Bìoball air-loidhne

歷代志上卷 17 - 現代台語譯本羅馬字版

Ná-tan Hō͘ Tāi-pi̍t ê Sìn-sit
( 2 Sat 7.1-17 )

¹ Tāi-pi̍t tòa tī ông-kiong, i tùi sian-ti Ná-tan kóng, “Lí khòaⁿ, góa tòa tī pek-hiuⁿ-chhâ ê kiong-tiān, m̄-kú Siōng Chú ê iok-kūi tiàm tī pò͘-pîⁿ.”

² Ná-tan tùi Tāi-pi̍t kóng, “Lí siūⁿ-beh án-chóaⁿ, chiū thang khì chòe, in-ūi Siōng-tè kap lí tông-chāi.”

³ Hit-mî Siōng-tè ê ōe lîm-kàu Ná-tan, kóng,

⁴ “Lí khì kā Tāi-pi̍t góa ê po̍k-jîn kóng, ‘Siōng Chú án-ni kóng: Lí m̄-thang khí sèng-tiān hō͘ góa tòa.

⁵ Tùi góa chhōa Í-sek-lia̍t-lâng chiūⁿ-lâi chia kàu hiān-chāi, góa m̄-bat tòa tī tiān--ni̍h, lóng sī tùi chit-ê pò͘-pîⁿ kàu hit-ê pò͘-pîⁿ, tùi chit-ê hōe-bō͘ kàu hit-ê hōe-bō͘.

⁶ Góa kap Í-sek-lia̍t-lâng tâng-kiâⁿ ê sî, kiám bat tùi tó chi̍t ê bo̍k-ióng góa ê chú-bîn ê sū-su kóng: Lín ná bô kā góa khí pek-hiuⁿ-chhâ ê tiān?’

⁷ “Taⁿ lí tio̍h kā góa ê po̍k-jîn Tāi-pi̍t kóng, ‘Siōng Chú — Bān-kun ê Thóng-sòe án-ni kóng: Góa tùi bo̍k-tiûⁿ kéng-tiàu lí, hō͘ lí bô koh chhī iûⁿ, sī beh hō͘ lí chòe góa ê chú-bîn Í-sek-lia̍t ê thóng-tī-chiá.

⁸ Lí bô-lūn khì tó-ūi, góa ōe kap lí tông-chāi, siau-bia̍t lí bīn-chêng só͘-ū ê tùi-te̍k. Góa it-tēng hō͘ lí ū miâ-siaⁿ, chhin-chhiūⁿ sè-kan ê úi-jîn hiah-ni̍h chhut-miâ.

^9-10 Góa beh ūi-tio̍h góa ê chú-bîn Í-sek-lia̍t chún-pī chi̍t ê só͘-chāi, kā in an-tùn, hō͘ in khiā-khí tī ka-kī ê só͘-chāi, bô koh siū kiáu-jiáu, bô koh chhin-chhiūⁿ chá-chêng góa bēng-lēng sū-su koán-lí góa ê chú-bîn Í-sek-lia̍t ê sî-tāi, siū hiong-ok ê lâng khi-ap. Góa beh hō͘ lí ê tùi-te̍k lóng hâng-ho̍k. Góa koh soan-pò͘, góa Siōng Chú beh kiàn-li̍p lí ê ông-tiâu.

¹¹ Kàu lí ê hè-siū móa, tńg-khì lí ê chó͘-sian hia ê sî, góa beh soán-li̍p lí ê hō͘-tāi, lí ê chi̍t ê kiáⁿ, lâi sòa-chiap lí, koh beh hō͘ i ê kok ún-kò͘.

¹² I beh ūi-tio̍h góa khí sèng-tiān; góa beh kian-kò͘ i ê ông-ūi ti̍t-kàu éng-oán.

¹³ Góa beh chòe i ê pē, i beh chòe góa ê kiáⁿ. Góa bô beh hō͘ góa ê chû-ài lī-khui i, chhin-chhiūⁿ góa bat hō͘ chû-ài lī-khui lí chêng hit-ê ông.

¹⁴ Góa mā beh hō͘ i éng-oán tī-lí góa ê chú-bîn kap góa ê kok; i ê ông-ūi ōe kian-kò͘ kàu éng-oán.’”

¹⁵ Ná-tan chiū chiàu Siōng-tè khé-sī ê ōe lóng kā Tāi-pi̍t kóng.

Tāi-pi̍t Kám-un ê Kî-tó
( 2 Sat 7.18-29 )

¹⁶ Tāi-pi̍t-ông chiū ji̍p-khì hōe-bō͘, chē tī Siōng Chú ê bīn-chêng, kóng, “Chú Siōng-tè, góa sī siáⁿ-lâng, góa ê ke sǹg sím-mi̍h, lí kèng-jiân chhōa góa kàu chit-ê tōe-ūi?

¹⁷ M̄-nā án-ni, Siōng-tè ah, lí koh koàn-kò͘ lí lô͘-po̍k ê ke ê chiong-lâi; Chú Siōng-tè ah, lí khoán-thāi góa chhin-chhiūⁿ chun-kùi ê lâng.

¹⁸ Lí chin chheng-chhó lí ê lô͘-po̍k, lí hō͘ lí ê lô͘-po̍k tit--tio̍h ê chun-kùi, góa Tāi-pi̍t iáu ū sím-mi̍h ōe thang kóng?

¹⁹ Siōng Chú ah, in-ūi lí ê lô͘-po̍k ê iân-kò͘, koh chiàu lí ê chí-ì, lí ū chòe chiah-ê tōa-sū, koh hō͘ lâng chai chiah-ê úi-tāi ê só͘-chòe.

²⁰ Siōng Chú ah, chiàu goán só͘ thiaⁿ--kìⁿ, bô chi̍t ê ōe-tàng kap lí pí, lí í-gōa bô Siōng-tè.

²¹ Sè-kan kiám ū chi̍t ê kok chhin-chhiūⁿ lí ê chú-bîn Í-sek-lia̍t? Siōng-tè lí ū kiù-sio̍k in, hō͘ in chiâⁿ-chòe lí ê chú-bîn. Lí chòe ke̍k-tōa koh thang-kiaⁿ ê sū, hō͘ lí ka-kī tit-tio̍h êng-iāu, in-ūi lí ū kóaⁿ-tio̍k lia̍t-pang lī-khui lí tùi Ai-ki̍p kái-kiù--chhut-lâi ê chú-bîn.

²² Lí hō͘ lí ê jîn-bîn Í-sek-lia̍t éng-oán chòe lí ka-kī ê chú-bîn; Siōng Chú ah, lí koh chòe in ê Siōng-tè.

²³ “Siōng Chú, lí tùi lí ê lô͘-po̍k kap i ê ke ê èng-ún, goān lí chiàu lí só͘ kóng--ê si̍t-hiān, hō͘ i éng-oán ún-kò͘.

²⁴ Goān lí ê miâ éng-oán kian-kò͘, siū chun chòe tōa, kóng, ‘Siōng Chú — Bān-kun ê Thóng-sòe Í-sek-lia̍t ê Siōng-tè, chin-chiàⁿ sī Í-sek-lia̍t ê Siōng-tè!’ Koh lí ê lô͘-po̍k Tāi-pi̍t ê ke beh tī lí ê bīn-chêng kian-li̍p.

²⁵ Góa ê Siōng-tè ah, in-ūi lí ū khé-sī lí ê lô͘-po̍k, lí beh kiàn-li̍p i ê ông-tiâu, só͘-í lí ê lô͘-po̍k hó-táⁿ tī lí ê bīn-chêng kî-tó.

²⁶ “Siōng Chú, chí-ū lí sī Siōng-tè! Lí ēng chit-ê hok-khì èng-ún lí ê lô͘-po̍k.

²⁷ Taⁿ, lí hoaⁿ-hí sù-hok lí lô͘-po̍k ê ke, hō͘ i tī lí ê bīn-chêng éng-oán ún-kò͘. Siōng Chú, in-ūi lí í-keng sù-hok, lí ōe éng-oán tit-tio̍h chheng-chàn!”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan