Bìoball air-loidhne

撒母耳記上卷 29 - 現代台語譯本羅馬字版

Hui-lī-sū-lâng Bô Sìn-jīm Tāi-pi̍t

¹ Hui-lī-sū-lâng tiàu-chi̍p in só͘-ū ê kun-tūi kàu A-hut. Í-sek-lia̍t-lâng tī Iâ-su-lia̍t ê chúi-chôaⁿ piⁿ chat-iâⁿ.

² Hui-lī-sū-lâng ê siú-léng tòa-peng chhut-tīn, ū-ê tòa pah-lâng, ū-ê tòa chheng-lâng. Tāi-pi̍t kap i ê pō͘-hā, í-ki̍p A-kiat-ông kiâⁿ tī āu-bīn.

³ Hui-lī-sū-lâng ê chiòng-léng kóng, “Chiah-ê Hi-pek-lâi-lâng tī chia chhòng siáⁿ?” A-kiat-ông kā Hui-lī-sū-lâng ê chiòng-léng kóng, “Chit-ê lâng sī Í-sek-lia̍t-ông Sò-lô ê chiòng-léng Tāi-pi̍t. I í-keng kap góa tòa nî-gōa; tùi i lâi tâu-hâng kàu kin-á-ji̍t, góa m̄-bat khòaⁿ-tio̍h i ū hoān sím-mi̍h kè-sit.”

⁴ Hui-lī-sū-lâng ê chiòng-léng tùi A-kiat siū-khì, kā i kóng, “Hō͘ chit-ê lâng tò-khì lí kā i an-tì ê só͘-chāi, m̄-thang hō͘ i kap lán chhut-khì kau-chiàn, chiah bián i tī kau-chiàn ê sî pìⁿ-chòe lán ê tùi-te̍k. I beh ēng sím-mi̍h hôe-ho̍k i ê chú-lâng tùi i ê sìn-jīm? Kiám m̄-sī lán chiah-ê lâng ê thâu-khak?

⁵ Í-chêng Í-sek-lia̍t-lâng thiàu-bú ê sî, ū lâng chhiùⁿ, ū lâng ìn, kóng: Sò-lô thâi-sí chheng-chheng, Tāi-pi̍t thâi-sí bān-bān; in só͘ kóng--ê kiám m̄-sī chit-ê Tāi-pi̍t?”

⁶ A-kiat kiò Tāi-pi̍t lâi, kā i kóng, “Góa kí éng-oa̍h ê Siōng Chú chiù-chōa, lí sī sêng-si̍t ê lâng; lí tī góa ê kun-tūi ho̍k-ia̍h, góa chin boán-ì, in-ūi tùi lí lâi chia kàu kin-á-ji̍t, góa m̄-bat khòaⁿ-tio̍h lí ū sím-mi̍h sit-chhò. M̄-kú kî-tha ê siú-léng bô kah-ì lí.

⁷ Taⁿ lí pêng-an tńg--khì, chiah bián chiah-ê siú-léng bô hoaⁿ-hí lí ê só͘-chòe.”

⁸ Tāi-pi̍t tùi A-kiat kóng, “Góa ū chòe sím-mi̍h tāi-chì? Tùi góa lâi lí chia kàu kin-á-ji̍t, lí tī lí lô͘-po̍k ê sin-chiūⁿ ū khòaⁿ-tio̍h sím-mi̍h tāi-chì, hō͘ lí ê lô͘-po̍k bōe-tàng kap ông — góa ê chú ê tùi-te̍k kau-chiàn?”

⁹ A-kiat ìn kóng, “Góa chai, góa khòaⁿ lí chhin-chhiūⁿ Siōng-tè ê sù-chiá hiah-ni̍h hó, m̄-kú Hui-lī-sū-lâng ê chiòng-léng bô ài lí kap goán tàu-tīn khì kau-chiàn.

¹⁰ Só͘-í, bîn-á-chài thiⁿ chi̍t-ē kng, lí tio̍h chhōa só͘-ū lī-khui Sò-lô, tè lí lâi góa chia ê lâng lī-khui.”

¹¹ Keh-chá-khí, Tāi-pi̍t kap tè i ê lâng thàu-chá chiū chhut-hoat, tò-khì Hui-lī-sū-lâng ê tōe; siâng-sî, Hui-lī-sū-lâng ǹg Iâ-su-lia̍t chìn-kun.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan