Bìoball air-loidhne

撒母耳記上卷 2 - 現代台語譯本羅馬字版

Hap-ná ê Kî-tó

¹ Hap-ná kî-tó kóng: Góa ê sim in-ūi Siōng Chú hoaⁿ-hí; góa ê thâu in-ūi Siōng Chú gia̍h-koân-koân; góa ê chhùi káⁿ ǹg tùi-te̍k khoa-iāu, in-ūi lí ê chín-kiù hō͘ góa khoài-lo̍k.

² Chí-ū Siōng Chú chì-sèng, lí í-gōa bô pa̍t-ê; lán ê Siōng-tè sī î-it ê pó-hō͘-chiá.

³ Lâng m̄-thang chū-ko kóng kiau-ngō͘ ê ōe; m̄-thang chū-khoa kóng tōa-ōe, in-ūi Siōng Chú sī bû-só͘-put-ti ê Siōng-tè, lâng ê hêng-ûi siū lí phêng-kàm.

⁴ Ióng-sū ê keng í-keng siū at-chi̍h; loán-jio̍k ê lâng tit-tio̍h khùi-la̍t.

⁵ Hù-chiok--ê tio̍h hō͘ lâng chhiàⁿ chiah ū thang chia̍h; iau-gō--ê bô koh iau. Bōe seng-io̍k--ê siⁿ chhit ê; ū chin chōe kiáⁿ--ê kàu-bé bô chhun pòaⁿ-ê.

⁶ Siōng Chú hō͘ lâng sí, ia̍h hō͘ lâng oa̍h; hō͘ lâng lo̍h Im-kan, ia̍h hō͘ lâng khí--lâi.

⁷ Siōng Chú hō͘ lâng sàn-chhiah, ia̍h hō͘ lâng hó-gia̍h; hō͘ lâng kàng-kē, ia̍h hō͘ lâng ko-seng.

⁸ I tùi tîn-ai thê-poa̍t khùn-khó͘ ê lâng, tùi pùn-sò-tui ko-seng khiàm-kheh ê lâng, hō͘ in kap chun-kùi ê lâng chē chòe-hé, hō͘ in chē tōa-ūi. Tāi-tōe ê kun-ki Siōng Chú kiàn-li̍p; I chiong sè-kài an-tì tī hit téng-bīn.

⁹ I pó-siú I tiong-sìn chú-bîn ê kha-pō͘, hō͘ pháiⁿ-lâng tī o͘-àm tiong siau-sit; lâng bōe-tàng khò ka-kī ê khùi-la̍t khah iâⁿ.

¹⁰ Te̍k-tùi Siōng Chú ê lâng ōe siū phah-chhùi; I beh tùi thiⁿ ēng lûi kòng in. Siōng Chú beh sím-phòaⁿ choân sè-kài. I beh sù khùi-la̍t hō͘ I ê kun-ông, hō͘ I só͘ kéng-soán--ê thâu gia̍h-koân-koân.

¹¹ Í-lī-ka-ná tò-khì i tī La-má ê chhù. Gín-á Sat-bó-ní siū chè-si Í-lī chí-tō, ho̍k-sāi Siōng Chú.

Í-lī ê Nn̄g Ê Kiáⁿ

¹² Í-lī nn̄g ê kiáⁿ sī húi-lūi, biáu-sī Siōng Chú,

¹³ bô siú chè-si chhú hiàn-chè ê bah ê kui-tēng. Lâng hiàn chè-bah teh chú ê sî, chè-si ê po̍k-jîn chiū lâi, gia̍h saⁿ jiáu ê bah-chhe,

¹⁴ chhah-ji̍p e-á tiáⁿ-á, chhiám--chhut-lâi ê bah chè-si chiū the̍h--khì. Hit-sî, chè-si tùi lâi Sī-lô hiàn-chè ê Í-sek-lia̍t-lâng lóng án-ni chòe.

¹⁵ M̄-nā án-ni, bah-iû iáu-bē sio í-chêng, chè-si ê po̍k-jîn chiū lâi, kā hiàn-chè ê lâng kóng, “Bah chi̍t-kóa the̍h lâi-khì hō͘ chè-si hang; i bô ài chú--kè ê bah, ài chhiⁿ--ê.”

¹⁶ Hiàn-chè ê lâng nā kóng, “Iû sio-liáu, bah chiah chiàu lí só͘ ài--ê the̍h--khì.” Chè-si ê po̍k-jîn chiū kóng, “Bōe-ēng--tit, sûi-sî hō͘ góa; nā m̄, góa beh kiông the̍h--khì.”

¹⁷ Í-lī nn̄g ê kiáⁿ ê chōe tī Siōng Chú gán-tiong hui-siông giâm-tiōng, in-ūi in biáu-sī hiàn hō͘ Siōng Chú ê chè-mi̍h.

Sat-bó-ní tī Sī-lô

¹⁸ Hit-sî Sat-bó-ní iáu sòe-hàn, chhēng iù-môa-pò͘ ê í-hut-tek chè-si-ho̍k teh ho̍k-sāi Siōng Chú.

¹⁹ I ê lāu-bú ta̍k-nî kā i chòe chi̍t niá sòe-niá gōa-phàu, kap i ê tiōng-hu chiūⁿ-lâi hiàn nî-chè ê sî, tòa-lâi hō͘ i.

²⁰ Í-lī kā Í-lī-ka-ná kap i ê bó͘ chiok-hok, kóng, “Goān Siōng Chú tùi chit-ê hū-jîn-lâng koh sù lí kiáⁿ-jî, lâi pó͘ lí hiàn hō͘ Siōng Chú chit-ê gín-á.” In chiū tò-khì in tau.

²¹ Siōng Chú sù-hok Hap-ná, hō͘ i koh siⁿ saⁿ ê hāu-siⁿ, nn̄g ê cha-bó͘-kiáⁿ. Gín-á Sat-bó-ní kè-sio̍k ho̍k-sāi Siōng Chú, ji̍t-ji̍t tōa-hàn.

Í-lī Kéng-kò I ê Kiáⁿ

²² Í-lī í-keng chin lāu, thiaⁿ-tio̍h i ê kiáⁿ tùi Í-sek-lia̍t chèng-lâng só͘ chòe ê tāi-chì, koh thiaⁿ-tio̍h in kap hōe-bō͘ mn̂g-kháu chòe kang ê hū-jîn-lâng chòe-hé khùn.

²³ Í-lī kā in kóng, “Lín sī-án-chóaⁿ chòe chit-khoán pháiⁿ tāi-chì? Góa tùi Siōng Chú ê chú-bîn thiaⁿ-tio̍h lín ê pháiⁿ hêng-ûi.

²⁴ Góa ê kiáⁿ ah, m̄-thang án-ni. Góa ū thiaⁿ-tio̍h Siōng Chú ê chú-bîn tùi lín ê hong-phêng chin bái.

²⁵ Lâng tek-chōe lâng, Siōng-tè ōe kā i sím-phòaⁿ; lâng nā tek-chōe Siōng Chú, siáⁿ-lâng ōe-tàng thòe i piān-hō͘?” M̄-kú in m̄ thiaⁿ lāu-pē ê ōe, in-ūi Siōng Chú í-keng koat-tēng beh thâi in.

²⁶ Gín-á Sat-bó-ní ji̍t-ji̍t tōa-hàn, Siōng Chú kap lâng ná thiàⁿ i.

Ū-giân Í-lī-ke ê Chai-hō

²⁷ Ū chi̍t ji̍t, ū chi̍t ê Siōng-tè tiōng-iōng ê lâng lâi kìⁿ Í-lī, tùi i kóng, “Siōng Chú án-ni kóng, ‘Lín chó͘-sian chòe Ai-ki̍p-ông ê lô͘-lē ê sî, góa ū tùi in hián-hiān.

²⁸ Góa tùi Í-sek-lia̍t chèng chi-cho̍k kéng A-lûn ê ke chòe góa ê chè-si, tī góa ê chè-tôaⁿ hiàn-chè, sio-hiuⁿ, chhēng í-hut-tek chè-si-ho̍k ho̍k-sāi góa. Í-sek-lia̍t-lâng ēng hé sio hiàn hō͘ góa ê chè-mi̍h, góa lóng ū pun hō͘ lín chó͘-sian.

²⁹ Góa só͘ bēng-lēng tī góa ê chhù hiàn ê seng-lé chè-mi̍h, lín sī-án-chóaⁿ kā in thún-ta̍h? Lí khòaⁿ-tāng lí ê kiáⁿ khah kè-thâu chun-tiōng góa; kèng-jiân chún in tùi góa ê chú-bîn Í-sek-lia̍t hiàn ê chè-mi̍h, the̍h siōng-hó ê hūn khì chia̍h kah pûi-chut-chut?’

³⁰ “Só͘-í Siōng Chú — Í-sek-lia̍t ê Siōng-tè kóng, ‘Góa sui-jiân bat èng-ún, lí ê ke kap lí ê chong-cho̍k ōe éng-oán ho̍k-sāi góa, m̄-kú hiān-chāi góa Siōng Chú koat-tēng bô beh chiàu án-ni tùi-thāi lín; in-ūi chun-tiōng góa--ê, góa beh chun-tiōng i; biáu-sī góa--ê, beh siū khòaⁿ-khin.

³¹ Khòaⁿ, ji̍t-chí teh-beh kàu, góa beh chām-tn̄g lí kap lí ê chong-cho̍k ê chhiú-kut, án-ni lí ê ka-cho̍k bô lâng ōe tn̂g-hè-siū.

³² Tī góa sù-hok hō͘ Í-sek-lia̍t-lâng ê sî, lí tian-tò ōe khòaⁿ-kìⁿ lí ê chhù soe-pāi; lí ê ka-cho̍k bô lâng ōe tn̂g-hè-siū.

³³ Góa ōe kā lí lâu chi̍t ê hō͘-tāi tī góa ê chè-tôaⁿ ho̍k-sāi, m̄-kú lí ê ba̍k-chiu ōe sit-bêng, sim choa̍t-bāng; kî-tha ê hō͘-tāi lóng ōe chá-sí.

³⁴ Lí nn̄g ê kiáⁿ Hô-hut-nî kap Hui-nî-hap ōe kâng chi̍t ji̍t sí, che chèng-bêng góa tùi lí kóng ê ōe it-tēng si̍t-hiān.

³⁵ Góa ōe ūi ka-kī siat-li̍p chi̍t ê tiong-si̍t ê chè-si, i ōe chiàu góa ê sim-ì chòe tāi-chì. Góa ōe ūi-tio̍h i kiàn-li̍p ún-kò͘ ê ke; i ōe chi̍t-sì-lâng ho̍k-sāi góa só͘ soán-li̍p ê ông.

³⁶ Lí ê hō͘-tāi só͘ chhun ê lâng lóng ōe tùi i kiû-khit thó-chia̍h, kóng: Kiû lí hō͘ góa chham-ú chè-si ê kang-chok, hō͘ góa thang tō͘ saⁿ-tǹg.’”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan