chōe, pek-hiuⁿ-chhâ chhin-chhiūⁿ soaⁿ-po͘ ê sng-châi-chhiū hiah chōe.

¹⁶ Só͘-lô-bûn ê bé lóng tùi Ai-ki̍p kap Kho-ui chìn-kháu, sī ông ê seng-lí-lâng tùi Kho-ui chiàu chhī-kè bóe--lâi-ê.

¹⁷ Tùi Ai-ki̍p chìn-kháu ê chiàn-chhia, ta̍k-tâi tāi-iok chhit kong-kun ê gûn; chiàn-bé ta̍k-chiah tāi-iok nn̄g kong-kun ê gûn. Só͘-lô-bûn ê seng-lí-lâng mā keng-chhiú, chiong chiah-ê chhut-kháu bōe hō͘ Hek-lâng kap Sū-lī-a-lâng hiah-ê ông.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan