撒母耳記上卷 8 - 現代台語譯本羅馬字版

Í-sek-lia̍t-lâng Iau-kiû Siat-li̍p Ông

¹ Sat-bó-ní í-keng lāu, chiū siat-li̍p i nn̄g ê kiáⁿ chòe Í-sek-lia̍t ê sū-su.

² Tōa-kiáⁿ Iok-ní kap tē-jī kiáⁿ A-pí-ngá lóng tī Pia̍t-sī-pa chòe sū-su.

³ M̄-kú in bô o̍h in lāu-pē ê bô͘-iūⁿ; in tham put-gī-chi-châi, siu hóe-lō͘, bô chiàu kong-tō chhâi-koat.

⁴ Tùi án-ni, Í-sek-lia̍t ê tiúⁿ-ló lóng chū-chi̍p lâi La-má kìⁿ Sat-bó-ní,

⁵ kā i kóng, “Lí í-keng nî-lāu, lí nn̄g ê kiáⁿ bô o̍h lí ê bô͘-iūⁿ. Só͘-í tio̍h siat-li̍p chi̍t ê ông kā goán tī-lí, chhin-chhiūⁿ pa̍t-ê kok-ka kâng-khoán.”

⁶ Sat-bó-ní tùi in iau-kiû chi̍t ê ông ê sū bô hoaⁿ-hí. I chiū tùi Siōng Chú kî-tó.

⁷ Siōng Chú tùi Sat-bó-ní kóng, “Jîn-bîn ê iau-kiû, lí tio̍h chiap-siū. In m̄-sī khì-sak lí, sī khì-sak góa; in bô ài góa chòe in ê ông.

⁸ Tùi góa chhōa in chhut Ai-ki̍p kàu kin-á-ji̍t, in só͘ chòe--ê lóng sī lī-khui góa, khì ho̍k-sāi pa̍t-ê sîn-bêng, hiān-chāi in mā án-ni teh tùi-thāi lí.

⁹ Taⁿ in ê iau-kiû lí tio̍h chiap-siū, m̄-kú tio̍h giâm-giâm kā in kéng-kò, hō͘ in chai chiong-lâi in ê ông ōe án-chóaⁿ koán-hat in.”

¹⁰ Sat-bó-ní chiong Siōng Chú ê ōe lóng kā hiah-ê tùi i iau-kiû chi̍t ê ông ê jîn-bîn kóng,

¹¹ “Chiong-lâi lín ê ông ōe án-ni koán-hat lín: I ōe tiàu lín ê kiáⁿ khì choh-peng, ū-ê chòe chiàn-chhia-peng, ū-ê chòe bé-peng; in cháu chòe-chêng, chòe ông ê sian-hong.

¹² I ōe phài lâng chòe koaⁿ-tiúⁿ, ū-ê koán chi̍t-chheng, ū-ê koán gō͘-cha̍p; mā ōe phài lâng kā i choh-hn̂g, siu-sêng ngó͘-kok, chō kun-khì kap chiàn-chhia ê chong-pī.

¹³ I ōe tiàu lín ê cha-bó͘-kiáⁿ kā i chè-chō phang-iû, chú-chia̍h, hang-piáⁿ.

¹⁴ I ōe kā lín siōng-hó ê chhân-hn̂g, phû-tô-hn̂g, kaⁿ-ná-hn̂g the̍h-khì hō͘ i ê jîn-sîn.

¹⁵ Lín ê ngó͘-kok kap phû-tô, i ōe chhú cha̍p-hūn-chi̍t hō͘ i ê koaⁿ-oân kap jîn-sîn.

¹⁶ I ōe lia̍h lín ê lô͘-po̍k, lú-pī, ióng-chòng ê siàu-liân-lâng, kap lín ê lû-á, kā i chòe kang.

¹⁷ Lín ê iûⁿ-kûn, i beh chhú cha̍p-hūn-chi̍t; lín mā ōe chòe i ê lô͘-lē.

¹⁸ Hit-sî, lín ōe in-ūi só͘ kéng ê ông ai-kiò, m̄-kú Siōng Chú m̄ chhap lín.”

¹⁹ M̄-kú jîn-bîn m̄ thiaⁿ Sat-bó-ní ê ōe, hoán-tńg ìn kóng, “Lí kóng--ê, goán bô chàn-sêng! Goán it-tēng beh ū chi̍t ê ông tī-lí goán.

²⁰ Án-ni goán chiah ōe chhin-chhiūⁿ pa̍t-kok ū ka-kī ê ông kā goán tī-lí, chhōa goán khì kau-chiàn.”

²¹ Sat-bó-ní thiaⁿ-tio̍h jîn-bîn ê ōe liáu-āu, chiū kóng hō͘ Siōng Chú thiaⁿ.

²² Siōng Chú tùi Sat-bó-ní kóng, “Lí tio̍h thiaⁿ in ê iau-kiû, kā in siat-li̍p chi̍t ê ông.” Sat-bó-ní chiū kā Í-sek-lia̍t-lâng kóng, “Lín thang tò--khì.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan