Bìoball air-loidhne

撒母耳記下卷 16 - 現代台語譯本羅馬字版

Tāi-pi̍t kap Sé-pa

¹ Tāi-pi̍t kè soaⁿ-téng bô jōa hn̄g, Bí-hui-pho-siat ê po̍k-jîn Sé-pa lâi gêng-chiap; i khan nn̄g chiah kòa oaⁿ ê lû-á, chài nn̄g-pah tè piáⁿ, chi̍t-pah lia̍p phû-tô-koaⁿ-oân, chi̍t-pah lia̍p bû-hoa-kó-koaⁿ-oân, kap chi̍t phê-lông ê chiú.

² Ông mn̄g Sé-pa kóng, “Lí sī-án-chóaⁿ tòa chiah-ê lâi?” Sé-pa kóng, “Lû sī beh hō͘ ông ê ka-koàn khiâ, piáⁿ kap sek ê ké-chí beh hō͘ siàu-liân-lâng chia̍h, chiú beh hō͘ tī khòng-iá ià-siān ê lâng lim.”

³ Ông mn̄g kóng, “Lí ê chú-lâng Sò-lô ê sun tī tó-ūi?” Sé-pa ìn ông kóng, “I iáu tī Iâ-lō͘-sat-léng, in-ūi i kóng, ‘Í-sek-lia̍t-lâng kin-á-ji̍t beh chiong góa ê a-kong ê kok hêng góa.’”

⁴ Ông kā Sé-pa kóng, “Bí-hui-pho-siat só͘-ū--ê lóng sù hō͘ lí.” Sé-pa kóng, “Góa khiam-pi phak-pài; goān góa tit-tio̍h góa ê chú góa ê ông ê un-tián.”

Tāi-pi̍t kap Sī-múi

⁵ Tāi-pi̍t-ông kàu Pa-hō͘-lîm ê sî, ū Sò-lô ka-cho̍k chi̍t ê lâng, Ki-la ê kiáⁿ Sī-múi chhut--lâi, ná kiâⁿ ná chiù-chó͘,

⁶ koh khioh chio̍h-thâu tìm Tāi-pi̍t-ông kap i ê jîn-sîn; hit-sî kun-tè ông ê lâng kap ióng-sū lóng tī ông ê chó-iū.

⁷ Sī-múi chiù-chó͘ kóng, “Lí chit-ê lâu lâng ê huih ê hiong-siú, lí chit-ê pháiⁿ-lâng, khì-sí!

⁸ Lí chhiúⁿ Sò-lô ê ông-ūi, Siōng Chú chiong lí lâu i ka-cho̍k ê huih ê chōe lóng kui tī lí, chiong chit-ê kok kau hō͘ lí ê kiáⁿ Ap-sa-liông. Taⁿ lí tú-tio̍h ok-pò, in-ūi lí sī lâu lâng ê huih ê hiong-siú.”

⁹ Sé-lō͘-ngá ê kiáⁿ A-pí-su kā ông kóng, “Chit-chiah sí-káu, ná thang hō͘ i chiù-chó͘ góa ê chú góa ê ông? Chún góa kè--khì, chām i ê thâu.”

¹⁰ Ông kóng, “Lín chiah-ê Sé-lō͘-ngá ê kiáⁿ, che bô lín ê tāi-chì. Chhut-chāi i chiù-chó͘, in-ūi sī Siōng Chú hoan-hù i chiù-chó͘ góa; só͘-í bô lâng ōe-tàng kóng i sī-án-chóaⁿ án-ni chòe.”

¹¹ Tāi-pi̍t koh kā A-pí-su kap ông ê jîn-sîn kóng, “Góa ê chhin-siⁿ-kiáⁿ to siàu-siūⁿ góa ê sìⁿ-miā, hô-hòng chit-ê Piān-ngá-bín-lâng! Chhut-chāi i chiù-chó͘, in-ūi sī Siōng Chú kah i án-ni chòe.

¹² Kiám-chhái Siōng Chú tài-liām góa ê khó͘-kéng, ōe si-un hō͘ góa lâi tāi-thòe kin-á-ji̍t ê chiù-chó͘.”

¹³ Tāi-pi̍t kap tè i ê lâng kè-sio̍k kiâⁿ. Sī-múi kiâⁿ tī tùi-bīn ê soaⁿ-phiâⁿ, ná kiâⁿ ná chiù-chó͘, koh tìm chio̍h-thâu, iā thô͘-hún.

¹⁴ Ông kap tè i ê lâng kàu chi̍t ê só͘-chāi; in lóng chin ià-siān, chiū tī hia hioh-khùn.

Ap-sa-liông tī Iâ-lō͘-sat-léng

¹⁵ Ap-sa-liông kap tè i ê Í-sek-lia̍t jîn-bîn lâi kàu Iâ-lō͘-sat-léng, A-hi-to-hut mā kap i chòe-hé.

¹⁶ Tāi-pi̍t ê pêng-iú A-ki-lâng Hō͘-su lâi Ap-sa-liông hia, tùi Ap-sa-liông kóng, “Goān ông bān-sòe! Goān ông bān-sòe!”

¹⁷ Ap-sa-liông kā Hō͘-su kóng, “Lí án-ni chòe, tùi lí ê pêng-iú kiám ū tiong-sêng? Lí ná bô kap lí ê pêng-iú chòe-hé khì?”

¹⁸ Hō͘-su kā Ap-sa-liông kóng, “M̄-sī án-ni, Siōng Chú kap Í-sek-lia̍t jîn-bîn só͘ soán--ê, góa beh kui-sūn i, mā beh tè i.

¹⁹ Koh chi̍t hāng, góa tio̍h ho̍k-sāi siáⁿ-lâng? Kiám m̄-sī tio̍h ho̍k-sāi ông ê kiáⁿ? Góa án-chóaⁿ ho̍k-sāi lí ê lāu-pē, mā beh án-ni ho̍k-sāi lí.”

²⁰ Ap-sa-liông kā A-hi-to-hut kóng, “Lín tio̍h chhut kè-chhek, khòaⁿ lán koh-lâi tio̍h án-chóaⁿ chòe.”

²¹ A-hi-to-hut kā Ap-sa-liông kóng, “Lí khì kap lí ê lāu-pē lâu--lo̍h-lâi kò͘ ông-kiong hiah-ê pîn-hui chòe-hé khùn; Í-sek-lia̍t ê chèng-lâng chai lí káⁿ jiá lí ê lāu-pē siū-khì, hiah-ê kui-sūn lí ê lâng ōe koh-khah kian-koat.”

²² In chiū kā Ap-sa-liông tī ông-kiong ê chhù-téng tah pò͘-pîⁿ. Ap-sa-liông chiū tī Í-sek-lia̍t chèng-lâng bīn-chêng ji̍p--khì, kap i ê lāu-pē ê pîn-hui khùn.

²³ Hit-sî A-hi-to-hut só͘ thê-chhut ê kè-chhek, chhin-chhiūⁿ tùi Siōng-tè lâi ê ōe; in-ūi án-ni, A-hi-to-hut ê ì-kiàn lóng siū Tāi-pi̍t kap Ap-sa-liông chun-tiōng.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan