Bìoball air-loidhne

撒母耳記下卷 21 - 現代台語譯本羅馬字版

Sò-lô ê Hō͘-tāi Siū Chhú-sí

¹ Tāi-pi̍t chāi-ūi ê sî ū ki-hng liân-sòa saⁿ nî. Tāi-pi̍t chhéng-būn Siōng Chú. Siōng Chú kóng, “Sī in-ūi Sò-lô kap i ê ke thâi-sí Ki-piàn-lâng, lâu in ê huih.”

² Ông chiū tiàu Ki-piàn-lâng lâi, tùi in kóng-ōe. (Ki-piàn-lâng pún-lâi m̄-sī Í-sek-lia̍t-lâng, sī A-mô͘-lī-lâng lâu--lo̍h-lâi--ê. Í-sek-lia̍t-lâng bat tùi in chiù-chōa, bô beh thâi in; m̄-kú Sò-lô in-ūi tùi Í-sek-lia̍t-lâng kap Iû-tāi-lâng ê jia̍t-sim, jia̍t-chhiat kah kè-bô͘ beh kā in siau-bia̍t.)

³ Tāi-pi̍t kā Ki-piàn-lâng kóng, “Góa tio̍h ūi lín chòe sím-mi̍h? Góa tio̍h án-chóaⁿ kā lín pó͘-sióng, thang hō͘ lín chiok-hok Siōng Chú ê chú-bîn?”

⁴ Ki-piàn-lâng kóng, “Goán kap Sò-lô í-ki̍p i ê ke ê tāi-chì m̄-sī ēng kim-gûn ōe-tàng kái-koat, mā m̄-thang in-ūi goán ê iân-kò͘ hāi-sí jīm-hô chi̍t ê Í-sek-lia̍t-lâng.” I kóng, “Lín kóng án-chóaⁿ, góa chiū án-ni chòe.”

⁵ In tùi ông kóng, “Sò-lô kè-bô͘ beh kā goán châu-bia̍t, hāi goán tī choân Í-sek-lia̍t kéng-lāi bô khiā-khí ê só͘-chāi.

⁶ Chhiáⁿ chiong i chhit ê ta-po͘ ê kiáⁿ-sun kau hō͘ goán, goán beh tī Siōng Chú ê bīn-chêng kā in tiàu tī Ki-pí-a, chiū-sī Siōng Chú soán-li̍p choh-ông ê Sò-lô ê ka-hiong.” Ông kóng, “Góa ōe chiong in kau hō͘ lín.”

⁷ Tāi-pi̍t-ông in-ūi bat kap Sò-lô ê kiáⁿ Iok-ná-tan kí Siōng Chú ê miâ chiù-chōa, só͘-í m̄-kam chiong Iok-ná-tan ê kiáⁿ Bí-hui-pho-siat kau hō͘ in.

⁸ Ông chiū chiong Ài-a ê cha-bó͘-kiáⁿ Lī-su-pa kā Sò-lô siⁿ ê nn̄g ê kiáⁿ A-mô͘-nî kap Bí-hui-pho-siat, í-ki̍p Sò-lô ê cha-bó͘-kiáⁿ Bí-la kā Bí-hô-la-lâng Pa-se-lâi ê kiáⁿ A-tek-lia̍t siⁿ ê gō͘ ê kiáⁿ,

⁹ lóng kau hō͘ Ki-piàn-lâng. Ki-piàn-lâng chiū tī Siōng Chú ê bīn-chêng kā in tiàu tī soaⁿ-téng. Chit chhit ê lâng lóng chòe-hé sí, hit-sî tú sī khai-sí siu-koah tōa-be̍h ê sî.

¹⁰ Ài-a ê cha-bó͘-kiáⁿ Lī-su-pa the̍h chho͘-môa-pò͘, tī chio̍h-pôaⁿ téng ūi ka-kī tah pîⁿ-á tòa tī hia; tùi khai-sí siu-koah kàu lo̍h chhiu-ú ak-tio̍h sin-si ê kî-kan, i ji̍t--sî m̄-chún pe-chiáu, mî--sî m̄-chún cháu-siù kha̍p-tio̍h hiah-ê sin-si.

¹¹ Ū lâng chiong Ài-a ê cha-bó͘-kiáⁿ, Sò-lô ê hui Lī-su-pa só͘ chòe ê sū kā Tāi-pi̍t kóng.

¹² Tāi-pi̍t chiū khì Ki-lia̍t ê Ngá-pí-lâng hia, chiong Sò-lô kap i ê kiáⁿ Iok-ná-tan ê kut-hâi the̍h--lâi. (Hui-lī-sū-lâng tī Ki-lī-pho thâi-sí Sò-lô ê sî, chiong Sò-lô kap Iok-ná-tan tiàu-sí tī Pek Siān ê kóng-tiûⁿ; Ki-lia̍t ê Ngá-pí-lâng tùi hia thau-the̍h in ê si-thé.)

¹³ Tāi-pi̍t tùi hia tòa Sò-lô kap i ê kiáⁿ Iok-ná-tan ê kut-hâi tò--lâi, koh siu-si̍p hit chhit ê siū tiàu-sí ê lâng ê kut-hâi.

¹⁴ Lâng chiū chiong Sò-lô kap i ê kiáⁿ Iok-ná-tan ê kut-hâi bâi-chòng tī Piān-ngá-bín tōe-khu ê Sé-la, Sò-lô ê lāu-pē Ki-sū ê bōng. In chiàu ông ê bēng-lēng chòe liáu-āu, Siōng-tè ū thiaⁿ in ūi choân-kok ê kî-tó.

Kong-táⁿ Hui-lī-sū-lâng

¹⁵ Hui-lī-sū-lâng koh kap Í-sek-lia̍t-lâng kau-chiàn. Tāi-pi̍t kap i ê kun-peng chòe-hé lo̍h-khì kong-táⁿ Hui-lī-sū-lâng, Tāi-pi̍t chiū chin ià-siān.

¹⁶ Ū chi̍t ê tōa-hàn-cho̍k ê lâng, kiò-chòe Í-si̍t Pí-lo̍k, i ê chhiuⁿ ê thâu ēng tâng chòe, tāng saⁿ kong-kun-pòaⁿ, koh pē sin ê to, beh thâi Tāi-pi̍t.

¹⁷ Sé-lō͘-ngá ê kiáⁿ A-pí-su pó-hō͘ Tāi-pi̍t, phah-sí hit-ê Hui-lī-sū-lâng. Āu-lâi tè Tāi-pi̍t ê lâng tùi i chiù-chōa kóng, “Tùi kin-á-ji̍t khí, lí m̄-thang koh kap goán chhut-chiàn, chiah bián Í-sek-lia̍t ê teng hoa--khì.”

¹⁸ Āu-lâi, Í-sek-lia̍t-lâng tī Ko-pek kap Hui-lī-sū-lâng kau-chiàn; hit-sî ū Hō͘-sa-lâng Se-pí-kai thâi-sí chi̍t ê tōa-hàn-cho̍k ê lâng, miâ kiò-chòe Sat-hut.

¹⁹ In koh tī Ko-pek kap Hui-lī-sū-lâng kau-chiàn; Pek-lī-hêng-lâng Gâi-ní ê kiáⁿ I-le̍k-hap-lân thâi-sí Ka-te̍k-lâng Ko-lī-a; i ê chhiuⁿ-pìⁿ chhin-chhiūⁿ chit-pò͘-ki ê chhia-sim hiah chho͘.

²⁰ In koh tī Ka-te̍k kau-chiàn; tī hia ū chi̍t ê tōa-hàn-lâng, nn̄g ki chhiú kok ū la̍k ki chńg-thâu-á, nn̄g ki kha mā kok ū la̍k ki kha-chńg-thâu-á, kiōng ū jī-cha̍p-sì ki; i mā-sī tōa-hàn-cho̍k ê hō͘-tāi.

²¹ Chit-ê lâng tùi Í-sek-lia̍t ê kun-tūi chhiàng-siaⁿ ê sî, Tāi-pi̍t ê hiaⁿ-ko Sī-bí-a ê kiáⁿ Iok-ná-tan kā i thâi-sí.

²² Chit sì ê lâng sī Ka-te̍k tōa-hàn-cho̍k ê hō͘-tāi; in lóng hō͘ Tāi-pi̍t kap i ê kun-peng thâi-sí.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan