Bìoball air-loidhne

撒母耳記下卷 7 - 現代台語譯本羅馬字版

Siōng-tè kap Tāi-pi̍t Li̍p-iok
( 1 Tāi 17.1-15 )

¹ Ông tòa tī ông-kiong, Siōng Chú hō͘ i bô siū sì-ûi tùi-te̍k ê kiáu-jiáu, hióng-siū thài-pêng.

² Ông tùi sian-ti Ná-tan kóng, “Lí khòaⁿ, góa tòa tī pek-hiuⁿ-chhâ ê kiong-tiān, m̄-kú Siōng-tè ê iok-kūi tiàm tī pò͘-pîⁿ.”

³ Ná-tan tùi ông kóng, “Lí siūⁿ-beh án-chóaⁿ, chiū thang khì chòe, in-ūi Siōng Chú kap lí tông-chāi.”

⁴ Hit-mî Siōng Chú ê ōe lîm-kàu Ná-tan, kóng,

⁵ “Lí khì kā góa ê po̍k-jîn Tāi-pi̍t kóng, ‘Siōng Chú án-ni kóng: Lí chin-chiàⁿ beh khí sèng-tiān hō͘ góa tòa sī--bô?

⁶ Tùi góa chhōa Í-sek-lia̍t-lâng chhut Ai-ki̍p kàu hiān-chāi, góa m̄-bat tòa tī tiān--ni̍h, lóng it-ti̍t tòa tī pò͘-pîⁿ á-sī hōe-bō͘, kap in chòe-hé kiâⁿ-sóa.

⁷ Góa kap Í-sek-lia̍t-lâng tâng-kiâⁿ ê sî, kiám bat tùi tó chi̍t ê Í-sek-lia̍t chi-cho̍k ê léng-siù, chiū sī bo̍k-ióng góa ê chú-bîn--ê kóng: Lín ná bô kā góa khí pek-hiuⁿ-chhâ ê tiān?’

⁸ “Taⁿ lí tio̍h kā góa ê po̍k-jîn Tāi-pi̍t kóng, ‘Siōng Chú — Bān-kun ê Thóng-sòe án-ni kóng: Góa tùi bo̍k-tiûⁿ kéng-tiàu lí, hō͘ lí bô koh chhī iûⁿ, sī beh hō͘ lí chòe góa ê chú-bîn Í-sek-lia̍t ê thóng-tī-chiá.

⁹ Lí bô-lūn khì tó-ūi, góa ōe kap lí tông-chāi, siau-bia̍t lí bīn-chêng só͘-ū ê tùi-te̍k. Góa it-tēng hō͘ lí ū tōa miâ-siaⁿ, chhin-chhiūⁿ sè-kan ê úi-jîn hiah-ni̍h chhut-miâ.

^10-11 Góa beh ūi-tio̍h góa ê chú-bîn Í-sek-lia̍t chún-pī chi̍t ê só͘-chāi, kā in an-tùn, hō͘ in khiā-khí tī ka-kī ê só͘-chāi, bô koh siū kiáu-jiáu, bô koh chhin-chhiūⁿ chá-chêng góa bēng-lēng sū-su koán-lí góa ê chú-bîn Í-sek-lia̍t ê sî-tāi, siū hiong-ok ê lâng khi-ap. Góa beh hō͘ lí thoat-lī it-chhè ê tùi-te̍k, tit-tio̍h thài-pêng. Góa koh soan-pò͘, góa Siōng Chú beh kiàn-li̍p lí ê ông-tiâu.

¹² Kàu lí ê hè-siū móa, tńg-khì lí ê chó͘-sian hia ê sî, góa beh soán-li̍p lí ê hō͘-tāi, lí ê chhin-siⁿ-kiáⁿ, lâi sòa-chiap lí, koh beh hō͘ i ê kok ún-kò͘.

¹³ I beh ūi-tio̍h góa ê miâ khí sèng-tiān; góa beh kian-kò͘ i ê ông-ūi ti̍t-kàu éng-oán.

¹⁴ Góa beh chòe i ê pē, i beh chòe góa ê kiáⁿ. I nā hoān-chōe, góa beh ēng lâng ê koáiⁿ, sè-kan-lâng ê piⁿ, chek-tok i.

¹⁵ M̄-kú góa ê chû-ài bōe lī-khui i, bōe chhin-chhiūⁿ góa hō͘ chû-ài lī-khui góa só͘ khì-sak ê Sò-lô.

¹⁶ Lí ê ke kap lí ê kok, ōe éng-oán kian-li̍p tī góa ê bīn-chêng; lí ê ông-ūi ōe kian-kò͘ kàu éng-oán.’”

¹⁷ Ná-tan chiū chiàu Siōng-tè khé-sī ê ōe lóng kā Tāi-pi̍t kóng.

Tāi-pi̍t ê Kî-tó kap Kám-siā
( 1 Tāi 17.16-27 )

¹⁸ Tāi-pi̍t-ông chiū ji̍p-khì hōe-bō͘, chē tī Siōng Chú ê bīn-chêng, kóng, “Chì-koân ê Siōng Chú, góa sī siáⁿ-lâng, góa ê ke sǹg sím-mi̍h, lí kèng-jiân chhōa góa kàu chit-ê tōe-ūi?

¹⁹ M̄-nā án-ni, Chì-koân ê Siōng Chú ah, lí koh koàn-kò͘ lí lô͘-po̍k ê ke ê chiong-lâi; Chì-koân ê Siōng Chú, che kiám sī it-poaⁿ-lâng ōe-tàng tú--tio̍h ê tāi-chì?

²⁰ Chì-koân ê Siōng Chú ah, lí ê lô͘-po̍k lí siōng chheng-chhó, góa iáu ū sím-mi̍h ōe thang kóng?

²¹ Lí ū chòe chiah-ê tōa-sū, koh kàu-tō lí ê lô͘-po̍k; che lóng sī in-ūi lí ê èng-ún, chiàu lí ê chí-ì.

²² Chì-koân ê Siōng Chú ah, lí chin úi-tāi! Chiàu goán só͘ thiaⁿ--kìⁿ, bô chi̍t ê ōe-tàng kap lí pí, lí í-gōa bô Siōng-tè.

²³ Sè-kan kiám ū chi̍t ê kok chhin-chhiūⁿ lí ê chú-bîn Í-sek-lia̍t? Siōng-tè lí ū kiù-sio̍k in, hō͘ in chiâⁿ-chòe lí ê chú-bîn, hō͘ lí ka-kī tit-tio̍h êng-iāu; koh ūi-tio̍h lí tùi Ai-ki̍p kái-kiù--chhut-lâi ê chú-bîn chòe tōa koh thang-kiaⁿ ê sū, chiong lia̍t-pang kap hiah-ê sîn-bêng kóaⁿ--chhut-khì.

²⁴ Lí ū kiàn-li̍p Í-sek-lia̍t éng-oán chòe lí ka-kī ê chú-bîn; Siōng Chú ah, lí koh chòe in ê Siōng-tè.

²⁵ “Chú Siōng-tè, lí tùi lí ê lô͘-po̍k kap i ê ke ê èng-ún, goān lí chiàu lí só͘ kóng--ê si̍t-hiān, hō͘ i éng-oán ún-kò͘.

²⁶ Goān lâng éng-oán chun-chông lí ê miâ kóng, ‘Siōng Chú — Bān-kun ê Thóng-sòe sī tī-lí Í-sek-lia̍t ê Siōng-tè!’ Koh lí ê lô͘-po̍k Tāi-pi̍t ê ke beh tī lí ê bīn-chêng kian-li̍p.

²⁷ Siōng Chú — Bān-kun ê Thóng-sòe, Í-sek-lia̍t ê Siōng-tè ah, in-ūi lí ū khé-sī lí ê lô͘-po̍k, kóng ‘Góa beh kiàn-li̍p lí ê ông-tiâu’, só͘-í lí ê lô͘-po̍k hó-táⁿ ēng chit-ê kî-tó tùi lí khún-kiû.

²⁸ “Chì-koân ê Siōng Chú, chí-ū lí sī Siōng-tè! Lí ê ōe chin-si̍t khó-khò; lí ēng chit-ê hok-khì èng-ún lí ê lô͘-po̍k.

²⁹ Taⁿ, kiû lí hoaⁿ-hí sù-hok lí lô͘-po̍k ê ke, hō͘ i tī lí ê bīn-chêng éng-oán ún-kò͘. Chì-koân ê Siōng Chú, in-ūi lí ū èng-ún, goān lí lô͘-po̍k ê ke tùi lí tit-tio̍h hok-khì, kàu éng-oán.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan