Bìoball air-loidhne

撒母耳記上卷 20 - 現代台語譯本羅馬字版

Iok-ná-tan Pang-chān Tāi-pi̍t

¹ Tāi-pi̍t tùi La-má ê Ná-iok tô-cháu, khì kìⁿ Iok-ná-tan, kóng, “Góa ū chòe sím-mi̍h? Ū sím-mi̍h m̄-tio̍h? Ū tùi lín lāu-pē hoān-tio̍h sím-mi̍h chōe, i kèng-jiân beh tui-sat góa?”

² Iok-ná-tan kā i kóng, “Bô chit-khoán tāi-chì! Lí choa̍t-tùi bōe sí. Góa ê lāu-pē chòe tāi-chì, bô-lūn tōa-sòe, lóng ōe hō͘ góa chai. Chit-hāng tāi-chì i ná tio̍h kā góa am-khàm? Choa̍t-tùi bōe!”

³ Tāi-pi̍t koh chiù-chōa kóng, “Lí ê lāu-pē bêng-bêng chai lí chin ì-ài góa, só͘-í sim-lāi siūⁿ, ‘M̄-thang hō͘ Iok-ná-tan chai, kiaⁿ-liáu i siong-sim.’ Góa kí éng-oa̍h ê Siōng Chú kap lí ê sìⁿ-miā chiù-chōa, sí í-keng pek kàu gán-chêng lah.”

⁴ Iok-ná-tan kā Tāi-pi̍t kóng, “Lí ài góa chòe sím-mi̍h, góa it-tēng ōe chòe.”

⁵ Tāi-pi̍t kā Iok-ná-tan kóng, “Bîn-á-chài sī chhoe-it, góa eng-kai tio̍h kap ông chia̍h-pn̄g. Nā ōe-ēng--tit, chhiáⁿ iông-ún góa khì bih tī iá-gōa, kàu tē-saⁿ ji̍t àm-sî.

⁶ Lí ê lāu-pē nā hoat-kiàn góa bô tī hia, lí tio̍h kóng, ‘Tāi-pi̍t ū tit-tio̍h góa ê ún-chún, tńg-khì kò͘-hiong Pek-lī-hêng, in choân-ke tī hia teh hiàn nî-chè.’

⁷ I nā kóng ‘Hó’, lí ê po̍k-jîn chiū pêng-an bô-sū; i nā siū-khì, lí chiū chai i koat-tēng beh hāi góa.

⁸ Taⁿ lí tio̍h sêng-sim tùi-thāi lí ê po̍k-jîn; chhiáⁿ lí siú lí kap góa tī Siōng Chú bīn-chêng só͘ li̍p ê iok. Góa nā ū chōe, lí tio̍h chhin-sin thâi góa; ná tio̍h tán lí ê lāu-pē hē-chhiú?”

⁹ Iok-ná-tan kóng, “Góa it-tēng bōe án-ni chòe. Góa nā khak-si̍t chai góa ê lāu-pē koat-tēng beh hāi lí, góa kiám bōe kā lí kóng?”

¹⁰ Tāi-pi̍t kā Iok-ná-tan kóng, “Lí ê lāu-pē nā pháiⁿ siaⁿ-sàu ìn lí, sím-mi̍h-lâng beh pò góa chai?”

¹¹ Iok-ná-tan kā Tāi-pi̍t kóng, “Lâi, lán lâi-khì iá-gōa.” In chiū chòe-hé khì.

¹² Iok-ná-tan kā Tāi-pi̍t kóng, “Goān Siōng Chú — Í-sek-lia̍t ê Siōng-tè choh-chèng: Bîn-á-chài á-sī āu--ji̍t chit-ê sî, góa ōe thàm goán lāu-pē ê ì-sù; i tùi lí ê hoán-èng nā hó, góa it-tēng ōe phài lâng pò lí chai.

¹³ Góa ê lāu-pē nā chûn-sim beh hāi lí, góa it-tēng ōe kā lí kóng, hō͘ lí pêng-an lī-khui; nā bô, goān Siōng Chú ka-pē chek-hoa̍t góa. Goān Siōng Chú kap lí tông-chāi, chhin-chhiūⁿ í-chêng kap góa ê lāu-pē tông-chāi kâng-khoán.

¹⁴ Góa nā iáu oa̍h--teh, lí it-tēng tio̍h chiàu Siōng Chú ê chû-ài tùi-thāi góa. Góa nā sí,

¹⁵ koh Siōng Chú châu-bia̍t lí ê tùi-te̍k ê sî, lí mā tio̍h kâng-khoán éng-oán chiàu Siōng Chú ê chû-ài tùi-thāi góa ê ka-cho̍k.”

¹⁶ Iok-ná-tan chiū kap Tāi-pi̍t ê ke li̍p-iok, koh kóng, “Goān Siōng Chú ēng Tāi-pi̍t tùi-te̍k ê chhiú hêng-hoa̍t pōe-iok ê lâng.”

¹⁷ Iok-ná-tan in-ūi ài Tāi-pi̍t, chiū iau-kiû Tāi-pi̍t koh chiù-chōa; in-ūi i thiàⁿ Tāi-pi̍t chhin-chhiūⁿ thiàⁿ ka-kī ê sìⁿ-miā.

¹⁸ Iok-ná-tan kā i kóng, “Bîn-á-chài sī chhoe-it, chia̍h-pn̄g ê sî, lí bô chāi-tiûⁿ, lâng it-tēng ōe chù-ì--tio̍h.

¹⁹ Só͘-í, āu--ji̍t lí tio̍h kóaⁿ-kín lo̍h-khì chêng tú-tio̍h tāi-chì bih ê só͘-chāi, tī Í-sek ê chio̍h-pôaⁿ hia thèng-hāu;

²⁰ góa ōe ēng chio̍h-pôaⁿ chòe bo̍k-phiau siā saⁿ ki chìⁿ.

²¹ Góa ōe chhe chi̍t ê siàu-liân-lâng khì chhē chìⁿ. Góa nā kā hit-ê siàu-liân-lâng kóng ‘Chìⁿ tī lí ê āu-bīn, tio̍h khì khioh’, lí chiū thang tò--lâi. Góa kí éng-oa̍h ê Siōng Chú chiù-chōa, lí pêng-an bô-sū.

²² Góa nā kā siàu-liân-lâng kóng ‘Chìⁿ tī lí ê thâu-chêng’, lí tio̍h kóaⁿ-kín cháu; in-ūi sī Siōng Chú ài lí lī-khui.

²³ Lán nn̄g ê ê iok-tēng, ū Siōng Chú tī lí góa tiong-kan éng-oán choh-chèng.”

²⁴ Tāi-pi̍t chiū khì bih tī iá-gōa. Chhoe-it hit-ji̍t, ông chē-toh beh chia̍h.

²⁵ Ông chiàu-siông chē i óa piah hit-ê ūi, tī Iok-ná-tan ê tùi-bīn, Ap-nî-ní chē tī Sò-lô sin-piⁿ; Tāi-pi̍t ê ūi khang--teh.

²⁶ M̄-kú hit-ji̍t Sò-lô bô kóng sím-mi̍h; i siūⁿ-kóng Tāi-pi̍t tú-tio̍h tāi-chì hō͘ i bô chheng-khì, kàu hiān-chāi iáu-bē kiat-chēng.

²⁷ Keh-ji̍t, chhoe-jī, Tāi-pi̍t ê ūi iû-goân khang-khang. Sò-lô mn̄g Iok-ná-tan, “Iâ-se ê kiáⁿ sī-án-chóaⁿ chā-ji̍t kin-á-ji̍t lóng bô lâi chia̍h?”

²⁸ Iok-ná-tan ìn Sò-lô kóng, “Tāi-pi̍t pek-chhiat kiû góa ún-chún i tò-khì Pek-lī-hêng.

²⁹ I kóng, ‘Chhiáⁿ lí ún-chún góa tò--khì, in-ūi goán tau tī siâⁿ-lāi ū chè-sū, góa ê hiaⁿ-ko hoan-hù góa tńg--khì; taⁿ lí tio̍h si-un hō͘ góa, chún góa khì kìⁿ góa ê hiaⁿ-ko.’ In-ūi án-ni Tāi-pi̍t bô lâi kap ông chē-toh.”

³⁰ Sò-lô tùi Iok-ná-tan hoat sèng-tē, kā i kóng, “Lí chit-ê put-cheng pōe-ge̍k ê cha-bó͘-lâng siⁿ ê kiáⁿ, góa to chai lí khiā tī Iâ-se ê kiáⁿ hit-pêng, ka-kī chhú lêng-jio̍k, koh hō͘ lí ê lāu-bú siū-tio̍h thǹg-theh ê kiàn-siàu.

³¹ Iâ-se ê kiáⁿ nā oa̍h--teh, lí kap lí ê ông-koân it-tēng bōe ún-kò͘. Taⁿ tio̍h phài lâng khì kā lia̍h-lâi góa chia. I it-tēng tio̍h sí!”

³² Iok-ná-tan ìn kóng, “I sī-án-chóaⁿ tio̍h sí? I ū chòe sím-mi̍h m̄-tio̍h?”

³³ Sò-lô gia̍h chhiuⁿ siā Iok-ná-tan, beh kā i chha̍k-sí. Iok-ná-tan chiū chai i ê lāu-pē koat-sim beh thâi Tāi-pi̍t.

³⁴ Iok-ná-tan chin siū-khì, tùi chē-ūi khiā--khí-lâi, chhoe-jī hit-ji̍t lóng bô chia̍h sím-mi̍h. I ūi-tio̍h Tāi-pi̍t sim kan-khó͘, in-ūi i ê lāu-pē bú-jio̍k Tāi-pi̍t.

³⁵ Keh-chá-khí, Iok-ná-tan chiàu iok-tēng, chhut-khì iá-gōa beh kap Tāi-pi̍t kìⁿ-bīn; ū chi̍t ê siàu-liân-lâng tè i khì.

³⁶ Iok-ná-tan kā siàu-liân-lâng kóng, “Lí cháu-khì chhē góa siā ê chìⁿ.” Hit-ê siàu-liân-lâng chi̍t-ē cháu--khì, Iok-ná-tan chiū siā chi̍t ki chìⁿ, pe-kè siàu-liân-lâng.

³⁷ Hit-ê siàu-liân-lâng cháu kàu Iok-ná-tan chìⁿ lak--lo̍h-khì ê só͘-chāi, Iok-ná-tan tī āu-bīn hoah kóng, “Chìⁿ tī lí ê thâu-chêng.”

³⁸ Iok-ná-tan koh hoah, “Kóaⁿ-kín, kín khì, m̄-thang iân-chhiân.” Hit-ê siàu-liân-lâng chiū khioh hiah-ê chìⁿ tńg-lâi i ê chú-lâng hia,

³⁹ m̄-kú i m̄ chai che sī sím-mi̍h ì-sù, chí-ū Iok-ná-tan kap Tāi-pi̍t chai.

⁴⁰ Iok-ná-tan chiong keng kap chìⁿ kau hō͘ siàu-liân-lâng, hoan-hù kóng, “Lí the̍h tò-khì siâⁿ-lāi.”

⁴¹ Siàu-liân-lâng lī-khui liáu-āu, Tāi-pi̍t tùi chio̍h-thâu-tui āu-bīn chhut--lâi, phak tī thô͘-kha kā Iok-ná-tan pài saⁿ piàn; nn̄g lâng sio-chim, lám-teh khàu, Tāi-pi̍t khàu kah chin kek-tōng.

⁴² Iok-ná-tan kā Tāi-pi̍t kóng, “Lí thang pêng-an khì; lán nn̄g lâng í-keng ū kí Siōng Chú ê miâ chiù-chōa kóng, ‘Goān Siōng Chú pang-chān lán éng-oán kian-siú lí kap góa, lí ê hō͘-tāi kap góa ê hō͘-tāi tiong-kan só͘ li̍p ê iok.’” Tāi-pi̍t chiū lī-khui, Iok-ná-tan mā tò-khì siâⁿ-lāi.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan