Bìoball air-loidhne

撒母耳記下卷 18 - 現代台語譯本羅馬字版

Ap-sa-liông ê Sí

¹ Tāi-pi̍t tiàu-chi̍p tè i ê kun-peng, ēng chi̍t-chheng lâng kap chi̍t-pah lâng chòe tan-ūi, chiàu phian-chè siat-li̍p chí-hui-koaⁿ.

² Tāi-pi̍t phài kun-peng chhut--khì, chiong saⁿ-hūn-chi̍t kau hō͘ Sé-lō͘-ngá ê kiáⁿ Iok-ap, saⁿ-hūn-chi̍t kau hō͘ Iok-ap ê hiaⁿ-tī A-pí-su, saⁿ-hūn-chi̍t kau hō͘ Ka-te̍k-lâng Í-thài. Ông tùi kun-peng kóng, “Góa it-tēng beh kap lín chòe-hé chhut-chiàn.”

³ M̄-kú kun-peng kóng, “Lí m̄-thang chhut--khì; goán nā thâi-su tô-cháu, tùi-te̍k bōe chù-ì goán; goán nā chi̍t-pòaⁿ tīn-bông, tùi-te̍k mā bōe khòaⁿ-chòe iàu-kín; lí chi̍t lâng pí goán chi̍t-bān lâng khah tiōng-iàu. Lí lâu tī siâⁿ-lāi pang-chān goán khah hó.”

⁴ Ông kā in kóng, “Lín khòaⁿ-chòe hó--ê, góa chiàu án-ni chòe.” Ông chiū khiā tī siâⁿ-mn̂g piⁿ, kun-peng chi̍t-pah chi̍t-pah, chi̍t-chheng chi̍t-chheng, chiàu chhù-sū chhut--khì.

⁵ Ông bēng-lēng Iok-ap, A-pí-su, Í-thài, kóng, “Lín tio̍h tài-liām góa, m̄-thang siong-hāi hit-ê siàu-liân-lâng Ap-sa-liông.” Ông ūi Ap-sa-liông bēng-lēng hiah-ê siú-léng ê ōe, kun-peng lóng ū thiaⁿ--tio̍h.

⁶ Kun-peng chiū chhut-khì iá-gōa, tī Í-hoat-liân ê chhiū-nâ kap Í-sek-lia̍t-lâng kau-chiàn.

⁷ Tī hia, Í-sek-lia̍t ê kun-tūi thâi-su Tāi-pi̍t ê pō͘-hā; hit-ji̍t chiàn-sí--ê chin chōe, ū nn̄g-bān lâng.

⁸ Kau-chiàn thòaⁿ kàu choân tōe-khu; hit-ji̍t tī chhiū-nâ lāi sí--ê, pí hō͘ to thâi-sí--ê khah chōe.

⁹ Ap-sa-liông khiâ lô, tú-tio̍h Tāi-pi̍t ê pō͘-hā. Lô cháu tùi tōa-châng siōng-chhiū chin ām ê chhiū-oe ē-bīn keng-kè, i ê thâu-mn̂g kau-tio̍h siōng-chhiū-ki, lâng tiàu tī pòaⁿ-khong-tiong; só͘ khiâ ê lô chòe i khì.

¹⁰ Ū chi̍t ê peng-sū khòaⁿ--tio̍h, kā Iok-ap kóng, “Góa khòaⁿ-tio̍h Ap-sa-liông tiàu tī siōng-chhiū.”

¹¹ Iok-ap kā pò i ê lâng kóng, “Siáⁿ? Lí ū khòaⁿ--tio̍h o͘h! Ná bô tng-tiûⁿ kā phah-sí? Lí nā án-ni chòe, góa chiū siúⁿ lí cha̍p tè gûn, kap chi̍t tiâu io-tòa.”

¹² Hit-ê lâng tùi Iok-ap kóng, “Lí chiū-sī hō͘ góa chi̍t-chheng tè gûn, góa mā m̄-káⁿ tāng-chhiú hāi ông ê kiáⁿ; in-ūi goán ū thiaⁿ-tio̍h ông bēng-lēng lí kap A-pí-su, Í-thài, kóng, ‘Lín tio̍h sòe-jī, m̄-thang hāi hit-ê siàu-liân-lâng Ap-sa-liông.’

¹³ Góa nā káⁿ án-ni chòe hāi i ê sìⁿ-miā, ông it-tēng ōe chai, kàu-sî lí mā ōe m̄ chhap góa.”

¹⁴ Iok-ap kóng, “Góa bô sî-kan koh kap lí kóng.” Iok-ap chiū gia̍h saⁿ ki té-chhiuⁿ khì; hit-sî Ap-sa-liông tiàu tī siōng-chhiū iáu oa̍h--teh. Iok-ap chha̍k-thàng Ap-sa-liông ê sim.

¹⁵ Ūi Iok-ap gia̍h bú-khì ê cha̍p ê siàu-liân-lâng kā Ap-sa-liông ûi--teh, kā i thâi-sí.

¹⁶ Iok-ap pûn sàu-kak, kun-peng chiū tò--lâi, bô koh jip Í-sek-lia̍t-lâng; in-ūi Iok-ap kā in chó͘-chí.

¹⁷ In chiong Ap-sa-liông hiat tī chhiū-nâ lāi chi̍t ê tōa chhim-khiⁿ, téng-bīn thia̍p chi̍t-tōa-tui chio̍h-thâu; só͘-ū ê Í-sek-lia̍t-lâng lóng cháu tò-khì ka-kī ê chhù.

¹⁸ Ap-sa-liông oa̍h--teh ê sî, tī Ông ê Soaⁿ-kok ūi ka-kī chhāi chi̍t ki thiāu; i kóng i bô kiáⁿ thang lâu miâ, chiū kā hit-ki thiāu hō-chòe Ap-sa-liông. Kàu kin-á-ji̍t, lâng iáu chheng-ho͘ hit-ki thiāu chòe Ap-sa-liông Kì-liām-pi.

Tāi-pi̍t ūi Ap-sa-liông Ai-siong

¹⁹ Sat-tok ê kiáⁿ A-hi-má-su kóng, “Chún góa cháu-khì tùi ông pò-kò, Siōng Chú í-keng ū kái-kiù i thoat-lī tùi-te̍k ê chhiú.”

²⁰ Iok-ap kā i kóng, “Lí kin-á-ji̍t m̄-thang khì pò siau-sit, lēng-ji̍t chiah khì. Kin-á-ji̍t lí m̄-thang pò siau-sit, in-ūi ông ê kiáⁿ sí--khì.”

²¹ Iok-ap kā chi̍t ê Kó͘-si̍t lô͘-lē kóng, “Lí khì chiong lí só͘ khòaⁿ--tio̍h-ê kā ông pò-kò.” Kó͘-si̍t-lâng tùi Iok-ap kiok-kiong chiū ēng cháu--ê khì.

²² Sat-tok ê kiáⁿ A-hi-má-su koh kā Iok-ap kóng, “Bô-lūn án-chóaⁿ, kiû lí chún góa tè Kó͘-si̍t-lâng ēng cháu--ê khì.” Iok-ap kóng, “Góa ê kiáⁿ, lí pò siau-sit bōe tit-tio̍h siúⁿ, sī-án-chóaⁿ beh khì?”

²³ I ìn kóng, “Bô-lūn án-chóaⁿ, góa beh khì.” Iok-ap kóng, “Lí khì!” A-hi-má-su chiū tùi Iok-tàn pêng-goân ê lō͘ cháu--khì, jip-kè Kó͘-si̍t-lâng.

²⁴ Tāi-pi̍t tú-á chē tī lāi siâⁿ-mn̂g kap gōa siâⁿ-mn̂g ê tiong-kan; siú-bōng ê lâng peh-chiūⁿ siâⁿ-chhiûⁿ, kàu siâⁿ-mn̂g ê lâu-téng koan-khòaⁿ, khòaⁿ-tio̍h chi̍t ê lâng toaⁿ-sin cháu--lâi.

²⁵ Siú-bōng--ê tōa-siaⁿ hoah, tùi ông pò-kò. Ông kóng, “I nā ka-kī chi̍t ê lâi, it-tēng sī beh pò hó siau-sit.” Hit-ê lâng ná cháu ná kūn-óa.

²⁶ Siú-bōng ê lâng koh khòaⁿ-tio̍h lēng-gōa chi̍t ê lâng cháu--lâi, siú-bōng--ê kā kò͘ siâⁿ-mn̂g ê lâng kóng, “Lí khòaⁿ, koh ū chi̍t ê lâng toaⁿ-sin cháu--lâi.” Ông kóng, “Che mā-sī pò hó siau-sit--ê.”

²⁷ Siú-bōng--ê kóng, “Góa khòaⁿ thâu-chêng teh cháu--ê chhin-chhiūⁿ Sat-tok ê kiáⁿ A-hi-má-su.” Ông kóng, “I sī hó lâng, lâi pò hó siau-sit.”

²⁸ A-hi-má-su tùi ông kiò kóng, “Pêng-an!” Chiū tī ông ê bīn-chêng phak-pài, kóng, “Siōng Chú — lí ê Siōng-tè eng-kai siū chheng-chàn! I í-keng chiong hiah-ê khí-chhiú kong-kek góa ê chú góa ê ông ê lâng phah-pāi lah.”

²⁹ Ông kóng, “Siàu-liân-lâng Ap-sa-liông pêng-an á bô?” A-hi-má-su ìn kóng, “Iok-ap phài ông ê po̍k-jîn, chiū sī lí ê po̍k-jîn lâi ê sî, góa ū khòaⁿ-tio̍h hūn-loān ê tiûⁿ-bīn, m̄ chai hoat-seng sím-mi̍h tāi-chì.”

³⁰ Ông kóng, “Lí khiā tiàm piⁿ--á.” I chiū siám-khui, khiā--teh.

³¹ Kó͘-si̍t-lâng mā kàu; pò-kò kóng, “Ū hó siau-sit pò-kò góa ê chú góa ê ông. Siōng Chú kin-á-ji̍t ū thòe lí sin-oan, phah-pāi khí-lâi kong-kek lí ê lâng.”

³² Ông mn̄g Kó͘-si̍t-lâng kóng, “Siàu-liân-lâng Ap-sa-liông ū pêng-an bô?” Kó͘-si̍t-lâng ìn kóng, “Goān góa ê chú góa ê ông ê tùi-te̍k, kap só͘-ū khí-lâi kong-kek lí, beh hāi lí ê lâng, lóng kap hit-ê siàu-liân-lâng kâng-khoán.”

³³ Ông chiū chin siong-sim. I chiūⁿ siâⁿ-mn̂g téng ê pâng-keng thî-khàu, ná kiâⁿ ná kóng, “Góa ê kiáⁿ Ap-sa-liông ah! Góa ê kiáⁿ, góa ê kiáⁿ, Ap-sa-liông ah! Góa khó͘-bōe-tit thòe lí sí. Ap-sa-liông ah, góa ê kiáⁿ, góa ê kiáⁿ!”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan