Bìoball air-loidhne

撒母耳記下卷 2 - 現代台語譯本羅馬字版

Tāi-pi̍t Siū Boah-iû Chòe Iû-tāi-ông

¹ Āu-lâi, Tāi-pi̍t mn̄g Siōng Chú kóng, “Góa chiūⁿ-khì Iû-tāi ê chi̍t ê siâⁿ hó--bô?” Siōng Chú kā i kóng, “Hó, thang khì.” Tāi-pi̍t kóng, “Góa tio̍h chiūⁿ-khì tó chi̍t ê siâⁿ?” Siōng Chú kóng, “Khì Hi-pek-lûn.”

² Tāi-pi̍t chiū kap i nn̄g ê bó͘, chiū-sī Iâ-su-lia̍t-lâng A-hi-loán kap Ka-bi̍t-lâng Ná-pà ê ûi-song Ài-pí-kai, lóng chiūⁿ-khì hia.

³ Tāi-pi̍t mā chhōa kun-tè i ê lâng kap in ê ka-koàn chòe-hé chiūⁿ--khì; in chiū tòa tī Hi-pek-lûn hiah-ê siâⁿ.

⁴ Iû-tāi-lâng lâi hia, ēng iû boah Tāi-pi̍t chòe Iû-tāi-ke ê ông. Ū lâng kā Tāi-pi̍t kóng, bâi-chòng Sò-lô--ê sī Ki-lia̍t ê Ngá-pí-lâng.

⁵ Tāi-pi̍t chiū chhe sù-chiá khì kìⁿ Ki-lia̍t ê Ngá-pí-lâng, kā in kóng, “Goān Siōng Chú sù-hok lín, in-ūi lín ū ēng tiong-sêng tùi-thāi lín ê chú Sò-lô, kā i bâi-chòng.

⁶ Goān Siōng Chú ēng jîn-chû sêng-si̍t khoán-thāi lín; góa mā beh tap-siā lín, in-ūi lín ū chòe chit-ê tāi-chì.

⁷ Lín tio̍h kian-kiông ióng-kám, in-ūi lín ê chú Sò-lô í-keng sí. Taⁿ, Iû-tāi-ke mā í-keng ēng iû boah góa chòe in ê ông.”

I-si-pho-siat Chòe Í-sek-lia̍t ê Ông

⁸ Sò-lô ê goân-sòe, Nî-ní ê kiáⁿ Ap-nî-ní, chhōa Sò-lô ê kiáⁿ I-si Pho-siat kè-khì Má-hap-liām,

⁹ siat-li̍p i choh-ông tī-lí Ki-lia̍t, A-siat, Iâ-su-lia̍t, Í-hoat-liân, Piān-ngá-bín, kap só͘-ū ê Í-sek-lia̍t-lâng.

¹⁰ Sò-lô ê kiáⁿ I-si Pho-siat sì-cha̍p hè chòe Í-sek-lia̍t-ông, chē-ūi nn̄g nî. M̄-kú, Iû-tāi-ke tè Tāi-pi̍t.

¹¹ Tāi-pi̍t tī Hi-pek-lûn chòe Iû-tāi-ke ê ông, chóng-kiōng chhit nî la̍k kò-ge̍h.

Sò-lô-ke kap Tāi-pi̍t-ke ê Chiàn-cheng

¹² Nî-ní ê kiáⁿ Ap-nî-ní kap Sò-lô ê kiáⁿ I-si Pho-siat ê jîn-sîn, tùi Má-hap-liām khì Ki-piàn.

¹³ Sé-lō͘-ngá ê kiáⁿ Iok-ap kap Tāi-pi̍t ê jîn-sîn mā chhut--khì, kap in tī Ki-piàn ê chúi-tî piⁿ saⁿ-tú; chi̍t tūi chē tī chúi-tî ê chit-pêng, chi̍t tūi chē tī chúi-tî ê hit-pêng.

¹⁴ Ap-nî-ní tùi Iok-ap kóng, “Lán lâi kiò siàu-liân-lâng tī lán ê bīn-chêng koat-tàu.” Iok-ap kóng, “Hó, hō͘ in chhut--lâi.”

¹⁵ In chiū tiám jîn-sò͘, phài siàu-liân-lâng kè--khì; sio̍k Sò-lô ê kiáⁿ I-si Pho-siat ê Piān-ngá-bín-lâng cha̍p-jī miâ, Tāi-pi̍t ê pō͘-hā mā cha̍p-jī miâ.

¹⁶ In ta̍k-ê khiú tùi-hong ê thâu-khak, ēng to tu̍h-ji̍p tùi-hong ê hia̍p-ē; án-ni, jī-cha̍p-sì ê chòe-chi̍t-ē tó--lo̍h-khì, lóng sí. Só͘-í, Ki-piàn hit-ê só͘-chāi kiò-chòe Hi-lī-kah Hap-sò͘-lîm.

¹⁷ Hit-ji̍t ê kau-chiàn chin ke̍k-lia̍t; Ap-nî-ní kap Í-sek-lia̍t-lâng hō͘ Tāi-pi̍t ê pō͘-hā phah-pāi.

¹⁸ Tī hia ū Sé-lō͘-ngá saⁿ ê kiáⁿ, Iok-ap, A-pí-su, A-sat-hek; A-sat-hek chhin-chhiūⁿ iá-lo̍k hiah-ni̍h gâu cháu.

¹⁹ A-sat-hek tui-jip Ap-nî-ní; ti̍t-ti̍t jip, bô phian-chó, bô phian-iū.

²⁰ Ap-nî-ní oa̍t-thâu khòaⁿ, kóng, “A-sat-hek ah, sī lí á m̄-sī?” Ìn kóng, “Tio̍h!”

²¹ Ap-nî-ní kā i kóng, “Lí oat-khì pa̍t-ūi, lia̍h chi̍t ê siàu-liân-lâng, pak i ê kun-ho̍k.” M̄-kú A-sat-hek ti̍t-ti̍t kā tui, m̄-khéng oa̍t-cháu.

²² Ap-nî-ní koh kā i kóng, “Lí oa̍t-cháu m̄-thang jip góa. Góa ná tio̍h kā lí thâi-sí? Nā kā lí thâi-sí, góa ná ū bīn thang kìⁿ lín hiaⁿ-ko Iok-ap?”

²³ A-sat-hek m̄-khéng oa̍t-cháu; Ap-nî-ní chiū ēng chhiuⁿ tò-chhah i ê pak-tó͘, chhiuⁿ thàng-kè i ê ka-chiah-phiaⁿ, i chiū tó--lo̍h-khì, sí tī hia. Só͘-ū lâi kàu A-sat-hek sí ê só͘-chāi ê lâng, lóng thêng lo̍h-lâi khiā tī hia.

²⁴ Iok-ap kap A-pí-su tui Ap-nî-ní. Ji̍t lo̍h ê sî, in jip kàu thàng Ki-piàn khòng-iá ê lō͘-piⁿ, Ki-a tùi-bīn ê A-má-soaⁿ.

²⁵ Piān-ngá-bín-lâng chū-chi̍p tè Ap-nî-ní, chiâⁿ-chòe chi̍t tīn, khiā tī soaⁿ-téng.

²⁶ Ap-nî-ní kiò Iok-ap kóng, “Lán kiám thang éng-oán thâi bōe soah? Lí kiám m̄ chai kiat-kio̍k ōe chin thòng-khó͘? Lí kàu tī-sî chiah beh hō͘ kun-tè lí ê lâng tò--khì, bô koh jip in ê hiaⁿ-tī?”

²⁷ Iok-ap kóng, “Góa kí éng-oa̍h ê Siōng-tè chiù-chōa, nā m̄-sī lí án-ni kóng, góa ê pō͘-hā chiū ōe jip in ê hiaⁿ-tī kàu thiⁿ-kng.”

²⁸ Tùi án-ni, Iok-ap pûn sàu-kak, kun-tè ê lâng chiū thêng--teh, bô koh tui-jip Í-sek-lia̍t-lâng, mā bô koh kau-chiàn.

²⁹ Ap-nî-ní kap tè i ê lâng kui-mî hêng-kun, kiâⁿ-kè A-la-pa, kè Iok-tàn-hô, kiâⁿ kui chá-kí chiah kàu Má-hap-liām.

³⁰ Iok-ap bô koh jip Ap-nî-ní, chiū tò--lâi, chū-chi̍p só͘-ū tè i ê lâng. A-sat-hek í-gōa, Tāi-pi̍t ê peng kiám cha̍p-káu lâng.

³¹ M̄-kú Tāi-pi̍t ê peng phah-sí Piān-ngá-bín-lâng kap tè Ap-nî-ní ê lâng, chóng-kiōng saⁿ-pah la̍k-cha̍p lâng.

³² In kng A-sat-hek khì Pek-lī-hêng, kā i bâi-chòng tī in lāu-pē ê bōng. Iok-ap kap tè i ê lâng kui-mî hêng-kun, kàu Hi-pek-lûn ê sî, thiⁿ tú-á kng.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan