Bìoball air-loidhne

撒母耳記下卷 24 - 現代台語譯本羅馬字版

Tāi-pi̍t Tiâu-cha Hō͘-kháu
( 1 Tāi 21.1-17 )

¹ Siōng Chú koh tùi Í-sek-lia̍t-lâng siū-khì, kek-tōng Tāi-pi̍t lâi tùi-hù in, kóng, “Khì tiâu-cha Í-sek-lia̍t kap Iû-tāi ê jîn-kháu.”

² Ông hoan-hù i sin-piⁿ ê goân-sòe Iok-ap kóng, “Lí khì Í-sek-lia̍t ta̍k-ê chi-cho̍k, tùi Tān kàu Pia̍t-sī-pa, tiám-sǹg jîn-kháu, hō͘ góa chai choân-kok jîn-bîn ê sò͘-bo̍k.”

³ Iok-ap tùi ông kóng, “Goān Siōng Chú — lí ê Siōng-tè hō͘ choân-kok jîn-bîn cheng-ka pah-pē, koh hō͘ góa ê chú góa ê ông chhin-ba̍k khòaⁿ--kìⁿ; m̄-kú góa ê chú góa ê ông sī-án-chóaⁿ ài-beh chòe chit-ê tāi-chì?”

⁴ Ông kian-chhî i ê bēng-lēng. Iok-ap kap hiah-ê kun-tiúⁿ chiū hōng-bēng chhut--khì, tiám-sǹg Í-sek-lia̍t ê jîn-kháu.

⁵ In kè Iok-tàn-hô, tī Ka-tek Soaⁿ-kok tiong A-lô-ní-siâⁿ ê lâm-pêng chat-iâⁿ, tùi hia khì Ngá-siā;

⁶ keng-kè Ki-lia̍t, kàu Tha-thêng Ha̍p-sī tōe-khu, koh kàu Tān Ngá-an, se̍h kàu Se-tùn;

⁷ koh kàu Thài-ní kian-kò͘ ê siâⁿ, kap só͘-ū Hi-bī-lâng í-ki̍p Ka-lâm-lâng ê siâⁿ; chòe-āu kàu Iû-tāi lâm-pêng ê Pia̍t-sī-pa.

⁸ In kiâⁿ-thàu choân-kok, keng-kè káu kò-ge̍h koh jī-cha̍p ji̍t, tò-tńg-lâi Iâ-lō͘-sat-léng.

⁹ Iok-ap chiong tiám-sǹg ê jîn-sò͘ pò-kò hō͘ ông chai. Í-sek-lia̍t-lâng gia̍h-to ê chiàn-sū ū poeh-cha̍p-bān, Iû-tāi-lâng ū gō͘-cha̍p-bān.

¹⁰ Tāi-pi̍t tiám-sǹg jîn-bîn ê sò͘-bo̍k liáu-āu, sim-lāi chū-chek. Tāi-pi̍t tùi Siōng Chú kóng, “Góa chòe chit-ê tāi-chì hoān chin tōa ê chōe. Siōng Chú ah, kiû lí tû-khì lí lô͘-po̍k ê chōe, in-ūi góa án-ni chòe chin gōng.”

¹¹ Tāi-pi̍t thàu-chá khí--lâi, Siōng Chú ê ōe lîm-kàu Tāi-pi̍t ê sian-kiàn Ka-tek sian-ti, kóng,

¹² “Lí khì kā Tāi-pi̍t kóng, Siōng Chú án-ni kóng, ‘Góa ēng saⁿ hāng chai-hō hō͘ lí kéng chi̍t hāng, góa chiū chiàu án-ni chòe.’”

¹³ Ka-tek lâi kā Tāi-pi̍t kóng, “Lí ài lí ê kok ki-hng chhit nî? Á-sī hō͘ lí ê tùi-te̍k tui-sat saⁿ kò-ge̍h? Á-sī ài lí ê kok ū un-e̍k saⁿ ji̍t kú? Lí tio̍h chim-chiok siūⁿ, hō͘ góa thang hôe-ho̍k chhe góa lâi Hit-ūi.”

¹⁴ Tāi-pi̍t kā Ka-tek kóng, “Góa chin ûi-lân, m̄-kú lán lêng-khó hō͘ Siōng Chú ka-kī kā lán hêng-hoa̍t, in-ūi I ū hong-sēng ê lîn-bín; góa m̄-goān hām-lo̍h tī lâng ê chhiú.”

¹⁵ Siōng Chú chiū kàng un-e̍k tī Í-sek-lia̍t, tùi Tān kàu Pia̍t-sī-pa, tùi chheng-chá kàu ū-tēng ê sî, jîn-bîn chóng-kiōng sí chhit-bān lâng.

¹⁶ Tng thiⁿ-sài chhun-chhiú beh bia̍t Iâ-lō͘-sat-léng ê sî, Siōng Chú kái-piàn sim-ì, bô beh kè-sio̍k kàng chit-ê chai-hō, chiū kā teh chip-hêng húi-bia̍t ê thiⁿ-sài kóng, “Thêng-chhiú! Kàu-gia̍h lah!” Hit-sî, Siōng Chú ê sù-chiá tú tī Iâ-pò͘-su-lâng A-lô-ná ê ngó͘-kok-tiûⁿ.

¹⁷ Tāi-pi̍t khòaⁿ-kìⁿ sat-hāi jîn-bîn ê thiⁿ-sài, chiū tùi Siōng Chú kóng, “Siōng Chú ah, góa ū hoān-chōe, pōe-ge̍k--ê sī góa; m̄-kú chiah-ê bû-ko͘ ê jîn-bîn ū chòe sím-mi̍h m̄-tio̍h? Kiû lí ê chhiú hêng-hoa̍t góa kap góa ê ka-cho̍k.”

Tāi-pi̍t ūi Siōng Chú Khí Chi̍t Chō Chè-tôaⁿ
( 1 Tāi 21.18-27 )

¹⁸ Kâng hit-ji̍t, Ka-tek lâi kìⁿ Tāi-pi̍t, tùi i kóng, “Lí khì Iâ-pò͘-su-lâng A-lô-ná ê ngó͘-kok-tiûⁿ, tī hia ūi Siōng Chú khí chi̍t chō chè-tôaⁿ.”

¹⁹ Tāi-pi̍t chiū chiàu Siōng Chú hoan-hù Ka-tek ê ōe chiūⁿ--khì.

²⁰ A-lô-ná khòaⁿ-tio̍h tùi-bīn ū ông kap i ê jîn-sîn teh lâi, chiū chhut--khì, phak tī thô͘-kha pài ông.

²¹ A-lô-ná kóng, “Góa ê chú góa ê ông lâi po̍k-jîn chia ū sím-mi̍h kùi-sū?” Tāi-pi̍t kóng, “Góa lâi sī beh bóe lí chit-ê ngó͘-kok-tiûⁿ, ūi Siōng Chú khí chi̍t chō chè-tôaⁿ, hō͘ choân-kok ê un-e̍k thêng-chí.”

²² A-lô-ná tùi Tāi-pi̍t kóng, “Góa ê chú góa ê ông, chiàu lí só͘ khòaⁿ-chòe hó--ê lóng the̍h-khì hiàn. Chia ū gû, thang chòe sio-hòa-chè, ū phah ngó͘-kok ê khì-khū kap gû-taⁿ thang chòe chhâ sio.

²³ Ông ah, A-lô-ná chiong chiah-ê lóng sàng hō͘ ông.” A-lô-ná koh tùi ông kóng, “Goān Siōng Chú — lí ê Siōng-tè chiap-la̍p lí.”

²⁴ Ông tùi A-lô-ná kóng, “M̄-thang, góa beh chiàu kè-chîⁿ kā lí bóe. Góa bô ài ēng pe̍h-pe̍h tit--tio̍h ê mi̍h chòe sio-hòa-chè hiàn hō͘ Siōng Chú — góa ê Siōng-tè.” Tāi-pi̍t chiū ēng gō͘-pah chhit-cha̍p kong-khek ê gûn bóe hit-ê ngó͘-kok-tiûⁿ kap gû.

²⁵ Tāi-pi̍t tī hia ūi Siōng Chú khí chi̍t chō chè-tôaⁿ, hiàn sio-hòa-chè kap pêng-an-chè. Án-ni, Siōng Chú thiaⁿ in ūi-tio̍h choân-kok ê kî-tó, un-e̍k chiū tī Í-sek-lia̍t tiong thêng-chí.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan