Bìoball air-loidhne

撒母耳記上卷 30 - 現代台語譯本羅馬字版

Kap A-má-le̍k-lâng Kau-chiàn

¹ Tē-saⁿ ji̍t, Tāi-pi̍t kap i ê pō͘-hā tò-khì Sé-kek-la. In kàu í-chêng, A-má-le̍k-lâng í-keng ū chhim-hoān Iû-tāi lâm-hng kap Sé-kek-la. A-má-le̍k-lâng pàng-hé sio Sé-kek-la,

² lia̍h hū-lú kap siâⁿ-lāi ê lâng, bô-lūn tōa-sòe, chi̍t ê to bô thâi-sí, lóng kā in lia̍h--khì.

³ Tāi-pi̍t kap i ê pō͘-hā kàu hit-ê siâⁿ, khòaⁿ-tio̍h siâⁿ í-keng sio--khì, in ê bó͘, kiáⁿ, cha-bó͘-kiáⁿ, lóng hō͘ lâng lia̍h--khì.

⁴ Tāi-pi̍t kap tè i ê lâng chiū khui-siaⁿ háu, háu kah bô-la̍t thang koh háu.

⁵ Tāi-pi̍t nn̄g ê bó͘, chiū-sī Iâ-su-lia̍t-lâng A-hi-loán kap Ná-pà ê ûi-song Ka-bi̍t-lâng Ài-pí-kai, mā hō͘ A-má-le̍k-lâng lia̍h--khì.

⁶ Tāi-pi̍t hui-siông tio̍h-kip, in-ūi i ê pō͘-hā ūi-tio̍h in ê kiáⁿ, cha-bó͘-kiáⁿ khó͘-thàng chhoeh-sim, kóng beh ēng chio̍h-thâu kā i tìm-sí. M̄-kú Tāi-pi̍t óa-khò Siōng Chú — i ê Siōng-tè tit-tio̍h khùi-la̍t.

⁷ Tāi-pi̍t kā A-hi-bí-le̍k ê kiáⁿ chè-si A-pí-a-tha kóng, “Chhiáⁿ lí tòa í-hut-tek lâi.” A-pí-a-tha chiū tòa í-hut-tek lâi hō͘ Tāi-pi̍t.

⁸ Tāi-pi̍t mn̄g Siōng Chú kóng, “Góa tui-jip hiah-ê húi-tô͘, kiám jip ōe tio̍h?” Siōng Chú ìn kóng, “Khì jip, it-tēng ōe jip--tio̍h, mā it-tēng ōe-tàng kiù in tò--lâi.”

^9-10 Tāi-pi̍t chiū chhōa i ê pō͘-hā la̍k-pah lâng chhut-hoat, lâi kàu Pí-so-khoe. Ū nn̄g-pah ê ià-siān, kiâⁿ bōe kè Pí-so-khoe, chiū lâu tī hia. Tāi-pi̍t kap sì-pah ê pō͘-hā kè-sio̍k khì tui-jip.

¹¹ In tī iá-gōa tú-tio̍h chi̍t ê Ai-ki̍p-lâng, chiū tòa i khì Tāi-pi̍t hia; ēng piáⁿ hō͘ i chia̍h, ēng chúi hō͘ i lim;

¹² koh hō͘ i chi̍t lia̍p bû-hoa-kó-koaⁿ-oân, nn̄g lia̍p phû-tô-koaⁿ-oân; i chia̍h-liáu, goân-khì hôe-ho̍k; in-ūi i saⁿ mî saⁿ ji̍t bô chia̍h bô lim.

¹³ Tāi-pi̍t mn̄g i kóng, “Lí ê chú-lâng sī siáⁿ-lâng? Lí tùi tó-ūi lâi?” I ìn kóng, “Góa sī Ai-ki̍p gín-á, sī A-má-le̍k-lâng ê lô͘-lē. Góa saⁿ ji̍t chêng phòa-pīⁿ, chiū hō͘ chú-lâng pàng-sak.

¹⁴ Goán chhim-hoān Iû-tāi lâm-pō͘ ê Ki-lī-thê kap Ka-le̍k tōe-khu, koh ēng hé sio Sé-kek-la.”

¹⁵ Tāi-pi̍t mn̄g i kóng, “Lí kiám khéng chhōa góa khì hiah-ê húi-tô͘ hia?” I ìn kóng, “Lí tio̍h kí Siōng-tè tùi góa chiù-chōa, pó-chèng bōe kā góa thâi-sí, mā bōe chiong góa kau hō͘ góa ê chú-lâng, góa chiū chhōa lí khì.”

¹⁶ I chhōa Tāi-pi̍t lo̍h--khì ê sî, khòaⁿ-tio̍h in hun-sòaⁿ chi̍t-sì-kòe teh lim-chia̍h thiàu-bú; in-ūi in tùi Hui-lī-sū-tōe kap Iû-tāi-tōe chhiúⁿ ê mi̍h chin chōe.

¹⁷ Tāi-pi̍t tùi thiⁿ-bē-kng kong-kek in kàu hông-hun-àm; chí-ū sì-pah ê khiâ lo̍k-tô ê siàu-liân-lâng cháu ū khì, í-gōa bô chi̍t ê cháu ū lī.

¹⁸ A-má-le̍k-lâng kiap--khì ê châi-bu̍t, Tāi-pi̍t lóng ū chhiúⁿ--tńg-lâi, mā ū kā i nn̄g ê bó͘ kiù--tò-lâi.

¹⁹ A-má-le̍k-lâng chhiúⁿ--khì-ê, bô-lūn tōa-sòe, kiáⁿ, cha-bó͘-kiáⁿ, châi-bu̍t, Tāi-pi̍t lóng tòa--tńg-lâi, bô sit-lo̍h chi̍t hāng.

²⁰ Tāi-pi̍t ê pō͘-hā chiong só͘-ū chhiúⁿ--lâi ê gû-kûn iûⁿ-kûn, kóaⁿ tī kî-tha cheng-siⁿ ê thâu-chêng, tián kóng, “Chiah-ê sī Tāi-pi̍t ê chiàn-lī-phín.”

²¹ Tāi-pi̍t tńg-lâi kàu hiah-ê in-ūi ià-siān bô tè i khì, lâu tī Pí-so-khoe ê nn̄g-pah lâng hia. In chhut-lâi gêng-chiap Tāi-pi̍t kap ū tè i khì ê kun-peng ê sî, Tāi-pi̍t kiâⁿ chìn-chêng kā in chhéng-an.

²² Kap Tāi-pi̍t khì ê lâng tiong-kan ū chi̍t-kóa pháiⁿ-lâng húi-lūi án-ni kóng, “In bô kap lán khì, chiah-ê chiàn-lī-phín mài pun hō͘ in, kan-ta in ê bó͘, kiáⁿ-jî, hō͘ in chhōa--tńg-khì.”

²³ Tāi-pi̍t kóng, “Hiaⁿ-tī ah, Siōng Chú siúⁿ-sù hō͘ lán ê mi̍h, m̄-thang án-ni chhú-lí, in-ūi I ū pó-hō͘ lán, chiong kong-kek lán ê tùi-te̍k kau tī lán ê chhiú.

²⁴ Lín chit-khoán chòe-hoat siáⁿ-lâng ōe tông-ì? Chhut-tīn ê lâng pun-tio̍h jōa-chōe, kò͘ pó͘-kip-phín ê lâng mā tio̍h pun hiah chōe; tāi-ke tio̍h kong-ke pun.”

²⁵ Tùi hit-ji̍t khí, Tāi-pi̍t siat-li̍p chit-ê pān-hoat chòe Í-sek-lia̍t ê kui-lē kap bēng-lēng, ti̍t-kàu kin-á-ji̍t.

²⁶ Tāi-pi̍t kàu Sé-kek-la ê sî, the̍h chi̍t-pō͘-hūn ê chiàn-lī-phín sàng hō͘ i ê pêng-iú, Iû-tāi ê tiúⁿ-ló. I kóng, “Chiah-ê sī tùi Siōng Chú ê tùi-te̍k chhiúⁿ--lâi-ê, sàng hō͘ lín chòe lé-mi̍h.”

²⁷ I chiong lé-mi̍h sàng hō͘ tiàm tī Pek-te̍k-lī, Iû-tāi lâm-hng ê La-boa̍t, Ngá-thê-ní,

²⁸ A-lô-ní, Sek-boa̍t, Í-si̍t-thê-bo̍k,

²⁹ La-hap-le̍k, Iâ-la-bia̍t-lâng kap Ki-nî-lâng hiah-ê siâⁿ,

³⁰ Hô-ní-má, Pho-la-san, A-that,

³¹ Hi-pek-lûn, í-ki̍p Tāi-pi̍t kap i ê pō͘-hā pêng-siông ū teh óng-lâi ê só͘-chāi ê tiúⁿ-ló.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan