Bìoball air-loidhne

撒母耳記上卷 31 - 現代台語譯本羅馬字版

Sò-lô kap I ê Kiáⁿ Chiàn-sí
( 1 Tāi 10.1-12 )

¹ Hui-lī-sū-lâng kong-kek Í-sek-lia̍t-lâng; Í-sek-lia̍t-lâng chiàn-pāi tô-cháu, tī Ki-lī-pho-soaⁿ sí chin chōe lâng.

² Hui-lī-sū-lâng tui-jip Sò-lô kap i hiah-ê kiáⁿ, thâi-sí Sò-lô saⁿ ê kiáⁿ Iok-ná-tan, A-pí-ná-ta̍t, kap Be̍k-ki Su-a.

³ Sò-lô siū-tio̍h béng-lia̍t ê kong-kek; i hō͘ siā-chìⁿ ê lâng hoat-kiàn, siā--tio̍h, siū-siong chin siong-tiōng.

⁴ Sò-lô kā thòe i gia̍h kun-khì ê sī-ōe kóng, “Pu̍ih to kā góa chha̍k--sí, chiah bián góa hō͘ chiah-ê bô siū kat-lé ê lâng thâi-sí, kā góa lêng-jio̍k.” Hit-ê sī-ōe m̄-káⁿ, in-ūi i chin kiaⁿ. Sò-lô chiū ǹg to phak--lo̍h-khì, ka-kī chha̍k--sí.

⁵ Hit-ê sī-ōe khòaⁿ-tio̍h Sò-lô í-keng sí, mā phak--lo̍h-khì, ka-kī chha̍k, kap Sò-lô chòe-hé sí.

⁶ Sò-lô kap i saⁿ ê kiáⁿ, gia̍h kun-khì--ê, kap só͘-ū kun-tè Sò-lô ê lâng kâng chi̍t ji̍t sí.

⁷ Tī Iâ-su-lia̍t Soaⁿ-kok hit-pêng kap tī Iok-tàn-hô tang-pêng ê Í-sek-lia̍t-lâng, khòaⁿ-tio̍h in ê kun-tūi í-keng tô-cháu, Sò-lô kap i ê kiáⁿ mā lóng chiàn-sí, chiū pàng siâⁿ tô-cháu. Hui-lī-sū-lâng chiū lâi chiàm hiah-ê siâⁿ, tī hia khiā-khí.

⁸ Keh-ji̍t, Hui-lī-sū-lâng lâi pak chiàn-sí ê lâng ê mi̍h-kiāⁿ, khòaⁿ-tio̍h Sò-lô kap i saⁿ ê kiáⁿ sí tī Ki-lī-pho-soaⁿ,

⁹ chiū chām i ê thâu, thǹg i ê chiàn-kah, phài lâng khì Hui-lī-sū ta̍k só͘-chāi, chiong chit-ê siau-sit pò hō͘ in biō--ni̍h ê ngó͘-siōng kap jîn-bîn chai.

¹⁰ In chiong Sò-lô ê chiàn-kah hē tī A-su-tha-lio̍k ê biō-lāi, chiong i ê sin-si tèng tī Pek Siān ê siâⁿ-chhiûⁿ téng.

¹¹ Ki-lia̍t ê Ngá-pí ê chū-bîn thiaⁿ-tio̍h Hui-lī-sū-lâng tùi Sò-lô só͘ chòe ê tāi-chì,

¹² in ê ióng-sū lóng khí--lâi, kui-mî hêng-kun, khì chiong Sò-lô kap i ê kiáⁿ ê sin-si tùi Pek Siān ê siâⁿ-chhiûⁿ chhú--lo̍h-lâi, tòa kàu Ngá-pí, tī hia hé-hòa,

¹³ chiong in ê kut-hâi chòng tī Ngá-pí ê liú-chhiū kha, kìm-chia̍h chhit ji̍t.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan