Bìoball air-loidhne

歷代志上卷 15 - 現代台語譯本羅馬字版

Chún-pī Gêng-chiap Iok-kūi

¹ Tāi-pi̍t tī Tāi-pi̍t-siâⁿ ūi ka-kī khí kúi-nā keng kiong-tiān, koh ūi Siōng-tè ê iok-kūi chún-pī só͘-chāi, tah chi̍t ê pò͘-pîⁿ.

² Hit-sî Tāi-pi̍t kóng, “Lī-bī-lâng í-gōa, m̄-thang ū lâng kng Siōng-tè ê iok-kūi, in-ūi Siōng Chú kéng Lī-bī-lâng kng I ê iok-kūi, koh éng-oán ho̍k-sāi I.”

³ Tāi-pi̍t tiàu-chi̍p Í-sek-lia̍t chèng-lâng lâi Iâ-lō͘-sat-léng, beh chiong Siōng Chú ê iok-kūi kng-lâi i chún-pī ê só͘-chāi.

⁴ Tāi-pi̍t koh tiàu-chi̍p A-lûn ê hō͘-tāi kap Lī-bī-lâng:

⁵ Ko-hat ê hō͘-tāi ū siú-léng O͘-lia̍t kap i ê chhin-cho̍k chi̍t-pah jī-cha̍p lâng.

⁶ Bí-la-lī ê hō͘-tāi ū siú-léng A-sat-ngá kap i ê chhin-cho̍k nn̄g-pah jī-cha̍p lâng.

⁷ Kek-sūn ê hō͘-tāi ū siú-léng Iok-ní kap i ê chhin-cho̍k chi̍t-pah saⁿ-cha̍p lâng.

⁸ Í-lī-sat-hoán ê hō͘-tāi ū siú-léng Sī-má-ngá kap i ê chhin-cho̍k nn̄g-pah lâng.

⁹ Hi-pek-lûn ê hō͘-tāi ū siú-léng Í-lī-gia̍p kap i ê chhin-cho̍k poeh-cha̍p lâng.

¹⁰ O͘-siat ê hō͘-tāi ū siú-léng A-bí-ná-ta̍t kap i ê chhin-cho̍k chi̍t-pah cha̍p-jī lâng.

¹¹ Tāi-pi̍t tiàu chè-si Sat-tok kap A-pí-a-tha, í-ki̍p Lī-bī-lâng O͘-lia̍t, A-sat-ngá, Iok-ní, Sī-má-ngá, Í-lī-gia̍p, kap A-bí-ná-ta̍t lâi.

¹² Tùi in kóng, “Lín sī Lī-bī-lâng ê cho̍k-tiúⁿ, lín kap lín ê chhin-cho̍k tio̍h ka-kī sèng-hòa kui Siōng Chú, chiah thang chiong Siōng Chú — Í-sek-lia̍t ê Siōng-tè ê iok-kūi, kng-lâi góa ūi-tio̍h i chún-pī ê só͘-chāi.

¹³ In-ūi lín chêng hit-piàn bô kng iok-kūi, lán mā bô chiàu kui-kú kiû-mn̄g I, só͘-í Siōng Chú — lán ê Siōng-tè siū-khì kong-kek lán.”

¹⁴ Tùi án-ni chè-si kap Lī-bī-lâng ūi-tio̍h beh chiong Siōng Chú — Í-sek-lia̍t ê Siōng-tè ê iok-kūi kng--lâi, chiū ka-kī sèng-hòa kui Siōng Chú.

¹⁵ Lī-bī ê kiáⁿ-sun chiàu Siōng Chú hoan-hù Mô͘-se ê bēng-lēng, ēng kǹg kng Siōng-tè ê iok-kūi tī keng-thâu téng.

¹⁶ Tāi-pi̍t hoan-hù Lī-bī ê cho̍k-tiúⁿ hun-phài in ê chhin-cho̍k hū-chek chhiùⁿ-koa, ēng khîm, sek, kap poa̍h chàu-ga̍k, tōa-siaⁿ hoaⁿ-hí chhiùⁿ-koa.

¹⁷ Lī-bī-lâng chiū phài Iok-ní ê kiáⁿ Hi-bān, i ê chhin-chiâⁿ Pí-lī-ka ê kiáⁿ A-sat, kap in ê chhin-cho̍k Bí-la-lī ê kiáⁿ-sun tiong Kó͘-sa-ngá ê kiáⁿ Í-thàm.

¹⁸ Tē-jī pan ū in ê chhin-cho̍k Sat-ka-lī-a, Ngá-sih, Sī-bí-la-boa̍t, Iâ-hiat, O͘-nî, Í-lī-ap, Pí-ná-ngá, Má-se-ngá, Má-tha-thê-ngá, Í-lī-hui-lī-hō͘, Bî-khek-nî-ngá, í-ki̍p kò͘-mn̂g ê Gô-pia̍t Í-tong kap Iâ-lī.

¹⁹ Án-ni phài chhiùⁿ-koa ê Hi-bān, A-sat, Í-thàm, phah-poa̍h phōaⁿ-chhiùⁿ.

²⁰ Koh phài Sat-ka-lī-a, Ngá-sih, Sī-bí-la-boa̍t, Iâ-hiat, O͘-nî, Í-lī-ap, Má-se-ngá, Pí-ná-ngá tôaⁿ-sek, tiāu ēng “siàu-lú”.

²¹ Koh phài Má-tha-thê-ngá, Í-lī-hui-lī-hō͘, Bî-khek-nî-ngá, Gô-pia̍t Í-tong, Iâ-lī, A-sat-se-ngá ēng khîm chí-hui, tiāu kàng poeh tō͘.

²² Lī-bī-lâng ê siú-léng Ki-ná-nî-ngá hū-chek im-ga̍k; i cheng-thong im-ga̍k, kà lâng chhiùⁿ-koa.

²³ Pí-lī-ka kap Í-lī-ka-ná sī iok-kūi ê siú-ōe.

²⁴ Chè-si Sī-pa-nî, Iok-sa-hoat, Ná-thán-gia̍p, A-má-sài, Sat-ka-lī-a, Pí-ná-ngá, Í-lī-í-siā, tī Siōng-tè ê iok-kūi chêng pûn lat-pah. Gô-pia̍t Í-tong kap Iâ-hi-a mā-sī iok-kūi ê siú-ōe.

Iok-kūi Chhian-ji̍p Iâ-lō͘-sat-léng
( 2 Sat 6.12-22 )

²⁵ Tùi án-ni, Tāi-pi̍t kap Í-sek-lia̍t ê tiúⁿ-ló, chí-hui-koaⁿ, lóng khì Gô-pia̍t Í-tong ê chhù, hoaⁿ-hoaⁿ-hí-hí chiong Siōng Chú ê iok-kūi tùi hia chiap--lâi.

²⁶ Siōng-tè pang-chān kng iok-kūi ê Lī-bī-lâng, in chiū hiàn kang ê gû chhit chiah, kang ê iûⁿ chhit chiah.

²⁷ Tāi-pi̍t kap kng iok-kūi ê Lī-bī-lâng, hū-chek im-ga̍k ê Ki-ná-nî-ngá, í-ki̍p chhiùⁿ-koa ê lâng lóng chhēng iù-môa-pò͘ ê tn̂g-saⁿ. Tāi-pi̍t koh chhēng iù-môa-pò͘ ê í-hut-tek.

²⁸ Án-ni, Í-sek-lia̍t chèng-lâng hoan-ho͘, pûn sàu-kak, pûn lat-pah, phah-poa̍h, tôaⁿ-khîm, tôaⁿ-sek, kng Siōng Chú ê iok-kūi chiūⁿ--lâi.

²⁹ Siōng Chú ê iok-kūi ji̍p Tāi-pi̍t-siâⁿ ê sî, Sò-lô ê cha-bó͘-kiáⁿ Bí-kah tùi thang-á khòaⁿ--chhut-khì, khòaⁿ-tio̍h Tāi-pi̍t-ông ia̍h-thiàu-ia̍h-tiô, chiū khòaⁿ-khin i.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan