Bìoball air-loidhne

撒母耳記上卷 9 - 現代台語譯本羅馬字版

Sò-lô Khì Chhē Sat-bó-ní

¹ Ū chi̍t ê Piān-ngá-bín chi-cho̍k ê lâng, kiò-chòe Ki-sū, sī A-pia̍t ê kiáⁿ, Sé-lô ê sun, Pí-ko-la ê cheng-sun, A-húi-a ê goân-sun; i sī hó-gia̍h-lâng.

² I ū chi̍t ê kiáⁿ, kiò-chòe Sò-lô, ióng-chòng koh eng-chùn. Í-sek-lia̍t-lâng bô chi̍t ê ōe-tàng kap i pí; i pí pa̍t-lâng khah koân chi̍t lia̍p thâu.

³ Sò-lô ê lāu-pē Ki-sū phah-m̄-kìⁿ kúi-nā chiah lû-bú. Ki-sū kā Sò-lô kóng, “Lí chhōa chi̍t ê po̍k-jîn khì chhē hiah-ê lû-á.”

⁴ In kiâⁿ-thàu Í-hoat-liân soaⁿ-khu, Sa-lī-sa tōe-khu, Sa-lîm tōe-khu, āu-lâi kàu Piān-ngá-bín tōe-khu, lóng chhē bô.

⁵ In kàu So͘-hut tōe-khu ê sî, Sò-lô kā i ê po̍k-jîn kóng, “Lán tńg--lâi-khì. Nā bô, lāu-pē bô hoân-ló lû, soah hoân-ló lán.”

⁶ Po̍k-jîn kóng, “Tán leh, chit-ê chng-siā ū chi̍t ê Siōng-tè tiōng-iōng ê lâng siū tāi-ke kèng-tiōng; i só͘ kóng--ê lóng ōe si̍t-hiān; lán lâi-khì chhē i; bô-tiāⁿ-tio̍h i ōe kā lán chí-sī khì tó-ūi chhē lû.”

⁷ Sò-lô kā po̍k-jîn kóng, “Lán nā beh khì kìⁿ i, ū sím-mi̍h thang sàng i? Lán tē-á lāi í-keng bô chia̍h-mi̍h, mā bô lé-mi̍h thang sàng hit-ê Siōng-tè tiōng-iōng ê lâng. Lán iáu ū sím-mi̍h--bô?”

⁸ Po̍k-jîn koh ìn Sò-lô, “Góa ū chi̍t tè sòe-tè gûn-á, thang sàng hō͘ hit-ê Siōng-tè tiōng-iōng ê lâng, chhiáⁿ i kā lán kóng tī tó-ūi ōe chhē-tio̍h lû-á.”

⁹ (Í-chêng Í-sek-lia̍t-lâng beh kiû-mn̄g Siōng-tè, ōe kóng, “Lán lâi-khì chhē sian-kiàn.” Khah-chá ê sian-kiàn kin-á-ji̍t kiò-chòe sian-ti.)

¹⁰ Sò-lô kā po̍k-jîn kóng, “Hó, lán lâi-khì.” In chiū khì Siōng-tè tiōng-iōng ê lâng tòa ê siâⁿ.

¹¹ In chiūⁿ soaⁿ-phiâⁿ beh ji̍p-siâⁿ ê sî, tú-tio̍h kúi-nā ê cha-bó͘ gín-á chhut-lâi beh chhiūⁿ-chúi, chiū mn̄g in, “Sian-kiàn ū tī chia bô?”

¹² Cha-bó͘ gín-á ìn kóng, “Ū, i tī chia; tú tī lín thâu-chêng. Kín khì, i kin-á-ji̍t tú-hó lâi chit-ê siâⁿ, beh tī soaⁿ-thâu-tôaⁿ ūi bîn-chiòng hiàn-chè.

¹³ Lín chi̍t-ē ji̍p-siâⁿ, tī i iáu-bē chiūⁿ soaⁿ-thâu-tôaⁿ chia̍h chè-mi̍h í-chêng ōe chhē-tio̍h i. In-ūi bîn-chiòng bōe-tàng seng chia̍h, tio̍h tán i chiok-hok chè-mi̍h liáu-āu, siū chhiáⁿ ê lâng chiah ōe-tàng chia̍h. Lín chit-chūn khì, chiū ōe chhē-tio̍h i.”

¹⁴ Sò-lô kap i ê po̍k-jîn chiū kè-sio̍k kiâⁿ. In beh ji̍p-siâⁿ ê sî, Sat-bó-ní tú-tú ǹg in kiâⁿ--lâi, beh chhut-siâⁿ khì soaⁿ-thâu-tôaⁿ.

¹⁵ Sò-lô iáu-bē kàu ê chêng chi̍t ji̍t, Siōng Chú í-keng kā Sat-bó-ní khé-sī kóng,

¹⁶ “Bîn-á-chài chit-ê sî-chūn, góa beh chhe chi̍t ê lâng tùi Piān-ngá-bín tōe-khu lâi lí chia; lí tio̍h kā i boah-iû, siat-li̍p i chòe góa ê chú-bîn Í-sek-lia̍t ê thóng-tī-chiá; i ōe kiù góa ê chú-bîn thoat-lī Hui-lī-sū-lâng ê chhiú. Góa ū khòaⁿ-tio̍h góa ê chú-bîn ê khùn-khó͘, thiaⁿ-tio̍h in ai-kiû ê siaⁿ.”

¹⁷ Sat-bó-ní chi̍t-ē khòaⁿ-tio̍h Sò-lô, Siōng Chú chiū tùi i kóng, “Chit-ê chiū-sī góa kā lí kóng beh tī-lí góa ê chú-bîn hit-ê lâng.”

¹⁸ Sò-lô tī siâⁿ-mn̂g lāi kiâⁿ-óa Sat-bó-ní, kā i mn̄g, “Chhiáⁿ mn̄g, sian-kiàn ê chhù tī tó-ūi?”

¹⁹ Sat-bó-ní ìn Sò-lô kóng, “Góa chiū-sī sian-kiàn. Lí seng chiūⁿ-khì soaⁿ-thâu-tôaⁿ. Kin-á-ji̍t lín beh kap góa chòe-hé chia̍h-pn̄g; bîn-á-chá-khí góa ōe sàng lí tńg--khì; lí teh hoân-ló ê tāi-chì góa ōe kā lí kóng.

²⁰ Lí saⁿ ji̍t chêng phah-m̄-kìⁿ hiah-ê lû-á, lí m̄-bián hoân-ló, í-keng chhē--tio̍h lah. Í-sek-lia̍t-lâng só͘ teh khat-bō͘--ê sī sím-mi̍h-lâng? Kiám m̄-sī lí kap lín lāu-pē ê ka-cho̍k?”

²¹ Sò-lô ìn kóng, “Góa sī Piān-ngá-bín-lâng, sio̍k Í-sek-lia̍t-lâng siōng sòe ê chi-cho̍k; goán ka-cho̍k koh sī Piān-ngá-bín chi-cho̍k tiong siōng sòe--ê. Lí ná kā góa kóng chiah-ê ōe?”

²² Sat-bó-ní chhōa Sò-lô kap i ê po̍k-jîn ji̍p-khì kheh-thiaⁿ, hō͘ in tī só͘ chhiáⁿ ê lâng tiong-kan chē tōa-ūi; só͘ chhiáⁿ ê lâng-kheh tāi-iok ū saⁿ-cha̍p ê.

²³ Sat-bó-ní kā chú-chia̍h--ê kóng, “Góa kau-tài lí siu--khí-lâi hit-hūn thang phâng--chhut-lâi.”

²⁴ Chú-chia̍h--ê chiū chiong te̍k-soán ê tōa-thúi phâng--chhut-lâi, hē tī Sò-lô bīn-chêng. Sat-bó-ní kóng, “Chit-hūn sī ūi-tio̍h lí lâu--ê, chhiáⁿ lí chia̍h. Tī góa iau-chhiáⁿ lâng-kheh ê sî, chiū ū-sian chún-pī, lâu kàu chit-ê sî-chūn.” Hit-ji̍t Sò-lô chiū kap Sat-bó-ní chòe-hé chia̍h.

²⁵ In tùi soaⁿ-thâu-tôaⁿ lo̍h--lâi, ji̍p-siâⁿ, Sat-bó-ní kap Sò-lô tī chhù-téng kóng-ōe.

Sat-bó-ní Siat-li̍p Sò-lô Choh Thóng-tī-chiá

²⁶ Thàu-chá thiⁿ phú-kng ê sî, Sò-lô iáu tī chhù-téng teh khùn, Sat-bó-ní kiò i, “Khí--lâi, góa sàng lí tò--khì.” Sò-lô chiū khí--lâi; i kap Sat-bó-ní nn̄g lâng chhut-khì gōa-bīn.

²⁷ In kiâⁿ kàu siâⁿ ê kak-thâu, Sat-bó-ní kā Sò-lô kóng, “Kiò po̍k-jîn seng khì.” Po̍k-jîn chiū khì. Sat-bó-ní koh kóng, “Tiàm chia sió tán--chi̍t-ē, góa beh kā lí thoân-ta̍t Siōng-tè ê ōe.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan