Bìoball air-loidhne

撒母耳記上卷 24 - 現代台語譯本羅馬字版

Tāi-pi̍t Bô Thâi Sò-lô

¹ Sò-lô tui-jip Hui-lī-sū-lâng tò--lâi ê sî, ū lâng kā i kóng, “Tāi-pi̍t tiàm tī Ún Ki-tí ê khòng-iá.”

² Sò-lô chiū tùi Í-sek-lia̍t tiong chhōa te̍k-soán ê peng saⁿ-chheng, khì Iá-soaⁿ-iûⁿ Soaⁿ-giâm hia chhē Tāi-pi̍t kap kun-tè i ê lâng.

³ Sò-lô lâi kàu lō͘-piⁿ iûⁿ-tiâu hù-kūn ê soaⁿ-tōng, ji̍p-khì beh tāi-piān. Tāi-pi̍t kap kun-tè i ê lâng bih tī tōng-lāi khah chhim ê só͘-chāi.

⁴ Kun-tè Tāi-pi̍t ê lâng tùi i kóng, “Siōng Chú bat kā lí kóng, ‘Góa beh chiong lí ê tùi-te̍k kau tī lí ê chhiú, lí thang chiàu ka-kī ê ì-sù tùi-thāi i.’ Taⁿ ki-hōe lâi lah.” Tāi-pi̍t chiū tiām-tiām-á pê-khì koah Sò-lô gōa-saⁿ ê saⁿ-á-ku.

⁵ Āu-lâi, Tāi-pi̍t in-ūi koah Sò-lô ê saⁿ-á-ku sim-lāi put-an,

⁶ tùi kun-tè i ê lâng kóng, “I sī Siōng Chú só͘ boah-iû ê ông; góa choa̍t-tùi m̄-káⁿ tùi góa ê chú-lâng, chiū-sī Siōng Chú só͘ boah-iû--ê, chòe chit-khoán tāi-chì siong-hāi i.”

⁷ Tāi-pi̍t ēng chiah-ê ōe chó͘-tòng kun-tè i ê lâng, put-chún in kong-kek Sò-lô. Sò-lô peh--khí-lâi, tùi tōng-lāi chhut--khì, kè-sio̍k kiâⁿ i ê lō͘.

⁸ Tāi-pi̍t mā tùi tōng-lāi chhut--khì, tè tī Sò-lô ê āu-bīn, hoah kóng, “Góa ê chú, góa ê ông!” Sò-lô oa̍t-thâu khòaⁿ; Tāi-pi̍t chiū phak tī thô͘-kha pài i.

⁹ Tāi-pi̍t tùi Sò-lô kóng, “Ông ah, lí sī-án-chóaⁿ thiaⁿ lâng ê ōe, kóng ‘Tāi-pi̍t siūⁿ-beh hāi lí’?

¹⁰ Kin-á-ji̍t lí ū chhin-ba̍k khòaⁿ--tio̍h, lí tī tōng-lāi ê sî, Siōng Chú chiong lí kau tī góa ê chhiú. Ū lâng kiò góa thâi lí, m̄-kú góa put-jím-sim; góa kóng, ‘Góa bô beh chhut-chhiú hāi góa ê chú, in-ūi i sī Siōng Chú só͘ boah-iû--ê.’

¹¹ Góa ê pē ah, lí khòaⁿ leh, lí gōa-saⁿ ê saⁿ-á-ku tī góa ê chhiú--ni̍h; góa chí-ū koah lí ê saⁿ-á-ku, bô kā lí thâi. Án-ni, lí ōe-tàng khòaⁿ-chhut góa ê chhiú bô chòe sím-mi̍h pōe-ge̍k lí ê pháiⁿ tāi-chì. Góa m̄-bat tek-chōe lí, m̄-kú lí tui-jip góa, beh ti̍h góa ê sìⁿ-miā.

¹² Goān Siōng Chú tī lí góa ê tiong-kan chhâi-koat. Goān Siōng Chú in-ūi lí ê só͘-chòe thòe góa pò-ho̍k; góa bōe chhut-chhiú hāi lí.

¹³ Kó͘-chá-lâng án-ni kóng, ‘Pháiⁿ-tāi tùi pháiⁿ-lâng chhut.’ Góa bōe chhut-chhiú hāi lí.

¹⁴ Í-sek-lia̍t-ông chhut-lâi beh lia̍h siáⁿ-lâng, beh tui-jip siáⁿ-lâng? Beh chhē sí-káu, lia̍h ka-cháu o͘h?

¹⁵ Goān Siōng Chú chòe phòaⁿ-koaⁿ, tī lí góa ê tiong-kan chhâi-koat. Goān I kàm-chhat, ūi-tio̍h góa ê àn-kiāⁿ piān-hō͘, kiù góa thoat-lī lí ê chhiú.”

¹⁶ Tāi-pi̍t tùi Sò-lô kóng chiah-ê ōe liáu-āu, Sò-lô kóng, “Góa ê kiáⁿ Tāi-pi̍t, che sī lí ê siaⁿ o͘h?” Sò-lô chiū tōa-siaⁿ thî-khàu.

¹⁷ I kā Tāi-pi̍t kóng, “Lí pí góa khah chiàⁿ, in-ūi lí tùi góa chin hó, góa soah tian-tò ēng pháiⁿ pò lí.

¹⁸ Kin-á-ji̍t lí ê só͘-chòe piáu-bêng lí ēng hó tùi-thāi góa, in-ūi Siōng Chú ū chiong góa kau tī lí ê chhiú, m̄-kú lí bô kā góa thâi-sí.

¹⁹ Lâng nā chhē-tio̍h i ê tùi-te̍k, kiám ōe pàng i cháu? Goān Siōng Chú in-ūi kin-á-ji̍t lí tùi góa ê só͘-chòe ēng hó pò lí.

²⁰ Taⁿ góa chai lí it-tēng ōe choh-ông, Í-sek-lia̍t-kok it-tēng ōe tī lí ê thóng-tī-ē kian-li̍p.

²¹ Só͘-í lí tio̍h kí Siōng Chú tùi góa chiù-chōa, lí bōe châu-bia̍t góa ê hō͘-tāi, bōe chiong góa ê miâ tùi goán ê ka-cho̍k chhat-siau.”

²² Tāi-pi̍t chiū tùi Sò-lô chiù-chōa. Jiân-āu, Sò-lô tò-khì i tòa ê só͘-chāi; Tāi-pi̍t kap kun-tè i ê lâng chiūⁿ-khì soaⁿ-khu ê iàu-sài.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan