Bìoball air-loidhne

歷代志上卷 19 - 現代台語譯本羅馬字版

Phah-pāi A-bûn-lâng kap Sū-lī-a-lâng
( 2 Sat 10.1-19 )

¹ Āu-lâi, A-bûn-lâng ê ông Ná-hat sí, i ê kiáⁿ Hap-lūn sòa-chiap i choh-ông.

² Tāi-pi̍t kóng, “Góa beh hó khoán-thāi Hap-lūn, in-ūi i ê lāu-pē Ná-hat í-chêng hó khoán-thāi góa.” Tāi-pi̍t in-ūi Hap-lūn ê lāu-pē sí, chiū chhe sù-chiá khì kā i ùi-būn. Tāi-pi̍t ê jîn-sîn kàu A-bûn-lâng ê kéng-lāi kìⁿ Hap-lūn, beh ùi-būn i.

³ M̄-kú A-bûn-lâng ê léng-siù tùi Hap-lūn kóng, “Tāi-pi̍t phài lâng lâi ùi-būn lí, lí siūⁿ-kóng i chin-chiàⁿ chun-kèng lí ê lāu-pē o͘h? I ê pō͘-hā lâi kìⁿ lí, kiám m̄-sī beh siông-sè cheng-thàm chit-ê siâⁿ, khòaⁿ beh án-chóaⁿ kā lán cheng-ho̍k?”

⁴ Hap-lūn chiū lia̍h Tāi-pi̍t ê jîn-sîn, kā in ê chhùi-chhiu thì--khí-lâi, koh chián-tn̄g in ê saⁿ ê ē-pòaⁿ-chat, hō͘ in lō͘-chhut hā-thé, jiân-āu kóaⁿ in tò--khì.

⁵ Ū lâng chiong chiah-ê lâng só͘ tú--tio̍h-ê tùi Tāi-pi̍t pò-kò, Tāi-pi̍t chiū phài lâng khì chiap in, in-ūi in kám-kak hui-siông kiàn-siàu. Ông kóng, “Lâu tiàm Iâ-lī-ko, thèng-hāu chhùi-chhiu hoat-tn̂g chiah tò--lâi.”

⁶ A-bûn-lâng chai in jiá Tāi-pi̍t siū-khì; Hap-lūn kap A-bûn-lâng chiū phài lâng tòa saⁿ-bān sì-chheng kong-kun ê gûn, khì Bí-soh-put-ta̍t-bí-a, Sū-lī-a Má-ka, Só-pa, chhiàⁿ chiàn-chhia kap bé-peng.

⁷ In chhiàⁿ saⁿ-bān nn̄g-chheng tâi ê chiàn-chhia, í-ki̍p Má-ka-ông kap i ê kun-peng; in chiū lâi chat-iâⁿ tī Bí-tí-pa ê thâu-chêng. A-bûn-lâng mā tùi in ê siâⁿ chhut--lâi, chū-chi̍p beh kau-chiàn.

⁸ Tāi-pi̍t thiaⁿ--kìⁿ, chiū phài Iok-ap chhōa só͘-ū ióng-béng ê kun-tūi chhut--khì.

⁹ A-bûn-lâng chhut-lâi tī siâⁿ-mn̂g ê thâu-chêng pâi-tīn; kî-tha hiah-ê ông lēng-gōa tī iá-gōa pâi-tīn.

¹⁰ Iok-ap khòaⁿ-kìⁿ i ê chêng-āu lóng ū tùi-te̍k pâi-tīn, chiū tùi Í-sek-lia̍t cheng-peng ê tiong-kan koh-chài kéng chi̍t-kóa ióng-sū chhut--lâi, pâi-tīn beh tí-te̍k Sū-lī-a-lâng.

¹¹ Iok-ap chiong kî-tha ê peng-sū kau hō͘ i ê sió-tī A-pí-su, in chiū biān-tùi A-bûn-lâng pâi-tīn.

¹² Iok-ap tùi A-pí-su kóng, “Sū-lī-a-lâng nā pí góa khah kiông, lí tio̍h lâi pang-chān góa; A-bûn-lâng nā pí lí khah kiông, góa ōe khì pang-chān lí.

¹³ Tio̍h kian-kiông! Tio̍h ūi lán ê tông-pau kap lán Siōng-tè ê siâⁿ ióng-kám chhut-chiàn. Siōng Chú ōe chiàu I khòaⁿ-chòe hó--ê khì chòe.”

¹⁴ Iok-ap chhōa i ê kun-tūi chìn-chêng kap Sū-lī-a-lâng kau-chiàn; Sū-lī-a-lâng chiàn-pāi, chiū tī Iok-ap ê bīn-chêng tô-cháu.

¹⁵ A-bûn-lâng khòaⁿ-tio̍h Sū-lī-a-lâng tô-cháu, mā tī Iok-ap ê sió-tī A-pí-su bīn-chêng tô-cháu ji̍p-siâⁿ. Iok-ap chiū tò-tńg-khì Iâ-lō͘-sat-léng.

¹⁶ Sū-lī-a-lâng khòaⁿ-tio̍h ka-kī thâi-su Í-sek-lia̍t-lâng, chiū phài sù-chiá khì Iù-hoat-la-tí-hô hit-pêng tiàu Sū-lī-a ê kun-tūi lâi; Hap-tāi-tí-siā ê chiong-kun Sok-hoat chhōa kun-tūi lâi.

¹⁷ Ū lâng pò-kò Tāi-pi̍t, i chiū tiàu-chi̍p Í-sek-lia̍t choân-kun kè Iok-tàn-hô, biān-tùi Sū-lī-a-lâng pâi-tīn. Sū-lī-a-lâng chiū kap Tāi-pi̍t kau-chiàn.

¹⁸ Sū-lī-a-lâng thâi-su Í-sek-lia̍t-lâng; Tāi-pi̍t thâi-sí Sū-lī-a ê chiàn-chhia-peng chhit-chheng lâng, pō͘-peng sì-bān, koh thâi-sí Sū-lī-a ê chiong-kun Sok-hoat.

¹⁹ Hap-tāi-tí-siā ê jîn-sîn khòaⁿ-tio̍h in thâi-su Í-sek-lia̍t-lâng, chiū kap Tāi-pi̍t kóng-hô, kui-sūn i. Tùi án-ni, Sū-lī-a-lâng bô koh pang-chān A-bûn-lâng.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan