Bìoball air-loidhne

撒母耳記下卷 22 - 現代台語譯本羅馬字版

Tāi-pi̍t Khái-soân ê Koa
( Si 18 )

¹ Siōng Chú kiù Tāi-pi̍t thoat-lī só͘-ū ê tùi-te̍k kap Sò-lô ê chhiú liáu-āu, i ǹg Siōng Chú liām chit-siú si:

² Siōng Chú sī góa ê soaⁿ-giâm, góa ê iàu-sài, góa ê Chín-kiù-chiá;

³ sī góa ê Siōng-tè, góa ê chio̍h-pôaⁿ, góa beh óa-khò I; I sī góa ê tún-pâi, kiù góa ê khùi-la̍t, góa ê pó-lúi, góa ê pī-lān-só͘. Góa ê Chín-kiù-chiá, lí ū kiù góa thoat-lī kiông-pō.

⁴ Góa kiû-kiò eng-kai siū chheng-chàn ê Siōng Chú, góa chiū tit-tio̍h kái-kiù thoat-lī tùi-te̍k.

⁵ Sí-bông ê tōa-éng ûi-khùn góa; húi-bia̍t ê tōa-chúi hō͘ góa kiaⁿ.

⁶ Im-hú ê soh khún-pa̍k góa; Sí-bông ê lô-bāng bāng-tio̍h góa.

⁷ Góa tī khó͘-lān tiong kî-kiû Siōng Chú, tùi góa ê Siōng-tè kiû-kiò; I tī I ê tiān-lāi thiaⁿ góa ê siaⁿ; góa ê khún-kiû ū ji̍p I ê hī-khang.

⁸ I siū-khì, tōe chiū iô-choah; thiⁿ ê kun-ki mā tín-tāng iô koh choah.

⁹ Tùi I ê phīⁿ-khang ū ian chhèng-chhut; tùi I ê chhùi ū hé hoat-chhut, liân thô͘-thòaⁿ mā to̍h--khí-lâi.

¹⁰ I thí-khui thiⁿ, chhin-sin kàng-lîm; I kha-ē ū kāu-kāu ê o͘-hûn.

¹¹ I khiâ thiⁿ-sài ki-lō͘-pek teh pe; I chē hong ê si̍t hián-hiān.

¹² I ēng o͘-àm chòe I ún-ba̍t ê só͘-chāi, ēng chúi kap ba̍t-hûn ûi khí-lâi chòe tiùⁿ-pâng.

¹³ I hoat-chhut ê kng, hō͘ thòaⁿ to̍h--khí-lâi.

¹⁴ Siōng Chú tùi thiⁿ-téng tân-lûi, Chì-koân ê Siōng-tè chhut-siaⁿ.

¹⁵ I siā-chìⁿ, hō͘ tùi-te̍k sì-sòaⁿ; I hoat-chhut sih-nà, hō͘ in hūn-loān.

¹⁶ Siōng Chú chi̍t-ē chek-pī, phīⁿ-khang ê khùi chi̍t-ē chhut, hái-tóe chiū lō͘-chhut, tāi-tōe ê kun-ki mā lō͘-hiān.

¹⁷ I tùi téng-bīn chhun-chhiú khiú góa, tùi tōa-chúi kā góa kiù--chhut-lâi.

¹⁸ I kiù góa thoat-lī hiong-béng ê tùi-te̍k, thoat-lī oàn-hūn góa ê lâng; in-ūi in pí góa khah kiông.

¹⁹ Góa tú-tio̍h chai-lān ê sî, in lâi kong-kek góa; m̄-kú Siōng Chú sī góa ê óa-khò.

²⁰ I chhōa góa kàu khui-khoah an-choân ê só͘-chāi; I kiù góa, in-ūi I ì-ài góa.

²¹ Siōng Chú in-ūi góa chèng-ti̍t pò-tap góa, in-ūi góa ê só͘-chòe chheng-khì pò-siúⁿ góa.

²² Góa chun-siú Siōng Chú ê tō-lō͘, m̄-bat choh-pháiⁿ lī-khui góa ê Siōng-tè.

²³ I só͘-ū ê bēng-lēng góa ū chun-siú; I ê kui-lē góa m̄-bat pàng-sak.

²⁴ Góa tī I ê bīn-chêng bô thang chí-chek; góa pó-siú ka-kī lī-khui chōe-ok.

²⁵ In-ūi góa chèng-ti̍t, Siōng Chú pò-siúⁿ góa; tī I ê ba̍k-chiu chêng, góa ê só͘-chòe chheng-khì.

²⁶ Chû-ài ê lâng, lí ēng chû-ài tùi-thāi i; sûn-choân ê lâng, lí ēng sûn-choân tùi-thāi i;

²⁷ chheng-khì ê lâng, lí ēng chheng-khì tùi-thāi i; m̄-kú, kan-chà ê lâng, lí ēng oan-khiau tùi-thāi i.

²⁸ Khùn-khó͘ ê lâng, lí kái-kiù i; chū-ko ê lâng, lí te̍k-sī i, kā i kàng-kē.

²⁹ Siōng Chú, lí sī góa ê teng; Siōng Chú kā góa ê o͘-àm pìⁿ-chòe kng-bêng.

³⁰ Góa in-ūi óa-khò lí, ōe-tàng kong-phòa te̍k-kun; óa-khò góa ê Siōng-tè, ōe-tàng thiàu-kè siâⁿ-chhiûⁿ.

³¹ Chit-ūi Siōng-tè, I ê tō-lō͘ oân-choân. Siōng Chú ê ōe ū kè hé thoàn-liān; óa-khò I--ê, I chòe tún-pâi pó-hō͘ in.

³² Siōng Chú í-gōa, kiám ū pa̍t-ê Siōng-tè? Goán ê Siōng-tè í-gōa, kiám ū chio̍h-pôaⁿ thang óa-khò?

³³ Chit-ūi Siōng-tè sī góa kian-kò͘ ê iàu-sài; I ín-chhōa góa kiâⁿ an-choân ê lō͘.

³⁴ I hō͘ góa ê kha chhin-chhiūⁿ lo̍k gâu cháu, koh hō͘ góa khiā-chāi tī koân ê só͘-chāi.

³⁵ I hùn-liān góa ê chhiú gâu kau-chiàn, hō͘ góa ê chhiú ōe khui tâng ê keng.

³⁶ Lí ēng tún-pâi kái-kiù góa; lí ê pang-chān hō͘ góa kian-kiông.

³⁷ Lí hō͘ góa ta̍h ê tōe khui-khoah an-choân; góa ê kha m̄-bat ta̍h-thu̍t.

³⁸ Góa tui góa ê tùi-te̍k kàu jip--tio̍h in; in bô bia̍t-bông, góa bōe tò-tńg.

³⁹ Góa phah in thiám-thiám, hō͘ in peh bōe khí--lâi, kàu in tó tī góa ê kha-ē.

⁴⁰ Lí sù góa khùi-la̍t hō͘ góa gâu kau-chiàn; lí hō͘ kong-kek góa ê lâng lóng hâng-ho̍k tī góa ē-bīn.

⁴¹ Lí hō͘ góa ê tùi-te̍k oa̍t-tńg-sin tô-cháu, koh hō͘ góa châu-bia̍t oàn-hūn góa ê lâng.

⁴² In kiû-kiò, bô lâng kiù in; kiû-kiò Siōng Chú, I mā bô ìn.

⁴³ Góa kā in tûi kàu chhùi-chhùi, chhin-chhiūⁿ tōe-chiūⁿ ê thô͘-hún, kā in thún-ta̍h, chhin-chhiūⁿ koe-lō͘ ê thô͘-bê.

⁴⁴ Lí kiù góa thoat-lī hoán-poān góa ê jîn-bîn; lí pó-hō͘ góa, hō͘ góa chòe lia̍t-pang ê thâu. Góa m̄-bat ê jîn-bîn ōe ho̍k-sāi góa;

⁴⁵ gōa-pang ê lâng khut-sin tâu-hâng, in chi̍t-ē thiaⁿ-tio̍h góa ê miâ chiū sūn-ho̍k.

⁴⁶ Gōa-pang ê lâng sit-táⁿ, kiâⁿ-chhut in ê tīn-tōe, chún-pī beh chok-chiàn.

⁴⁷ Siōng Chú éng-oán oa̍h--teh! Goān góa óa-khò ê chio̍h-pôaⁿ siū chheng-chàn; goān kiù góa ê chio̍h-pôaⁿ — Siōng-tè siū ko-kú.

⁴⁸ I chiū-sī ūi góa sin-oan hit-ūi Siōng-tè; I hō͘ chèng-lâng hâng-ho̍k tī góa kha-ē.

⁴⁹ I kiù góa thoat-lī góa ê tùi-te̍k. Lí thê-poa̍t góa koân-kè kong-kek góa ê lâng; lí kiù góa thoat-lī kiông-pō ê lâng.

⁵⁰ Siōng Chú ah, in-ūi án-ni góa beh tī lia̍t-pang tiong kám-siā lí, chhiùⁿ-koa chheng-chàn lí ê miâ.

⁵¹ Siōng Chú sù ke̍k-tōa ê kiù-un hō͘ I siat-li̍p ê ông, si-lo̍h chû-ài hō͘ I boah-iû soán-li̍p ê lâng, hō͘ Tāi-pi̍t kap i ê hō͘-tāi, ti̍t-kàu éng-oán.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan