Bìoball air-loidhne

歷代志上卷 13 - 現代台語譯本羅馬字版

Iok-kūi Chhian-chhut Ki-lia̍t Iâ-lîm
( 2 Sat 6.1-11 )

¹ Tāi-pi̍t kap chí-hui-koaⁿ, kun-koaⁿ, í-ki̍p só͘-ū ê léng-siù chham-siông.

² Tāi-pi̍t tùi Í-sek-lia̍t choân hōe-chiòng kóng, “Lín nā khòaⁿ-chòe hó, koh sī chhut tī Siōng Chú — lán ê Siōng-tè ê ì-sù, lán tio̍h phài lâng khì Í-sek-lia̍t choân-tōe, khì kìⁿ bô tī lán chia ê chhin-cho̍k, í-ki̍p tòa tī ū chháu-po͘ ê siâⁿ ê chè-si kap Lī-bī-lâng, hō͘ in lóng chū-chi̍p lâi chia.

³ Lán chiū thang chiong lán ê Siōng-tè ê iok-kūi chhian-lâi chia; in-ūi tī Sò-lô choh-ông ê sî, lán bô chiong iok-kūi khòaⁿ-chòe iàu-kín.”

⁴ Choân hōe-chiòng lóng tông-ì án-ni chòe; jîn-bîn mā khòaⁿ chit-ê tāi-chì chòe tio̍h.

⁵ Tāi-pi̍t chiū tùi Ai-ki̍p pian-kài ê Se-hat-hô, kàu Hap-má ài-kháu tiàu-chi̍p só͘-ū ê Í-sek-lia̍t-lâng, beh chiong Siōng-tè ê iok-kūi tùi Ki-lia̍t Iâ-lîm chiap--lâi.

⁶ Tāi-pi̍t kap Í-sek-lia̍t chèng-lâng chiū khì Pa-la, chiū-sī sio̍k Iû-tāi ê Ki-lia̍t Iâ-lîm, beh tùi hia chiong Siōng-tè ê iok-kūi chiap--lâi; chit-ê kūi sī hōng chē tī nn̄g ê thiⁿ-sài ki-lō͘-pek tiong-kan ê Siōng Chú ê miâ chheng-ho͘--ê.

⁷ In chiong Siōng-tè ê iok-kūi hē tī sin ê chhia, tùi A-pí-ná-ta̍t ê chhù chài--chhut-lâi; O͘-sat kap A-hi-iok kóaⁿ hit-tâi chhia.

⁸ Tāi-pi̍t kap Í-sek-lia̍t chèng-lâng tī Siōng-tè ê bīn-chêng chīn-la̍t chhiùⁿ-koa, ēng khîm, sek, lô, kó͘, lat-pah, hoaⁿ-hí khèng-chiok.

⁹ In kàu Ki-tùn ê ngó͘-kok-tiûⁿ, gû tio̍h-tak, O͘-sat chhun-chhiú kā iok-kūi hû--teh.

¹⁰ Siōng Chú tùi O͘-sat hoat tōa siū-khì, in-ūi i chhun-chhiú hû iok-kūi, chiū phah i; i chiū tī hia sí tī Siōng-tè ê bīn-chêng.

¹¹ Tāi-pi̍t in-ūi Siōng Chú phah O͘-sat, chin bô hoaⁿ-hí, chiū chiong hit-ê só͘-chāi hō-chòe Pí-lia̍t-su O͘-sat, ti̍t-kàu kin-á-ji̍t.

¹² Hit-ji̍t, Tāi-pi̍t kiaⁿ Siōng-tè, chiū kóng, “Góa ná thang chiong Siōng-tè ê iok-kūi ūn-lâi góa ê só͘-chāi?”

¹³ Tùi án-ni, Tāi-pi̍t bô chiong iok-kūi chhian-ji̍p Tāi-pi̍t-siâⁿ, kàu ka-kī ê só͘-chāi, chiū kā i sóa-khì Ka-te̍k-lâng Gô-pia̍t Í-tong ê chhù.

¹⁴ Siōng-tè ê iok-kūi thêng tī Gô-pia̍t Í-tong ê chhù saⁿ ge̍h-ji̍t kú. Siōng Chú sù-hok Gô-pia̍t Í-tong ê ke kap i it-chhè só͘ ū--ê.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan