Bìoball air-loidhne

撒母耳記上卷 7 - 現代台語譯本羅馬字版

¹ Ki-lia̍t Iâ-lîm-lâng chiū lâi, chiap Siōng Chú ê iok-kūi khì soaⁿ-téng A-pí-ná-ta̍t ê chhù; in jīm-bēng i ê kiáⁿ Í-lī-a-sat kò͘-siú Siōng Chú ê iok-kūi.

² Iok-kūi lâu tī Ki-lia̍t Iâ-lîm ū jī-cha̍p nî kú; Í-sek-lia̍t choân-ke thòng-hóe kui-ǹg Siōng Chú.

Sat-bó-ní Tī-lí Í-sek-lia̍t

³ Sat-bó-ní tùi Í-sek-lia̍t choân-ke kóng, “Lín nā beh choan-sim kui-sūn Siōng Chú, tio̍h tùi lín tiong-kan tû-khì gōa-cho̍k ê sîn-bêng kap A-su-tha-lio̍k lú-sîn, kian-koat kui-ǹg Siōng Chú, chí-ū ho̍k-sāi I, I ōe kiù lín thoat-lī Hui-lī-sū-lâng ê chhiú.”

⁴ Í-sek-lia̍t-lâng chiū tû-khì ta̍k só͘-chāi ê Pa-le̍k kap A-su-tha-lio̍k lú-sîn, chí-ū ho̍k-sāi Siōng Chú.

⁵ Sat-bó-ní kóng, “Tio̍h chū-chi̍p só͘-ū ê Í-sek-lia̍t-lâng lâi Bí-su-pa, góa beh ūi-tio̍h lín ǹg Siōng Chú kî-tó.”

⁶ In chiū chū-chi̍p tī Bí-su-pa, chhiūⁿ-chúi tò tī Siōng Chú ê bīn-chêng. Hit-ji̍t, in kìm-chia̍h, tī hia chhàm-hóe kóng, “Goán ū tek-chōe Siōng Chú.” Sat-bó-ní chiū tī Bí-su-pa chhâi-koat Í-sek-lia̍t bîn-kan ê àn-kiāⁿ.

⁷ Hui-lī-sū-lâng thiaⁿ-tio̍h Í-sek-lia̍t-lâng tī Bí-su-pa chū-chi̍p, in ê siú-léng chiū chhut-peng kong-kek Í-sek-lia̍t-lâng; Í-sek-lia̍t-lâng thiaⁿ--tio̍h chiū chin kiaⁿ.

⁸ Í-sek-lia̍t-lâng kā Sat-bó-ní kóng, “Chhiáⁿ lí kè-sio̍k ūi-tio̍h goán kiû-kiò Siōng Chú — lán ê Siōng-tè, kiû I kiù lán thoat-lī Hui-lī-sū-lâng ê chhiú.”

⁹ Sat-bó-ní chiū ēng chi̍t chiah chia̍h-lin ê iûⁿ-á chòe sio-hòa-chè hiàn hō͘ Siōng Chú; Sat-bó-ní thòe Í-sek-lia̍t-lâng kiû-kiò Siōng Chú; Siōng Chú ū thiaⁿ i ê kî-tó.

¹⁰ Sat-bó-ní teh hiàn sio-hòa-chè ê sî, Hui-lī-sū-lâng pek óa-lâi beh kong-kek Í-sek-lia̍t-lâng. Hit-ji̍t Siōng Chú tōa-siaⁿ tân-lûi kong-kek Hui-lī-sū-lâng, phah-loān in; in chiū thâi-su, tùi Í-sek-lia̍t-lâng ê bīn-chêng tô-cháu.

¹¹ Í-sek-lia̍t-lâng tùi Bí-su-pa chhut--lâi, tui-kóaⁿ Hui-lī-sū-lâng, tui-sat in ti̍t-kàu Pek Kah hù-kūn.

¹² Sat-bó-ní tī Bí-su-pa kap Siān ê tiong-kan chhāi chi̍t tè chio̍h, kā i hō-miâ kiò-chòe Í-piān Í-siā, kóng, “Kàu kin-á-ji̍t, Siōng Chú it-ti̍t ū teh pang-chān lán.”

¹³ Tùi hit-ji̍t khí, Hui-lī-sū-lâng chiū khut-ho̍k, m̄-káⁿ koh chhim-ji̍p Í-sek-lia̍t-lâng ê léng-thó͘. Sat-bó-ní oa̍h--teh ê sî, Siōng Chú ê chhiú chó͘-chí Hui-lī-sū-lâng ê chhim-hoān.

¹⁴ Tùi Í-kek-lûn kàu Ka-te̍k, Hui-lī-sū-lâng chhiúⁿ--khì ê siâⁿ lóng hêng Í-sek-lia̍t-lâng. Í-sek-lia̍t-lâng siu-hôe lóng-chóng ê léng-thó͘. Hit-sî, Í-sek-lia̍t-lâng kap Ka-lâm-lâng hô-pêng siong-chhù.

¹⁵ Sat-bó-ní it-seng chòe Í-sek-lia̍t ê sū-su.

¹⁶ Ta̍k-nî i sûn-sī Pek-te̍k-lī, Kiat-kah, Bí-su-pa chiah-ê só͘-chāi, chhâi-koat Í-sek-lia̍t bîn-kan ê àn-kiāⁿ.

¹⁷ I sûn-sī liáu-āu lóng ōe tò-khì i ê kò͘-hiong La-má, tī hia chòe sū-su. I mā tī hia ūi-tio̍h Siōng Chú khí chi̍t chō chè-tôaⁿ.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan