Bìoball air-loidhne

撒母耳記下卷 11 - 現代台語譯本羅馬字版

Tāi-pi̍t kap Poa̍t-sī-pa

¹ Keh-nî chhun-thiⁿ, lia̍t-ông chhut-chiàn ê sî, Tāi-pi̍t phài Iok-ap kap i ê pō͘-hā, í-ki̍p Í-sek-lia̍t choân-kun chhut--khì. In thâi-iâⁿ A-bûn-lâng, ûi-kong La-pa-siâⁿ. Tāi-pi̍t lâu tī Iâ-lō͘-sat-léng.

² Ū chi̍t ji̍t hông-hun ê sî, Tāi-pi̍t tùi bîn-chhn̂g khí--lâi, tī ông-kiong ê chhù-téng kiâⁿ-lâi-kiâⁿ-khì; tùi chhù-téng khòaⁿ-tio̍h chi̍t ê hū-jîn-lâng teh sóe-e̍k; hū-jîn-lâng siⁿ-chòe chin súi.

³ Tāi-pi̍t chiū chhe lâng khì thàm-thiaⁿ hit-ê hū-jîn-lâng. Ū lâng kóng, “I sī Í-liân ê cha-bó͘-kiáⁿ, Hek-lâng O͘-lī-a ê bó͘ Poa̍t-sī-pa.”

⁴ Tāi-pi̍t chhe sù-chiá khì chhōa Poa̍t-sī-pa lâi i hia. Hit-sî, hū-jîn-lâng ge̍h-keng tú-tú chheng-khì, Tāi-pi̍t kap i chòe-hé khùn. Āu-lâi, i chiū tò-khì in chhù.

⁵ Hū-jîn-lâng hoâi-īn, chiū chhe lâng kā Tāi-pi̍t kóng, “Góa ū-sin lah.”

⁶ Tāi-pi̍t chhe lâng khì kā Iok-ap kóng, “Lí phài Hek-lâng O͘-lī-a lâi góa chia.” Iok-ap chiū chhe O͘-lī-a khì kìⁿ Tāi-pi̍t.

⁷ O͘-lī-a lâi, Tāi-pi̍t mn̄g i Iok-ap hó--bô, kun-peng hó--bô, kau-chiàn hó-sè--bô.

⁸ Tāi-pi̍t kā O͘-lī-a kóng, “Lí tńg-khì lín tau hioh-khùn.” O͘-lī-a chhut ông-kiong liáu-āu, ông chiū sàng chi̍t hūn lé-mi̍h hō͘ i.

⁹ M̄-kú O͘-lī-a kap i chú-lâng ê pō͘-hā chòe-hé khùn tī ông-kiong mn̂g-kháu, bô tò-khì in tau.

¹⁰ Ū lâng kā Tāi-pi̍t kóng O͘-lī-a bô tńg-khì in tau. Tāi-pi̍t chiū mn̄g O͘-lī-a, “Lí kiám m̄-sī tùi chin hn̄g tńg--lâi, sī-án-chóaⁿ m̄ tò-khì lín tau?”

¹¹ O͘-lī-a tùi Tāi-pi̍t kóng, “Iok-kūi, í-ki̍p Í-sek-lia̍t kap Iû-tāi choân-kun lóng tiàm tī pò͘-pîⁿ; góa ê chú Iok-ap kap ông ê pō͘-hā tī iá-gōa chat-iâⁿ; góa ná thang tò-khì chhù--ni̍h lim-chia̍h, kap góa ê bó͘ tâng-pâng? Góa kí lí ê sìⁿ-miā chiù-chōa, góa choa̍t-tùi bô beh chòe chit-khoán tāi-chì.”

¹² Tāi-pi̍t kā O͘-lī-a kóng, “Lí kin-á-ji̍t iû-goân tòa chia, bîn-á-chài góa phài lí tńg--khì.” O͘-lī-a tī hit-ji̍t kap keh-ji̍t lâu tī Iâ-lō͘-sat-léng.

¹³ Tāi-pi̍t chhiáⁿ O͘-lī-a lâi chòe-hé lim-chia̍h, hō͘ i lim kah chùi. Thiⁿ àm, O͘-lī-a chhut-khì i chú-lâng ê pō͘-hā hia, khùn tī i ka-kī ê thán-á, bô tò-khì in tau.

¹⁴ Keh-chá-khí, Tāi-pi̍t siá chi̍t tiuⁿ phoe hō͘ Iok-ap, thok O͘-lī-a tòa--khì.

¹⁵ Phoe-lāi siá kóng, “Tio̍h phài O͘-lī-a khì chiân-sòaⁿ siōng gûi-hiám ê só͘-chāi; jiân-āu lín lóng thiat-thè, hō͘ i chiàn-sí.”

¹⁶ Iok-ap ûi siâⁿ ê sî, i chai tùi-te̍k hông-ōe siōng-kiông ê só͘-chāi tī tó-ūi, chiū phài O͘-lī-a khì hia.

¹⁷ Siâⁿ-lāi ê hông-ōe-kun chhut-lâi kap Iok-ap kau-chiàn; Tāi-pi̍t ê pō͘-hā sí kúi-nā lâng, Hek-lâng O͘-lī-a mā chiàn-sí.

¹⁸ Iok-ap phài lâng khì kā Tāi-pi̍t pò-kò kau-chiàn ê sū.

¹⁹ I hoan-hù sù-chiá kóng, “Lí siông-sè pò-kò kau-chiàn ê sū liáu-āu,

²⁰ ông nā siū-khì, kóng, ‘Lín chìn-kong ê sî, ná ōe hiah óa siâⁿ-chhiûⁿ? Kiám m̄ chai tùi-te̍k ōe tùi siâⁿ-chhiûⁿ téng siā-chìⁿ?

²¹ Í-chêng sím-mi̍h-lâng phah-sí Ki-tiân ê kiáⁿ A-pí-bí-le̍k? Kiám m̄-sī chi̍t ê hū-jîn-lâng tùi chhiûⁿ-téng hiat chio̍h-bō ê téng-tún kòng-tio̍h i ê thâu-khak, hō͘ i sí tī Thê-pī-su? Lín sī-án-chóaⁿ hiah óa siâⁿ-chhiûⁿ?’ Lí tio̍h kóng, ‘Lí ê po̍k-jîn Hek-lâng O͘-lī-a mā sí.’”

²² Sù-chiá khì, chiàu Iok-ap só͘ bēng-lēng--ê kā Tāi-pi̍t pò-kò.

²³ Sù-chiá tùi Tāi-pi̍t kóng, “Tùi-te̍k pí goán khah kiông, chhut-lâi iá-gōa kong-kek goán, goán kā in phah kàu siâⁿ-mn̂g-kháu.

²⁴ Siā-chìⁿ ê lâng tùi chhiûⁿ-téng siā lí ê pō͘-hā; ông ê pō͘-hā sí kúi-nā lâng, lí ê pō͘-hā Hek-lâng O͘-lī-a mā tī hia chiàn-sí.”

²⁵ Tāi-pi̍t kā hit-ê sù-chiá kóng, “Lí tio̍h án-ni kā Iok-ap kóng, ‘M̄-bián ūi-tio̍h chit-ê sū sim kan-khó͘, in-ūi chiàn-cheng lóng ū lâng ōe sí tī to-ē; lí tio̍h chīn-la̍t kong-siâⁿ, kā siâⁿ kong-phòa.’ Lí tio̍h án-ni kā Iok-ap kó͘-lē.”

²⁶ O͘-lī-a ê bó͘ thiaⁿ-tio̍h i ê tiōng-hu í-keng sí, chiū ūi i thî-khàu.

²⁷ Song-sū kiat-sok, Tāi-pi̍t chiū chhe lâng chhōa Poa̍t-sī-pa ji̍p-kiong. I chiū chòe Tāi-pi̍t ê bó͘, kā Tāi-pi̍t siⁿ chi̍t ê kiáⁿ. Chóng-sī Siōng Chú tùi Tāi-pi̍t chòe chit-ê tāi-chì chin bô hoaⁿ-hí.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan