Bìoball air-loidhne

歷代志上卷 22 - 現代台語譯本羅馬字版

¹ Tāi-pi̍t kóng, “Chú Siōng-tè ê sèng-tiān beh khí tī chia; Í-sek-lia̍t-lâng beh tī chia hiàn sio-hòa-chè.”

Chún-pī Khí Sèng-tiān

² Tāi-pi̍t hā-lēng tiàu-chi̍p tòa tī Í-sek-lia̍t-tōe ê gōa-kok-lâng, koh phài in ê phah-chio̍h sai-hū khì phah-chio̍h, ūi-tio̍h beh khí Siōng-tè ê tiān.

³ Tāi-pi̍t chún-pī chin chōe thih, chòe mn̂g-sìⁿ ê thih-teng kap mn̂g-liú; koh chún-pī chōe kah bōe-chhìn--tit ê tâng.

⁴ I mā ū sǹg bōe liáu ê pek-hiuⁿ-chhâ, in-ūi Se-tùn-lâng kap Thài-ní-lâng chài chin chōe pek-hiuⁿ-chhâ hō͘ Tāi-pi̍t.

⁵ Tāi-pi̍t siūⁿ, “Góa ê kiáⁿ Só͘-lô-bûn iáu siàu-liân bô keng-giām; Siōng Chú ê sèng-tiān tio̍h khí chin tông-hông, hō͘ i ê miâ-siaⁿ êng-iāu thàu kàu bān-kok. Só͘-í, góa beh ūi-tio̍h chit-ê tiān chún-pī.” Tāi-pi̍t chiū tī iáu-bē sí í-chêng chún-pī chin chōe châi-liāu.

⁶ Tāi-pi̍t kiò i ê kiáⁿ Só͘-lô-bûn lâi, kau-tài i tio̍h ūi Siōng Chú — Í-sek-lia̍t ê Siōng-tè khí sèng-tiān.

⁷ Tāi-pi̍t kā Só͘-lô-bûn kóng, “Góa ê kiáⁿ, góa pún-lâi siūⁿ-beh ūi Siōng Chú — góa ê Siōng-tè ê miâ khí sèng-tiān,

⁸ m̄-kú Siōng Chú kā góa kóng, ‘Lí put-sî kau-chiàn, thâi-sí chin chōe lâng, lâu chin chōe lâng ê huih; lí m̄-thang ūi-tio̍h góa ê miâ khí sèng-tiān, in-ūi góa ū khòaⁿ-tio̍h lí lâu chin chōe lâng ê huih tī tōe--ni̍h.

⁹ M̄-kú, lí ōe siⁿ chi̍t ê kiáⁿ, góa beh hō͘ i it-seng thài-pêng, bô siū sì-ûi tùi-te̍k chhim-hoān. I ê miâ beh kiò-chòe Só͘-lô-bûn; tī i thóng-tī ê sî, góa beh hō͘ Í-sek-lia̍t kok-thài-bîn-an.

¹⁰ I beh ūi-tio̍h góa ê miâ khí sèng-tiān. I beh chòe góa ê kiáⁿ, góa beh chòe i ê pē. Góa beh kian-li̍p i ê kok-koân, hō͘ i éng-oán thóng-tī Í-sek-lia̍t.’”

¹¹ Tāi-pi̍t koh kóng, “Góa ê kiáⁿ, goān Siōng Chú kap lí tông-chāi, hō͘ lí sūn-lī heng-thong, chiàu I kā lí èng-ún--ê, khí Siōng Chú — lí ê Siōng-tè ê sèng-tiān.

¹² Goān Siōng Chú sù lí chhong-bêng tì-hūi, chun-thàn Siōng Chú — lí ê Siōng-tè ê lu̍t-hoat lâi tī-lí Í-sek-lia̍t.

¹³ Lí nā kín-sīn chun-thàn Siōng Chú thong-kè Mô͘-se kà-sī Í-sek-lia̍t ê kui-lē kap bēng-lēng, chiū ōe heng-thong; lí tio̍h kian-kiông ióng-kám, m̄-thang kiaⁿ, m̄-thang lún.

¹⁴ Góa sin-sin-khó͘-khó͘ ūi Siōng Chú ê tiān chún-pī kim saⁿ-chheng sì-pah kong-tùn, gûn saⁿ-bān sì-chheng kong-tùn, chōe kah bōe-chhìn--tit ê tâng kap thih, koh ū chio̍h kap bo̍k-châi; chiah-ê í-gōa lí thang koh ke-thiⁿ.

^15-16 Lí mā ū chin chōe sai-hū: Phah-chio̍h--ê, thô͘-chúi--ê, choh-ba̍k--ê, í-ki̍p chin chōe gâu ēng kim, gûn, tâng, thih chòe ta̍k-khoán kang-gē ê sai-hū. Lí tio̍h khí-lâi khai-sí chòe kang. Goān Siōng Chú kap lí tông-chāi!”

¹⁷ Tāi-pi̍t koh bēng-lēng Í-sek-lia̍t só͘-ū ê koaⁿ-oân pang-chān i ê kiáⁿ Só͘-lô-bûn, kóng,

¹⁸ “Siōng Chú — lín ê Siōng-tè kiám bô kap lín tông-chāi? Kiám bô hō͘ lín kok-kéng pêng-an? Siōng Chú í-keng chiong chit-ê tōe ê chū-bîn kau hō͘ góa tī-lí, chit-ê tōe kap chū-bîn mā kui-sūn Siōng Chú kap I ê chú-bîn.

¹⁹ Taⁿ lín tio̍h choân-sim choân-chêng chhē-kiû Siōng Chú — lín ê Siōng-tè, koh tio̍h khí-lâi khí-chō Chú Siōng-tè ê sèng-só͘, thang chiong Siōng Chú ê iok-kūi kap Siōng-tè sèng ê khì-khū, poaⁿ-ji̍p hōng Siōng Chú ê miâ beh khí-chō ê sèng-tiān.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan