Bìoball air-loidhne

撒母耳記下卷 15 - 現代台語譯本羅馬字版

Ap-sa-liông Chō-hoán

¹ Chiah-ê tāi-chì liáu-āu, Ap-sa-liông ūi ka-kī chún-pī bé kap chiàn-chhia, koh phài gō͘-cha̍p ê peng tī thâu-chêng khui-lō͘.

² Ap-sa-liông siông-siông chá-chá khí--lâi, khiā tī siâⁿ-mn̂g-kháu ê lō͘-piⁿ; nā ū lâng ū àn-kiāⁿ beh hō͘ ông phòaⁿ-toàn, Ap-sa-liông chiū kiò i lâi, mn̄g i kóng, “Lí sī tó chi̍t ê siâⁿ ê lâng?” I ìn kóng, “Po̍k-jîn sī Í-sek-lia̍t bó͘ chi̍t ê chi-cho̍k ê lâng.”

³ Ap-sa-liông kā i kóng, “Lí ê àn-kiāⁿ ha̍p-chêng ha̍p-lí, m̄-kú ông bô kau-tài lâng chhú-lí lí ê àn-kiāⁿ.”

⁴ Ap-sa-liông koh kóng, “Khó-sioh bô lâng chí-phài góa chòe chit-ê tōe ê sím-phòaⁿ-koaⁿ; nā ū lâng ū sio-kò tio̍h sím-phòaⁿ ê àn-kiāⁿ, lâi góa chia, góa ōe chiàu kong-tō phòaⁿ-koat.”

⁵ Nā ū lâng lâi pài i, i chiū chhun-chhiú khan i, kā i chim.

⁶ Í-sek-lia̍t-lâng ê tiong-kan, nā ū lâng beh khì kìⁿ ông chhéng-kiû phòaⁿ-toàn, Ap-sa-liông lóng án-ni tùi-thāi in. Ap-sa-liông ēng án-ni àm-tiong tit-tio̍h Í-sek-lia̍t-lâng ê sim.

⁷ Sì nî āu, Ap-sa-liông tùi ông kóng, “Kiû lí chún góa khì Hi-pek-lûn, hō͘ góa thang tùi Siōng Chú siā-goān.

⁸ In-ūi po̍k-jîn tòa tī Sū-lī-a ê Ki-su̍t ê sî ū hē-goān kóng, ‘Siōng Chú nā hō͘ góa koh tò-lâi Iâ-lō͘-sat-léng, góa beh khì Hi-pek-lûn ho̍k-sāi Siōng Chú.’”

⁹ Ông kā i kóng, “Lí thang pêng-an khì.” Ap-sa-liông chiū chhut-hoat, khì Hi-pek-lûn.

¹⁰ Ap-sa-liông àm-tiong phài sù-chiá khì Í-sek-lia̍t ta̍k-ê chi-cho̍k, kóng, “Lín chi̍t-ē thiaⁿ-tio̍h sàu-kak ê siaⁿ, chiū hoah kóng, ‘Ap-sa-liông tī Hi-pek-lûn choh-ông lah!’”

¹¹ M̄-kú Ap-sa-liông tùi Iâ-lō͘-sat-léng só͘ chhiáⁿ kap i khì hit nn̄g-pah ê lâng, lóng m̄ chai tāi-chì ê thâu-bé.

¹² Ap-sa-liông hiàn-chè ê sî, phài lâng khì Ki-lô-siâⁿ chhiáⁿ Tāi-pi̍t ê chham-bô͘ A-hi-to-hut lâi; tùi án-ni, tè Ap-sa-liông ê lâng jú lâi jú chōe, hoán-poān ê sè-bīn ná lâi ná kiông.

Tāi-pi̍t Tô-lān

¹³ Ū lâng lâi kā Tāi-pi̍t pò-kò kóng, “Í-sek-lia̍t-lâng ê sim lóng kui-ǹg Ap-sa-liông lah.”

¹⁴ Tāi-pi̍t tùi hiah-ê kap i tī Iâ-lō͘-sat-léng ê jîn-sîn kóng, “Khí--lâi, lán tio̍h tô-cháu; nā bô, lán bōe-tàng tô-pī Ap-sa-liông. Tio̍h kóaⁿ-kín cháu, chiah bián i liâm-piⁿ jip-tio̍h lán, siong-hāi lán, thâi-sí siâⁿ-lāi ê lâng.”

¹⁵ Ông ê jîn-sîn kā ông kóng, “Goán ê chú goán ê ông só͘ koat-tēng--ê, lí ê po̍k-jîn lóng beh chiàu án-ni chòe.”

¹⁶ Ông chhut-siâⁿ, i ê ka-koàn lóng tè tī i ê āu-bīn, chí-ū lâu cha̍p ê pîn-hui kò͘ ông-kiong.

¹⁷ Siâⁿ-lāi ê lâng mā tè ông lī-khui; in kiâⁿ kàu siâⁿ ê chòe-āu chi̍t keng chhù thêng--teh.

¹⁸ Ông ê jîn-sîn lóng tī i ê bīn-chêng kiâⁿ--kè-khì; só͘-ū ê Ki-lī-thê-lâng, Pí-lī-thê-lâng, kap tùi Ka-te̍k tè i lâi hit la̍k-pah ê Ka-te̍k-lâng, mā lóng tī ông ê bīn-chêng kiâⁿ--kè-khì.

¹⁹ Ông kā Ka-te̍k-lâng Í-thài kóng, “Lí sī-án-chóaⁿ beh kap goán khì? Tio̍h tò-khì óa sin-ông; lí sī gōa-kok-lâng, tùi lí ê pún-kok tô-lān lâi chia.

²⁰ Lí chā-hng chiah lâi, kin-á-ji̍t góa ka-kī to m̄ chai beh khì tó-ūi, ná thang hō͘ lí kap goán chòe-hé phiau-liû? Tńg--khì, kā lí ê hiaⁿ-tī chòe-hé chhōa--tò-khì. Goān Siōng Chú ēng chû-ài sìn-si̍t tùi-thāi lí.”

²¹ Í-thài ìn ông kóng, “Góa kí éng-oa̍h ê Siōng Chú tī góa ê chú góa ê ông bīn-chêng chiù-chōa, ông bô-lūn tī sím-mi̍h só͘-chāi, lí ê po̍k-jîn bô-lūn sí oa̍h lóng ōe tī hia.”

²² Tāi-pi̍t kā Í-thài kóng, “Hó, lí chìn-chêng kiâⁿ.” Ka-te̍k-lâng Í-thài kap hiah-ê tè i ê lâng, kap só͘-ū ê gín-á chiū lóng kè--khì.

²³ Kun-tè ông ê lâng kè--khì ê sî, só͘-ū ê lâng lóng tōa-siaⁿ thî-khàu. Ông kè Khip-lûn Khoe-kok, jîn-bîn mā kè--khì, ǹg thàng khòng-iá ê lō͘ kiâⁿ--khì.

²⁴ Khòaⁿ leh, chè-si Sat-tok lâi lah, só͘-ū tè i ê Lī-bī-lâng mā kng Siōng-tè ê iok-kūi lâi. In chiong Siōng-tè ê iok-kūi hē tī hia. A-pí-a-tha mā lâi kàu hia, thèng-hāu tùi siâⁿ-lāi chhut--lâi ê jîn-bîn lóng kè--khì.

²⁵ Ông kā Sat-tok kóng, “Lí kng Siōng-tè ê iok-kūi tò-khì siâⁿ-lāi. Góa nā tit-tio̍h Siōng Chú ê un-tián, I ōe hō͘ góa tò--lâi, hō͘ góa koh khòaⁿ-tio̍h iok-kūi, kap khǹg iok-kūi ê só͘-chāi.

²⁶ Siōng Chú nā kóng, ‘Góa bô kah-ì lí.’ Goān I chiàu I ê ì-sù tùi-thāi góa.”

²⁷ Ông koh kā Sat-tok kóng, “Lí kiám m̄-sī sian-kiàn? Lí thang pêng-an tò-khì siâⁿ-lāi; lí ê kiáⁿ A-hi-má-su kap A-pí-a-tha ê kiáⁿ Iok-ná-tan, lóng thang kap lí chòe-hé tò--khì.

²⁸ Góa ōe tī khòng-iá ê tō͘-kháu thèng-hāu lín pò siau-sit hō͘ góa.”

²⁹ Sat-tok kap A-pí-a-tha chiū kng Siōng-tè ê iok-kūi tò-khì Iâ-lō͘-sat-léng; in chiū lâu tī hia.

³⁰ Tāi-pi̍t tùi ǹg Kaⁿ-ná-soaⁿ ê lō͘ chiūⁿ--khì, khàm-thâu thǹg-chhiah-kha, ná kiâⁿ ná háu; tè i khì ê lâng mā khàm-thâu chiūⁿ--khì, ná kiâⁿ ná háu.

³¹ Ū lâng pò Tāi-pi̍t kóng, “A-hi-to-hut mā tè Ap-sa-liông tī poān-tóng ê tiong-kan.” Tāi-pi̍t kóng, “Siōng Chú ah, kiû lí hō͘ A-hi-to-hut ê kè-bô͘ lo̍k-khong.”

³² Tāi-pi̍t chiūⁿ kàu soaⁿ-téng kèng-pài Siōng-tè ê só͘-chāi ê sî, A-ki-lâng Hō͘-su thiah-li̍h saⁿ, thâu-khak sám thô͘-hún, lâi gêng-chiap i.

³³ Tāi-pi̍t kā i kóng, “Lí nā kap góa khì, ōe thoa-lūi góa;

³⁴ lí nā tò-khì siâⁿ-lāi, kā Ap-sa-liông kóng, ‘Ông ah, góa beh chòe lí ê po̍k-jîn; góa í-chêng chòe lí lāu-pē ê po̍k-jîn, taⁿ góa mā beh án-ni chòe lí ê po̍k-jîn.’ Án-ni lí chiū ōe-tàng thòe góa phò-hoāi A-hi-to-hut ê kè-bô͘.

³⁵ Chè-si Sat-tok kap A-pí-a-tha mā ōe kap lí tī hia. Lí tī ông-kiong só͘ thiaⁿ--tio̍h-ê, tio̍h kā chè-si Sat-tok kap A-pí-a-tha kóng.

³⁶ Sat-tok ê kiáⁿ A-hi-má-su, A-pí-a-tha ê kiáⁿ Iok-ná-tan, mā kap in tī hia; lín só͘ thiaⁿ--tio̍h-ê, tio̍h kau-tài in lâi pò góa.”

³⁷ Tùi án-ni, Ap-sa-liông ji̍p Iâ-lō͘-sat-léng ê sî, Tāi-pi̍t ê pêng-iú Hō͘-su mā ji̍p-siâⁿ.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan