Bìoball air-loidhne

歷代志上卷 21 - 現代台語譯本羅馬字版

Tāi-pi̍t Tiâu-cha Hō͘-kháu
( 2 Sat 24.1-17 )

¹ Sat-tàn khí-lâi kong-kek Í-sek-lia̍t-lâng, kek-tōng Tāi-pi̍t tiâu-cha Í-sek-lia̍t-lâng ê jîn-kháu.

² Tāi-pi̍t tùi Iok-ap kap kun-tūi ê léng-siù kóng, “Lín tùi Pia̍t-sī-pa kàu Tān tiám-sǹg Í-sek-lia̍t-lâng ê jîn-kháu, hō͘ góa chai choân-kok jîn-bîn ê sò͘-bo̍k.”

³ Iok-ap kóng, “Goān Siōng Chú hō͘ I ê chú-bîn pí hiān-chāi cheng-ka pah-pē. Góa ê chú góa ê ông, in kiám m̄-sī góa ê chú ê jîn-bîn? Góa ê chú sī-án-chóaⁿ ài-beh chòe chit-ê tāi-chì? Sī-án-chóaⁿ beh hō͘ Í-sek-lia̍t hām-lo̍h chōe?”

⁴ Ông kian-chhî i ê bēng-lēng. Iok-ap chiū kiâⁿ-thàu Í-sek-lia̍t choân-kok tiâu-cha, āu-lâi tò-lâi Iâ-lō͘-sat-léng.

⁵ Iok-ap chiong tiám-sǹg ê jîn-sò͘ pò-kò Tāi-pi̍t. Í-sek-lia̍t-lâng gia̍h-to ê chiàn-sū ū chi̍t-pah-cha̍p-bān, Iû-tāi-lâng ū sì-cha̍p-chhit-bān.

⁶ M̄-kú Iok-ap bô tiám-sǹg Lī-bī chi-cho̍k kap Piān-ngá-bín chi-cho̍k ê jîn-sò͘, in-ūi i iàm-ò͘ⁿ ông chit-ê bēng-lēng.

⁷ Tāi-pi̍t chòe ê chit-hāng tāi-chì Siōng-tè khòaⁿ-chòe pháiⁿ, chiū hêng-hoa̍t Í-sek-lia̍t.

⁸ Tāi-pi̍t tùi Siōng-tè kóng, “Góa chòe chit-ê tāi-chì hoān chin tōa ê chōe. Kiû lí tû-khì lí lô͘-po̍k ê chōe, in-ūi góa án-ni chòe chin gōng.”

⁹ Siōng Chú hoan-hù Tāi-pi̍t ê sian-kiàn Ka-tek, kóng,

¹⁰ “Lí khì kā Tāi-pi̍t kóng, Siōng Chú án-ni kóng, ‘Góa ēng saⁿ hāng chai-hō hō͘ lí kéng chi̍t hāng, góa chiū chiàu án-ni chòe.’”

¹¹ Ka-tek lâi kā Tāi-pi̍t kóng, “Siōng Chú án-ni kóng, ‘Lí ka-kī kéng:

¹² Saⁿ nî ê ki-hng; á-sī thâi-su tùi-te̍k, hō͘ tùi-te̍k tui-sat saⁿ kò-ge̍h; á-sī saⁿ ji̍t kú hō͘ Siōng Chú ēng I ê kiàm, chiū-sī un-e̍k, kàng-lîm tī Í-sek-lia̍t choân-kok, si-hêng húi-bia̍t.’ Taⁿ lí tio̍h siūⁿ, hō͘ góa thang hôe-ho̍k chhe góa lâi Hit-ūi.”

¹³ Tāi-pi̍t kā Ka-tek kóng, “Góa chin ûi-lân; góa lêng-khó hō͘ Siōng Chú ka-kī kā góa hêng-hoa̍t, in-ūi I ū hong-sēng ê lîn-bín; góa m̄-goān hām-lo̍h tī lâng ê chhiú.”

¹⁴ Siōng Chú chiū kàng un-e̍k tī Í-sek-lia̍t; Í-sek-lia̍t sí chhit-bān lâng.

¹⁵ Siōng-tè chhe chi̍t ê thiⁿ-sài khì Iâ-lō͘-sat-léng beh kā i húi-bia̍t. Tng thiⁿ-sài beh húi-bia̍t ê sî, Siōng Chú khòaⁿ--kìⁿ chiū kái-piàn sim-ì, bô beh kè-sio̍k kàng chit-ê chai-hō, chiū kā teh chip-hêng húi-bia̍t ê thiⁿ-sài kóng, “Thêng-chhiú! Kàu-gia̍h lah!” Hit-sî, Siōng Chú ê sù-chiá khiā tī Iâ-pò͘-su-lâng A-lô-ná ê ngó͘-kok-tiûⁿ.

¹⁶ Tāi-pi̍t gia̍h-thâu khòaⁿ-kìⁿ Siōng Chú ê sù-chiá khiā tī pòaⁿ-khong-tiong, chhiú gia̍h pu̍ih-chhut ê kiàm, chí ǹg Iâ-lō͘-sat-léng. Tāi-pi̍t kap tiúⁿ-ló lóng chhēng môa-saⁿ, bīn phak tī thô͘-kha.

¹⁷ Tāi-pi̍t tùi Siōng-tè kóng, “Hā-lēng tiâu-cha hō͘-kháu--ê kiám m̄-sī góa? Hoān-chōe chòe chit-ê pháiⁿ tāi-chì--ê sī góa, chiah-ê bû-ko͘ ê jîn-bîn lóng bô chòe sím-mi̍h m̄-tio̍h. Kiû Siōng Chú — góa ê Siōng-tè ê chhiú hêng-hoa̍t góa kap góa ê ka-cho̍k, m̄-thang kàng un-e̍k kong-kek lí ê chú-bîn.”

Tāi-pi̍t ūi Siōng Chú Khí Chi̍t Chō Chè-tôaⁿ
( 2 Sat 24.18-25 )

¹⁸ Siōng Chú ê sù-chiá hoan-hù Ka-tek, kiò Tāi-pi̍t chiūⁿ-khì Iâ-pò͘-su-lâng A-lô-ná ê ngó͘-kok-tiûⁿ, tī hia ūi Siōng Chú khí chi̍t chō chè-tôaⁿ.

¹⁹ Tāi-pi̍t chiū chiàu Ka-tek hōng Siōng Chú ê miâ só͘ kóng ê ōe chiūⁿ--khì.

²⁰ Hit-sî A-lô-ná teh phah-be̍h, oa̍t-thâu khòaⁿ-kìⁿ thiⁿ-sài; kap i chòe-hé tī hia ê sì ê kiáⁿ cháu-khì bih.

²¹ Tāi-pi̍t khì kàu A-lô-ná hia; A-lô-ná khòaⁿ-tio̍h Tāi-pi̍t, chiū tùi ngó͘-kok-tiûⁿ chhut-lâi gêng-chiap, phak tī thô͘-kha pài Tāi-pi̍t.

²² Tāi-pi̍t tùi A-lô-ná kóng, “Chhiáⁿ lí chiong chit-ê ngó͘-kok-tiûⁿ bōe góa, hō͘ góa thang tī chia ūi Siōng Chú khí chi̍t chō chè-tôaⁿ, hō͘ choân-kok ê un-e̍k thêng-chí. Góa ōe ēng choân-gia̍h ê kè-chîⁿ kā lí bóe.”

²³ A-lô-ná tùi Tāi-pi̍t kóng, “Góa ê chú góa ê ông, chhiáⁿ lí the̍h-khì ēng, chiàu lí khòaⁿ-chòe hó--ê khì chòe. Góa ēng gû hō͘ lí chòe sio-hòa-chè, ēng phah ngó͘-kok ê khì-khū chòe chhâ sio, be̍h-á chòe sò͘-chè; chiah-ê góa lóng sàng hō͘ ông.”

²⁴ Tāi-pi̍t-ông tùi A-lô-ná kóng, “M̄-thang, góa it-tēng beh ēng choân-gia̍h ê kè-chîⁿ kā lí bóe. Góa bōe-ēng-tit the̍h lí ê mi̍h hiàn hō͘ Siōng Chú, ēng pe̍h-pe̍h tit--tio̍h ê mi̍h hiàn chòe sio-hòa-chè.”

²⁵ Tāi-pi̍t chiū ēng la̍k-chheng poeh-pah kong-khek ê n̂g-kim kā A-lô-ná bóe hit-tè tōe.

²⁶ Tāi-pi̍t tī hia ūi Siōng Chú khí chi̍t chō chè-tôaⁿ, hiàn sio-hòa-chè kap pêng-an-chè, koh kiû-kiò Siōng Chú. Siōng Chú thiaⁿ i ê kî-tó, tùi thiⁿ kàng-hé sio chè-tôaⁿ ê chè-mi̍h.

²⁷ Siōng Chú bēng-lēng hit-ê sù-chiá, i chiū chiong kiàm siu--khí-lâi.

²⁸ Tāi-pi̍t khòaⁿ-tio̍h Siōng Chú ū tī Iâ-pò͘-su-lâng A-lô-ná ê ngó͘-kok-tiûⁿ thiaⁿ i ê kî-tó, chiū tī hia hiàn-chè.

²⁹ Mô͘-se tī khòng-iá só͘ chō Siōng Chú ê hōe-bō͘ kap sio-hòa-chè ê chè-tôaⁿ, hit-ê sî-chūn lóng tī Ki-piàn ê soaⁿ-thâu-tôaⁿ.

³⁰ M̄-kú Tāi-pi̍t m̄-káⁿ khì Ki-piàn kiû-mn̄g Siōng-tè, in-ūi kiaⁿ Siōng Chú sù-chiá ê kiàm.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan