Bìoball air-loidhne

歷代志上卷 14 - 現代台語譯本羅馬字版

Tāi-pi̍t tī Iâ-lō͘-sat-léng ê Oa̍h-tāng
( 2 Sat 5.11-16 )

¹ Thài-ní-ông Hi-lân phài sù-chiá tòa pek-hiuⁿ-chhâ, kap thô͘-chúi sai-hū, choh-ba̍k sai-hū khì Tāi-pi̍t hia, kā Tāi-pi̍t khí kiong-tiān.

² Tāi-pi̍t chiū chai Siōng Chú kian-li̍p i chòe Í-sek-lia̍t-ông, koh ūi-tio̍h Siōng Chú ê chú-bîn Í-sek-lia̍t hō͘ i ê kok kiông-sēng.

³ Tāi-pi̍t tī Iâ-lō͘-sat-léng koh chhōa kúi-nā ê bó͘. Tāi-pi̍t koh siⁿ hāu-siⁿ kap cha-bó͘-kiáⁿ.

⁴ Tī Iâ-lō͘-sat-léng siⁿ ê kiáⁿ sī Sa-bō͘-a, Sok-pā, Ná-tan, Só͘-lô-bûn,

⁵ Ek-hat, Í-lī-su-a, Í-lī-hoat-lia̍t,

⁶ Ná-ka, Nî-húi, Ngá-hui-a,

⁷ Í-lī-sa-má, Pí-lī-ngá-tāi, Í-lī-hoat-lia̍t.

Thâi-iâⁿ Hui-lī-sū-lâng
( 2 Sat 5.17-25 )

⁸ Hui-lī-sū-lâng thiaⁿ-tio̍h Tāi-pi̍t siū boah-iû soán-li̍p chòe choân Í-sek-lia̍t ê ông, chiū choân-le̍k chiūⁿ-lâi tui-chhē Tāi-pi̍t. Tāi-pi̍t thiaⁿ--tio̍h chiū chhut-khì gêng-chiàn.

⁹ Hui-lī-sū-lâng lâi chhim-hoān Lī-hoa̍t-im Soaⁿ-kok.

¹⁰ Tāi-pi̍t mn̄g Siōng-tè kóng, “Góa kiám thang chìn-kong Hui-lī-sū-lâng? Lí kiám beh chiong in kau tī góa ê chhiú?” Siōng Chú kā Tāi-pi̍t kóng, “Lí khì, góa ōe chiong in kau tī lí ê chhiú.”

¹¹ Hui-lī-sū-lâng chiūⁿ-lâi Pa-le̍k Pí-la-sim, Tāi-pi̍t tī hia kā in phah-pāi; Tāi-pi̍t kóng, “Siōng-tè ēng góa ê chhiú chhiong-sòaⁿ góa ê tùi-te̍k, chhin-chhiūⁿ tōa-chúi kā thê-hōaⁿ chhiong-phòa.” In-ūi án-ni, hit-ê só͘-chāi chiū kiò-chòe Pa-le̍k Pí-la-sim.

¹² Hui-lī-sū-lâng kā in ê ngó͘-siōng tàn tī hia; Tāi-pi̍t bēng-lēng lâng kā hiah-ê ngó͘-siōng pàng-hé sio.

¹³ Hui-lī-sū-lâng koh lâi chhim-hoān Lī-hoa̍t-im Soaⁿ-kok.

¹⁴ Tāi-pi̍t mn̄g Siōng-tè. Siōng-tè kā i kóng, “M̄-thang chiàⁿ-bīn chìn-kong; tio̍h se̍h-kè in ê āu-bīn, tī sng-châi-chhiū-nâ ê thâu-chêng kā in kong-kek.

¹⁵ Lí thiaⁿ-tio̍h chhiū-bé ū hêng-kun ê siaⁿ, chiū tio̍h chhut-peng chìn-kong, in-ūi Siōng-tè í-keng tī lí ê thâu-chêng kong-kek Hui-lī-sū-lâng ê kun-tūi.”

¹⁶ Tāi-pi̍t chiū chiàu Siōng-tè ê bēng-lēng khì chòe, tùi Ki-piàn kong-kek Hui-lī-sū-lâng ê kun-tūi, ti̍t-kàu Ki-sek.

¹⁷ Tāi-pi̍t ê miâ-siaⁿ thoân kàu bān-kok; Siōng Chú hō͘ lia̍t-kok lóng kiaⁿ i.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan