Bìoball air-loidhne

撒母耳記上卷 23 - 現代台語譯本羅馬字版

Tāi-pi̍t Kiù Ki-i-la-siâⁿ

¹ Ū lâng kā Tāi-pi̍t kóng, “Hui-lī-sū-lâng teh kong-kek Ki-i-la-siâⁿ, chhiúⁿ ngó͘-kok-tiûⁿ.”

² Tāi-pi̍t mn̄g Siōng Chú, “Góa lâi-khì kong-kek hiah-ê Hui-lī-sū-lâng hó--bô?” Siōng Chú kā Tāi-pi̍t kóng, “Lí khì phah Hui-lī-sū-lâng, kái-kiù Ki-i-la.”

³ Kun-tè Tāi-pi̍t ê lâng kā i kóng, “Lán tī Iû-tāi-tōe to chin kiaⁿ Hui-lī-sū-lâng, hô-hòng khì Ki-i-la phah in ê kun-tūi?”

⁴ Tāi-pi̍t koh mn̄g Siōng Chú; Siōng Chú ìn kóng, “Lí khì, lo̍h-khì Ki-i-la, in-ūi góa beh chiong Hui-lī-sū-lâng kau tī lí ê chhiú.”

⁵ Tāi-pi̍t kap kun-tè i ê lâng khì Ki-i-la, kap Hui-lī-sū-lâng kau-chiàn; chhiúⁿ in ê cheng-siⁿ, thâi-sí in chin chōe lâng. Án-ni, Tāi-pi̍t ū kái-kiù Ki-i-la ê chū-bîn.

⁶ A-hi-bí-le̍k ê kiáⁿ A-pí-a-tha tô-cháu khì Ki-i-la kìⁿ Tāi-pi̍t ê sî, chhiú--ni̍h ū tòa í-hut-tek khì.

⁷ Ū lâng kā Sò-lô kóng, “Tāi-pi̍t lâi kàu Ki-i-la.” Sò-lô kóng, “Siōng-tè í-keng chiong i kau tī góa ê chhiú, in-ūi i ji̍p-khì ū mn̂g ū chhòaⁿ ê siâⁿ, ka-kī koaiⁿ tī hit lāi-bīn.”

⁸ Sò-lô chiū tiàu-chi̍p só͘-ū ê kun-peng beh khì kong-táⁿ Ki-i-la, pau-ûi Tāi-pi̍t kap kun-tè i ê lâng.

⁹ Tāi-pi̍t chai Sò-lô siat kè-bô͘ beh hāi i, chiū kā chè-si A-pí-a-tha kóng, “Lí tòa í-hut-tek lâi.”

¹⁰ Tāi-pi̍t kóng, “Siōng Chú — Í-sek-lia̍t ê Siōng-tè ah, lí ê po̍k-jîn ū thiaⁿ-tio̍h Sò-lô beh lâi Ki-i-la, ūi-tio̍h góa ê iân-kò͘ châu-bia̍t chit-ê siâⁿ.

¹¹ Ki-i-la-lâng ōe chiong góa kau tī i ê chhiú bōe? Sò-lô ōe chiàu lí ê po̍k-jîn só͘ thiaⁿ--tio̍h-ê lo̍h--lâi á bōe? Siōng Chú — Í-sek-lia̍t ê Siōng-tè ah, kiû lí chí-sī lí ê po̍k-jîn.” Siōng Chú kóng, “Sò-lô ōe lo̍h--lâi.”

¹² Tāi-pi̍t koh kóng, “Ki-i-la-lâng ōe chiong góa kap tè góa ê lâng kau tī Sò-lô ê chhiú á bōe?” Siōng Chú kóng, “In ōe chiong lí kau hō͘ i.”

¹³ Tāi-pi̍t kap kun-tè i ê lâng iok ū la̍k-pah, sûi-sî lī-khui Ki-i-la, sì-kòe phiau-liû. Ū lâng kā Sò-lô kóng, “Tāi-pi̍t í-keng tùi Ki-i-la tô-cháu.” Sò-lô chiū bô chhut-peng.

Tāi-pi̍t tī Khòng-iá Siám-pī Sò-lô

¹⁴ Tāi-pi̍t bih tī Se-hut khòng-iá soaⁿ-khu ê iàu-sài. Sò-lô ta̍k-ji̍t tui-chhē Tāi-pi̍t, m̄-kú Siōng-tè bô chiong Tāi-pi̍t kau tī i ê chhiú.

¹⁵ Tāi-pi̍t chai Sò-lô í-keng chhut-lâi beh thâi i, hit-sî Tāi-pi̍t tiàm tī Se-hut khòng-iá ê Ha-lia̍t.

¹⁶ Sò-lô ê kiáⁿ Iok-ná-tan chhut-hoat khì Ha-lia̍t kìⁿ Tāi-pi̍t, kó͘-lē i tio̍h sìn-khò Siōng-tè ê pó-hō͘,

¹⁷ kā i kóng, “M̄-bián kiaⁿ, goán lāu-pē Sò-lô ê chhiú bô hoat-tō͘ siong-hāi lí. Lí ōe chòe Í-sek-lia̍t-ông, góa kam-goān chē tē-jī ūi. Chit-ê sū góa ê lāu-pē Sò-lô í-keng chai.”

¹⁸ In nn̄g lâng chiū tī Siōng Chú ê bīn-chêng li̍p-iok kiat-bêng. Tāi-pi̍t lâu tī Ha-lia̍t, Iok-ná-tan tò-khì i ê chhù.

¹⁹ Ū chi̍t-kóa Se-hut-lâng chiūⁿ-khì Ki-pí-a kìⁿ Sò-lô, kóng, “Tāi-pi̍t kiám m̄-sī bih tī goán kéng-lāi, Iok-su-bûn lâm-pêng Hap-ki-la-soaⁿ, Ha-lia̍t ê iàu-sài?

²⁰ Ông ah, lí nā siūⁿ-beh lo̍h--khì, chhiáⁿ chit-chūn lâi-khì; goán ōe lia̍h i lâi kau tī ông ê chhiú.”

²¹ Sò-lô kóng, “Goān Siōng Chú sù-hok lín, in-ūi lín tùi góa chin hó.

²² Lín tò--khì, siông-sè tiâu-cha, khak-si̍t chai i tiàm tī tó-ūi, sím-mi̍h-lâng ū khòaⁿ-tio̍h i, in-ūi ū lâng kā góa kóng, i chin khúi-khiat.

²³ Lín khì, chhâ-chhut i khak-si̍t bih ê só͘-chāi; nā chai-iáⁿ, tio̍h lâi kā góa pò-kò, góa chiū beh kap lín khì. I nā tī Iû-tāi kéng-lāi, góa beh tùi só͘-ū ê chong-cho̍k tiong kā i chhiau--chhut-lâi.”

²⁴ Hiah-ê lâng chiū chhut-hoat, pí Sò-lô khah tāi-seng khì Se-hut. Tāi-pi̍t kap kun-tè i ê lâng bih tī Má-hûn ê khòng-iá, Iok-su-bûn lâm-pêng ê A-la-pa.

²⁵ Sò-lô chhōa i ê pō͘-hā khì tui-chhē Tāi-pi̍t; ū lâng kā Tāi-pi̍t kóng, i chiū lo̍h-khì Má-hûn khòng-iá ê soaⁿ-giâm hia. Sò-lô thiaⁿ--tio̍h, chiū tī Má-hûn ê khòng-iá tui-jip Tāi-pi̍t.

²⁶ Sò-lô kap i ê pō͘-hā tī soaⁿ ê chit-pêng, Tāi-pi̍t kap kun-tè i ê lâng tī soaⁿ ê hit-pêng. Sò-lô kap i ê pō͘-hā pek-óa Tāi-pi̍t, teh-beh lia̍h--tio̍h. Tāi-pi̍t kóaⁿ-kín cháu, siám-pī Sò-lô.

²⁷ Hit-sî, ū sù-chiá lâi pò Sò-lô kóng, “Lí tio̍h kóaⁿ-kín tò--lâi, in-ūi Hui-lī-sū-lâng chhim-hoān lán ê kok-kéng.”

²⁸ Sò-lô chiū tò-khì tùi-khòng Hui-lī-sū-lâng, bô koh tui-jip Tāi-pi̍t; in-ūi án-ni, hit-ê só͘-chāi kiò-chòe Se-la Hap-má-hi-lô-kiat, ì-sù sī keh-lī ê soaⁿ-giâm.

²⁹ Tāi-pi̍t lī-khui hia, chiū khì tiàm tī Ún Ki-tí ê iàu-sài.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan