Bìoball air-loidhne

歷代志上卷 5 - 現代台語譯本羅馬字版

Lū-piān ê Hō͘-tāi

¹ Ngá-kok ê tōa-kiáⁿ Lū-piān, i pún-lâi sī tōa-kiáⁿ, in-ūi kap in lāu-pē ê sòe-î chòe-hé khùn, só͘-í tōa-kiáⁿ ê koân-lī chiū kui tī Ngá-kok ê kiáⁿ Iok-sek; ka-phó͘ bô chiàu chhut-sì ê sūn-sū teng-lio̍k.

² Iû-tāi pí i ê hiaⁿ-tī khah kiông-sēng, koh chhut kun-ông; m̄-kú tōa-kiáⁿ ê koân-lī kui tī Iok-sek.

³ Ngá-kok ê tōa-kiáⁿ Lū-piān ū sì ê kiáⁿ: Í-lo̍k, Hoat-lō͘, Hi-su-lûn, kap Ka-bí.

⁴ Iok-ní siⁿ Sī-má-ngá, Sī-má-ngá siⁿ Ko-kek, Ko-kek siⁿ Sī-múi,

⁵ Sī-múi siⁿ Bí-ka, Bí-ka siⁿ Lī-a-ngá, Lī-a-ngá siⁿ Pa-le̍k,

⁶ Pa-le̍k siⁿ Pī-la; Pī-la chòe Lū-piān chi-cho̍k ê léng-siù, hō͘ A-su̍t-ông Thê-kek-la Pí-lia̍t-sek lia̍h--khì.

⁷ Pī-la ê hiaⁿ-tī, chiàu chong-cho̍k ê ka-phó͘, chòe cho̍k-tiúⁿ--ê, ū Iâ-lī, Sat-ka-lī-a,

⁸ kap Pí-la; Pí-la sī A-sat ê kiáⁿ, Sī-má ê sun, Iok-ní ê kan-á-sun; Iok-ní tòa tī A-lô-ní kàu Nî-pho kap Pa-le̍k Bián ê tōe-khu;

⁹ in tī Ki-lia̍t tōe-khu ê cheng-siⁿ chin chōe, chiū chiàm tang-pêng ê khòng-iá, it-ti̍t kàu Iù-hoat-la-tí-hô.

¹⁰ Sò-lô ê sî, Lū-piān chi-cho̍k kap Hā-kah-lâng kau-chiàn; Hā-kah-lâng sí tī in ê chhiú-ē, in chiū chhiúⁿ Hā-kah-lâng ê pò͘-pîⁿ, tòa tī Ki-lia̍t tang-pêng choân-tōe.

Ka-tek ê Hō͘-tāi

¹¹ Ka-tek ê kiáⁿ-sun tòa tī Lū-piān ê tùi-bīn Pa-san tōe-khu it-ti̍t kàu Sat-ka;

¹² Iok-ní chòe in ê cho̍k-tiúⁿ, Sa-hoan chòe hù-cho̍k-tiúⁿ, koh ū tòa tī Pa-san ê Ngá-nái kap Sa-hoat.

¹³ Ka-tek chi-cho̍k kî-tha ê lâng lóng sio̍k ē-bīn chhit ê chong-cho̍k: Bí-ka-le̍k, Bí-su-lân, Sī-pa, Iok-nāi, Ngá-kan, Sè-a, kap Hi-pek.

¹⁴ Í-siōng chiah-ê lóng sī Hō͘-lī ê kiáⁿ A-pí-hâi ê hō͘-tāi; A-pí-hâi ê chó͘-sian tùi a-kong sǹg chiūⁿ--khì sī Iâ-lô-a, Ki-lia̍t, Bí-ka-le̍k, Iâ-sī-su, Iâ-hap-to, Pò͘-su.

¹⁵ Ko͘-nî ê sun, Ap-pí-thia̍p ê kiáⁿ A-hi mā chòe cho̍k-tiúⁿ.

¹⁶ In tòa tī Ki-lia̍t, Pa-san, kap hù-kūn ê chng-siā, í-ki̍p Sa-lûn ê chháu-po͘, ti̍t-kàu sì-ûi ê kau-kài.

¹⁷ Chiah-ê lâng tī Iû-tāi-ông Iok-thán kap Í-sek-lia̍t-ông Iâ-lô-pho-an Jī-sè ê sî, lóng ū teng-lio̍k tī ka-phó͘.

Tang-hōaⁿ Chi-cho̍k ê Kun-tūi

¹⁸ Lū-piān-lâng, Ka-tek-lâng, kap Má-ná-se pòaⁿ chi-cho̍k ê lâng, ōe the̍h tún-pâi gia̍h to, khui keng siā-chìⁿ, chhut-cheng gâu sio-thâi ê ióng-sū, lóng-chóng ū sì-bān sì-chheng chhit-pah la̍k-cha̍p lâng.

¹⁹ In kap Hā-kah-lâng, I-tu̍t-lâng, Ná-hui-si-lâng, Ná-tap-lâng kau-chiàn.

²⁰ In sìn-khò Siōng-tè, tī chiàn-tiûⁿ kî-kiû Siōng-tè pang-chān, I chiū thiaⁿ in ê kî-tó, chiong Hā-kah-lâng kap kun-tè in ê lâng lóng kau tī in ê chhiú.

²¹ In chhiúⁿ Hā-kah-lâng ê cheng-siⁿ, ū lo̍k-tô gō͘-bān chiah, iûⁿ jī-cha̍p-gō͘-bān chiah, lû nn̄g-chheng chiah, koh lia̍h lâng cha̍p-bān.

²² In thâi-sí chin chōe te̍k-jîn, in-ūi chit-ê kau-chiàn chhut-tī Siōng-tè. In chiū tòa tī hit-ê tōe-khu kàu in siū-lia̍h ê sî.

Má-ná-se Pòaⁿ Chi-cho̍k

²³ Má-ná-se pòaⁿ chi-cho̍k ê lâng khiā-khí tī chit-ê tōe-khu, tùi Pa-san sòa kàu Pa-le̍k Hek-bûn, Sī-nî-ní, kap Hek-bûn-soaⁿ; in ê jîn-kháu ke-thiⁿ chin chōe.

²⁴ In ê cho̍k-tiúⁿ chiū-sī Í-hut, Í-sī, Í-lī-gia̍p, A-su-lia̍t, Iâ-lī-bí, Hô-ta̍t-ui-ngá, kap Ngá-thia̍p, lóng sī kiông-béng ê ióng-sū, ū miâ-siaⁿ, mā chòe cho̍k-tiúⁿ.

Tang-hōaⁿ Chi-cho̍k Siū-lia̍h

²⁵ Lū-piān, Ka-tek, kap Má-ná-se pòaⁿ chi-cho̍k ê lâng pōe-poān in lia̍t-chó͘ ê Siōng-tè, ho̍k-sāi hit só͘-chāi chū-bîn ê sîn-bêng, hiah-ê chū-bîn sī Siōng-tè tī Í-sek-lia̍t-lâng bīn-chêng só͘ húi-bia̍t--ê.

²⁶ Só͘-í Í-sek-lia̍t ê Siōng-tè kek-tōng A-su̍t-ông Phó͘-le̍k, chiū-sī Thê-kek-la Pí-lia̍t-sek ê sim, chiong Lū-piān-lâng, Ka-tek-lâng, Má-ná-se pòaⁿ chi-cho̍k ê lâng, lia̍h-khì Hap-la̍h, Hap-phok, Hap-la, kap Ko-sàn hô-piⁿ, kàu kin-á-ji̍t.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan