Bìoball air-loidhne

歷代志上卷 11 - 現代台語譯本羅馬字版

Tāi-pi̍t Choh Choân Í-sek-lia̍t ê Ông
( 2 Sat 5.1-10 )

¹ Í-sek-lia̍t chèng-lâng chū-chi̍p lâi Hi-pek-lûn kìⁿ Tāi-pi̍t, kóng, “Goán sī lí ê kut-jio̍k.

² Khah-chá Sò-lô chòe goán ê ông ê sî, chhōa Í-sek-lia̍t khì kau-chiàn--ê sī lí; Siōng Chú — lí ê Siōng-tè mā bat kā lí kóng, ‘Lí ōe bo̍k-ióng góa ê chú-bîn Í-sek-lia̍t, mā ōe chòe góa ê chú-bîn Í-sek-lia̍t ê thóng-tī-chiá.’”

³ Í-sek-lia̍t ê tiúⁿ-ló lóng lâi Hi-pek-lûn kìⁿ Tāi-pi̍t-ông, i chiū tī Hi-pek-lûn, tī Siōng Chú ê bīn-chêng kap in li̍p-iok. In chiū ēng iû boah Tāi-pi̍t, siat-li̍p i chòe Í-sek-lia̍t ê ông, chiàu Siōng Chú thong-kè Sat-bó-ní kóng ê ōe.

⁴ Tāi-pi̍t kap só͘-ū ê Í-sek-lia̍t-lâng khì kàu Iâ-lō͘-sat-léng. Iâ-lō͘-sat-léng tng-sî kiò-chòe Iâ-pò͘-su, in-ūi Iâ-pò͘-su-lâng tòa tī hia.

⁵ Khiā-khí tī Iâ-pò͘-su ê lâng kā Tāi-pi̍t kóng, “Lí bô khó-lêng kong--ji̍p-lâi.” M̄-kú Tāi-pi̍t ū kong-chhú Sek-an ê pó-lúi, chiū-sī hiān-chāi ê Tāi-pi̍t-siâⁿ.

⁶ Tāi-pi̍t kóng, “Sím-mi̍h-lâng seng kong-táⁿ Iâ-pò͘-su-lâng, i beh chòe thâu, chòe goân-sòe.” Sé-lō͘-ngá ê kiáⁿ Iok-ap tāi-seng chiūⁿ--khì, chiū chòe goân-sòe.

⁷ Tāi-pi̍t tòa tī pó-lúi, só͘-í hit-ê pó-lúi kiò-chòe Tāi-pi̍t-siâⁿ.

⁸ I tùi Bí-lô khai-sí, khí sì-ûi ê siâⁿ-chhiûⁿ, kî-tha ê pō͘-hūn kau hō͘ Iok-ap siu-kiàn.

⁹ Tāi-pi̍t jú lâi jú kiông-sēng, in-ūi Siōng Chú — Bān-kun ê Thóng-sòe kap i tông-chāi.

Tāi-pi̍t ê Ióng-sū
( 2 Sat 23.8-39 )

¹⁰ Ē-bīn chiah-ê sī Tāi-pi̍t ê ióng-sū ê léng-siù; in choân-le̍k ióng-hō͘ Tāi-pi̍t tit-tio̍h ông-koân, mā kap Í-sek-lia̍t chèng-lâng chiàu Siōng Chú tùi Í-sek-lia̍t ê èng-ún siat-li̍p i choh-ông.

¹¹ Hiah-ê léng-siù ê miâ-toaⁿ kì tī ē-bīn: Hap-kek-mô͘-nî ê kiáⁿ Ngá-sok-pan sī chèng kun-koaⁿ ê siú-léng, bat chi̍t piàn ēng chhiuⁿ thâi-sí saⁿ-pah ê lâng.

¹² Tē-jī ê sī A-hô-a-lâng Tó-to ê kiáⁿ Í-lī-a-sat, i sī saⁿ ê ióng-sū ê chi̍t ê.

¹³ I bat kap Tāi-pi̍t tī Pa-su Tāi-bín; Hui-lī-sū-lâng chū-chi̍p tī hia beh kau-chiàn. Hia ū chi̍t khu hn̂g, chèng chin chōe tōa-be̍h; Í-sek-lia̍t-lâng tī Hui-lī-sū-lâng ê bīn-chêng tô-cháu.

¹⁴ I khiā tī hn̂g-tiong hông-siú hit-khu hn̂g, phah Hui-lī-sū-lâng. Siōng Chú hō͘ i tōa sèng-lī.

¹⁵ Saⁿ-cha̍p ê siú-léng tiong ū saⁿ ê lo̍h-khì A-tō͘-lân-tōng hù-kūn ê chio̍h-pôaⁿ hia kìⁿ Tāi-pi̍t. Hui-lī-sū ê kun-tūi tī Lī-hoa̍t-im Soaⁿ-kok chat-iâⁿ.

¹⁶ Hit-sî, Tāi-pi̍t tī iàu-sài; Hui-lī-sū ê kun-tūi chū-chāi tī Pek-lī-hêng.

¹⁷ Tāi-pi̍t ēng chin khat-bō͘ ê kháu-khì kóng, “Nā ū lâng ōe-tàng khì the̍h Pek-lī-hêng siâⁿ-mn̂g piⁿ ê chíⁿ-chúi hō͘ góa lim, m̄-chai jōa-á-ni̍h hó!”

¹⁸ Chit saⁿ ê lâng chiū chhiong-kè Hui-lī-sū-lâng ê iâⁿ-tōe, tùi Pek-lī-hêng siâⁿ-mn̂g piⁿ ê chíⁿ chhiūⁿ-chúi, kōaⁿ-lâi hō͘ Tāi-pi̍t. M̄-kú Tāi-pi̍t m̄ lim, tò chhut-lâi hiàn hō͘ Siōng Chú,

¹⁹ kóng, “Góa ê Siōng-tè ah, góa ná thang lim chit-ê chúi? Che kiám m̄-sī chiah-ê ēng sìⁿ-miā khì ōaⁿ--lâi ê lâng ê huih, góa ná káⁿ lim?” Só͘-í Tāi-pi̍t m̄ lim. Che sī chit saⁿ ê ióng-sū chòe ê tāi-chì.

²⁰ Iok-ap ê sió-tī A-pí-su sī lēng-gōa saⁿ ê ióng-sū ê siú-léng; i bat gia̍h chhiuⁿ thâi-sí saⁿ-pah ê lâng, chiū tī saⁿ ê ióng-sū tiong ū-miâ.

²¹ I pí kî-tha nn̄g ê khah ū bêng-bōng, só͘-í chòe in ê léng-siù; m̄-kú i iáu put-ki̍p chêng hit saⁿ ê ióng-sū.

²² Koh ū Kah-sih-lâng Iâ-hô-iâ-tāi ê kiáⁿ Pí-ná-ngá; i sī ióng-sū, ū chòe chin chōe tōa-sū: I bat thâi-sí Mô͘-ap nn̄g ê kiông-béng ê ióng-sū; koh tī lo̍h-seh ê sî, lo̍h-khì khiⁿ-lāi thâi-sí chi̍t chiah sai;

²³ koh thâi-sí chi̍t ê nn̄g-pah gōa kong-hun koân-tōa ê Ai-ki̍p-lâng. Hit-ê Ai-ki̍p-lâng chhiú gia̍h chhiuⁿ, chhiuⁿ ê pìⁿ chhin-chhiūⁿ chit-pò͘-ki ê chhia-sim hiah chho͘. Pí-ná-ngá chí-ū gia̍h kùn lo̍h-khì i hia, chhiúⁿ i ê chhiuⁿ, ēng hit-ki chhiuⁿ kā i thâi-sí.

²⁴ Che sī Iâ-hô-iâ-tāi ê kiáⁿ Pí-ná-ngá só͘ chòe ê sū, chiū tī saⁿ ê ióng-sū tiong ū-miâ.

²⁵ I pí saⁿ-cha̍p ê ióng-sū khah ū bêng-bōng, m̄-kú put-ki̍p chêng hit saⁿ ê ióng-sū. Tāi-pi̍t ū siat-li̍p i chòe sī-ōe-tiúⁿ.

²⁶ Kun-tiong ê ióng-sū ū: Iok-ap ê sió-tī A-sat-hek Pek-lī-hêng-lâng Tó-to ê kiáⁿ I-le̍k-hap-lân

²⁷ Hap-lu̍t-lâng Sa-má Pí-lûn-lâng Hi-lī-su

²⁸ Thê-ko-a-lâng Ek-kiat ê kiáⁿ Í-la A-ná-tu̍t-lâng A-pí-í-siā

²⁹ Hō͘-sa-lâng Se-pí-kai A-hô-a-lâng Í-lâi

³⁰ Nî-tô-hoat-lâng Má-hap-lâi kap Pa-ná ê kiáⁿ Hi-li̍p

³¹ Piān-ngá-bín chi-cho̍k Ki-pí-a-lâng Lī-pài ê kiáⁿ Í-thài Pí-la-tùn-lâng Pí-ná-ngá

³² Ka-si̍t-khoe-lâng Hō͘-lâi A-la-pa-lâng A-pia̍t

³³ Pa-ló͘-bí-lâng A-su-má-ui Sa-pún-lâng Í-lī-ngá-hap-pa

³⁴ Ki-sun-lâng Hap-chhim ê chèng-kiáⁿ Hap-la-lâng Sa-ki ê kiáⁿ Iok-ná-tan

³⁵ Hap-la-lâng Sa-kah ê kiáⁿ A-hi-àm Ngô͘-ní ê kiáⁿ Í-lī-hoat-le̍k

³⁶ Bí-ki-la-lâng Hi-hut Pí-lûn-lâng A-hi-ngá

³⁷ Ka-bi̍t-lâng Hi-su-lô I-su-pài ê kiáⁿ Ná-lâi

³⁸ Ná-tan ê hiaⁿ-tī Iok-ní Hap-ki-lī ê kiáⁿ Bí-pek-hap

³⁹ A-bûn-lâng Sé-le̍k kā Sé-lō͘-ngá ê kiáⁿ Iok-ap gia̍h kun-khì ê Pí-lio̍k-lâng Ná-hap-lâi

⁴⁰ Í-thiap-lâng Í-la kap Ka-li̍p

⁴¹ Hek-lâng O͘-lī-a A-lâi ê kiáⁿ Sat-poa̍t

⁴² Lū-piān-lâng Sī-sat ê kiáⁿ A-tē-ná (i sī Lū-piān chi-cho̍k tiong chi̍t ê léng-siù, chhōa saⁿ-cha̍p lâng)

⁴³ Má-ka ê kiáⁿ Hap-lân Bî-te̍k-nî-lâng Iok-sa-hoat

⁴⁴ A-si-tha-la-lâng O͘-se-a A-lô-ní-lâng Hô-thán ê kiáⁿ Sa-má kap Iâ-lī

⁴⁵ Thê-sé-lâng Sin-lī ê kiáⁿ Iâ-thia̍p kap i ê hiaⁿ-tī Iok-hap

⁴⁶ Má-hap-bī-lâng Í-lī-gia̍p I-lī-ná-an ê kiáⁿ Iâ-lī-pài kap Iok-sa-bī-ngá Mô͘-ap-lâng I-te̍k-má

⁴⁷ Í-lī-gia̍p, Gô-pī-tek, kap Bí-só-pa-lâng Ngá-se-gia̍p.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan