Bìoball air-loidhne

歷代志上卷 18 - 現代台語譯本羅馬字版

Siōng Chú Hō͘ Tāi-pi̍t Tek-sèng
( 2 Sat 8.1-18 )

¹ Āu-lâi, Tāi-pi̍t kong-kek Hui-lī-sū-lâng, hō͘ in hâng-ho̍k; koh tùi Hui-lī-sū-lâng ê chhiú chhú-tio̍h Ka-te̍k kap hù-kūn ê chng-siā.

² Tāi-pi̍t koh phah-pāi Mô͘-ap-lâng, Mô͘-ap-lâng chiū kui-sūn Tāi-pi̍t, koh chìn-kòng.

³ Só-pa-ông Hap-tāi-tí-siā khì Iù-hoat-la-tí-hô, beh kian-kò͘ i ê thóng-tī-koân ê sî, Tāi-pi̍t kong-kek i, ti̍t-kàu Hap-má.

⁴ Tāi-pi̍t chhiúⁿ i ê chiàn-chhia chi̍t-chheng tâi, bé-peng chhit-chheng, pō͘-peng nn̄g-bān, koh chām-tn̄g chiàn-chhia ê bé ê kha-kun; chí-ū lâu kàu-gia̍h thang thoa chi̍t-pah tâi chiàn-chhia ê bé.

⁵ Tāi-má-sū-kek ê Sū-lī-a-lâng lâi pang-chān Só-pa-ông Hap-tāi-tí-siā, Tāi-pi̍t chiū thâi-sí Sū-lī-a-lâng nn̄g-bān nn̄g-chheng.

⁶ Tùi án-ni, Tāi-pi̍t tī Tāi-má-sū-kek ê Sū-lī-a siat-li̍p kun-iâⁿ. Sū-lī-a-lâng chiū kui-sūn Tāi-pi̍t, koh chìn-kòng. Tāi-pi̍t bô-lūn khì tó-ūi, Siōng Chú lóng hō͘ i tek-sèng.

⁷ Tāi-pi̍t chiong Hap-tāi-tí-siā ê pō͘-hā só͘ ēng kim ê tún-pâi lóng tòa-lâi Iâ-lō͘-sat-léng.

⁸ Tāi-pi̍t-ông koh tùi Hap-tāi-tí-siā ê siâⁿ Thê-pa kap Kun, the̍h chin chōe tâng. Āu-lâi, Só͘-lô-bûn ēng chiah-ê chō tâng-hái, tâng-thiāu, kap só͘-ū ê tâng-khì.

⁹ Hap-má-ông Tô-í thiaⁿ-kìⁿ Tāi-pi̍t phah-iâⁿ Hap-tāi-tí-siā ê choân-kun,

¹⁰ chiū chhe i ê kiáⁿ Iok-lân tòa kim-khì, gûn-khì, tâng-khì khì kìⁿ Tāi-pi̍t-ông, kā i chhéng-an, chiok-hō i phah-iâⁿ Hap-tāi-tí-siā, in-ūi Hap-tāi-tí-siā kap Tô-í siông-siông kau-chiàn.

¹¹ Tāi-pi̍t-ông chiū chiong chiah-ê mi̍h, kap í-chêng i thâi-iâⁿ lia̍t-kok só͘ tit--tio̍h ê kim-gûn, chiū-sī tùi Í-tong, Mô͘-ap, A-bûn-lâng, Hui-lī-sū-lâng, A-má-le̍k-lâng tit--tio̍h-ê, lóng sèng-hòa hiàn hō͘ Siōng Chú.

¹² Sé-lō͘-ngá ê kiáⁿ A-pí-su tī Iâm ê Soaⁿ-kok phah-sí Í-tong-lâng chi̍t-bān poeh-chheng.

¹³ Tāi-pi̍t tī Í-tong choân-tōe siat kun-iâⁿ; Í-tong-lâng lóng kui-sūn i. Tāi-pi̍t bô-lūn khì tó-ūi, Siōng Chú lóng hō͘ i sèng-lī.

¹⁴ Tāi-pi̍t chòe choân Í-sek-lia̍t ê ông, ēng kong-pêng chèng-gī tī-lí i só͘-ū ê jîn-bîn.

¹⁵ Sé-lō͘-ngá ê kiáⁿ Iok-ap chòe goân-sòe, A-hi-lu̍t ê kiáⁿ Iok-sa-hoat chòe sú-koaⁿ.

¹⁶ A-hi-tu̍t ê kiáⁿ Sat-tok kap A-pí-a-tha ê kiáⁿ A-hi-bí-le̍k chòe chè-si; Se-lâi-ngá chòe su-kì.

¹⁷ Iâ-hô-iâ-tāi ê kiáⁿ Pí-ná-ngá choh-thâu chí-hui Ki-lī-thê-lâng kap Pí-lī-thê-lâng. Tāi-pi̍t ê kiáⁿ lóng chòe ông-sek chham-bô͘.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan